നികുതിഭാരം വര്‍ധിപ്പിക്കാതെ, വനിതാ ശാക്തീകരണത്തിനും, കാര്‍ഷിക മേഖലയ്‌ക്കും ഊന്നല്‍ നല്‍കുന്ന ബജറ്റുമായി മന്ത്രി കെ.എം. മാണി
വരുന്ന സംസ്ഥാന ബജറ്റില്‍ നികുതിഭാരം വര്‍ദ്ധിപ്പിക്കാതെ പുതിയ നികുതി മേഖലകള്‍ കണ്ടെത്തി വരുമാനം വര്‍ദ്ധിപ്പിക്കണമെന്നാണ്‌ ആഗ്രഹമെന്ന്‌ കണ്‍സള്‍ട്ടേഷനില്‍ ധനമന്ത്രി കെ.എം.മാണി. ബജറ്റിന്‌ മുന്നോടിയായി വിളിച്ചുചേര്‍ത്ത പ്രീ ബജറ്റ്‌ കണ്‍സള്‍ട്ടേഷനില്‍ മാധ്യമ രംഗത്തെ പ്രമുഖരുമായി ആശയവിനിമയം നടത്തുകയായിരുന്നു മന്ത്രി.
നികുതി ചുമത്താന്‍ പര്യാപത്മായ നിരവധി പുതിയ മേഖലകള്‍ ഉണ്ടായികൊണ്ടിരിക്കുന്നു. ആധുനിക സാങ്കേതിക വിദ്യയുടെ ഫലമായി പുത്തന്‍ വ്യാപാരമേഖലകള്‍ പിറവിയെടുക്കുന്നു. നികുതി വരുമാനം വര്‍ദ്ധിപ്പിക്കുന്നതിനായി പുതിയ മേഖലകള്‍ കണ്ടെത്തേണ്ടിയിരിക്കുന്നു.
പരിസ്ഥിതി സംരക്ഷണത്തിന്‌ ഊന്നല്‍ നല്‍കുന്ന പരിസ്ഥിതി സൗഹൃദ ബജറ്റാണ്‌ ആലോചനയിലുള്ളത്‌. സ്‌ത്രീകളുടെ അവകാശ സംരക്ഷണം ലക്ഷ്യമാക്കി സ്‌ത്രീ സൃഹൃദ മനോഭാവം പുലര്‍ത്തുന്ന ജെന്റര്‍ ബജറ്റും ആലോചനയിലുണ്ട. വനിതാശാക്തീകരണത്തിലൂടെ സമഗ്രവികസനമാണ്‌ ലക്ഷ്യമിടുന്നത്‌.
കാര്‍ഷിക മേഖലക്ക്‌ ഉണര്‍വ്‌ നല്‍കുന്ന പരിപാടികള്‍ക്ക്‌ ഊന്നല്‍ നല്‍കും. ഇത്തരത്തില്‍ മുമ്പ്‌ പ്രഖ്യാപിച്ചിട്ടുള്ള പദ്ധതികളുടെ ഫലം കണ്ടെത്തുന്നതിന്‌ ആവശ്യമായ പിന്തുണ ഉറപ്പാക്കാന്‍ ശ്രമിക്കും.
വിദ്യാഭ്യാസ നിലവാരം ഉയര്‍ത്തുന്നതിനാവശ്യമായ പദ്ധതികള്‍ രൂപകല്‍പ്പന ചെയ്യേണ്ടിയിരിക്കുന്നു. പുതിയ ആശയങ്ങളും പുത്തന്‍ സമീപനങ്ങള്‍ക്കും പ്രധാന്യം നല്‍കും. ആശയങ്ങളുടെ കാലമാണ്‌ ഇത്. ആശയങ്ങള്‍ കണ്ടെത്തുന്നതിനും പ്രാവര്‍ത്തികമാക്കുന്നതിനും സ്ഥായിയായ പ്ലാറ്റ്‌ഫോം ആവശ്യമാണ്‌.
ബജറ്റ്‌ പദ്ധതികള്‍ നടപ്പിലാക്കുന്നതിനുള്ള കാലതാമസം ഒഴിവാക്കാന്‍ ശ്രദ്ധപതിപ്പിക്കണം. ഭരണാനുമതി, സാങ്കേതികാനുമതി, മേല്‍നോട്ടം എന്നിവയില്‍ കാലതാമസം വരുത്തുന്നതു കൊണ്ടാണ്‌ ബജറ്റ്‌ പദ്ധതികള്‍ ബജറ്റില്‍ തന്നെ ഒതുങ്ങുന്നത്‌. ഇത് ഒഴിവാക്കുന്നതിനാവശ്യമായ സംവിധാനം ആലോചിക്കും.
https://www.facebook.com/Malayalivartha
