തന്റെ അക്കൗണ്ടില്‍ നിന്നും പെന്‍ഷന്‍ തുക ഉള്‍പ്പെടെ ഒന്നര ലക്ഷം രൂപയോളം തട്ടിയെടുത്ത കൊച്ചുമക്കള്‍ക്കെതിരേ 88-കാരി പോലീസിന് പരാതി നല്‍കി. മകന്റെ വിവാഹമോചിതരായ പെണ്‍മക്കള്‍ക്കെതിരെയുള്ള കേസില്‍ പ്രതികളായ കൊച്ചുമക്കളെ അറസ്റ്റ് ചെയ്ത് പോലീസ് കോടതിയില്‍ ഹാജരാക്കി. കേസില്‍ കാട്ടാമ്പാക്ക് സ്വദേശിനിയായ സരോജിനി കുഞ്ഞുക്കുട്ടിയുടെ പണം എടിഎം ഉപയോഗിച്ച് പിന്‍വലിച്ചെടുത്തത് ദിവ്യാമോള്‍ എന്ന 36-കാരിയും ബിന്ദുമോളെന്ന 44-കാരിയുമാണ്. 

എടിഎം കാര്‍ഡ് പോസ്റ്റുമാനില്‍ നിന്നും ഒപ്പിട്ടു വാങ്ങിയ ശേഷം സരോജിനിയുടെ മകന്റെ മക്കളായ ഇരുവരും സരോജിനിയുടെ പേരില്‍ നിക്ഷേപിക്കപ്പെട്ട 1,60,000 രൂപ പലപ്പോഴായി പിന്‍വലിക്കുകയായിരുന്നു. ഭര്‍ത്താവ് മരിച്ചതിനെ തുടര്‍ന്ന് തനിച്ചു താമസിക്കുകയായിരുന്ന സരോജിനിയമ്മ, ഉണ്ടായിരുന്ന സ്ഥലം മക്കള്‍ക്ക് വീതിച്ചു നല്‍കിയ ശേഷം ബാക്കിയുള്ള നാലു സെന്റ് സ്ഥലത്താണ് കഴിഞ്ഞിരുന്നത്. എന്നാല്‍ ബിന്ദുവും ദിവ്യയും വീടു വെയ്ക്കുന്നതിനായി സ്ഥലം ആവശ്യപ്പെട്ടു. തുടര്‍ന്ന് തങ്ങളുടെ പേരിലുള്ള മൂന്ന് സെന്റ് ഒന്നരലക്ഷം രൂപയ്ക്ക് സരോജിനിക്ക് നല്‍കുകയും ചെയ്തു. ഈ പണം സരോജിനിയമ്മയുടെ പേരില്‍ ബാങ്കില്‍ നിക്ഷേപിക്കുകയും പാസ്ബുക്കില്‍ പതിപ്പിക്കുകയും ചെയ്തു.

പിന്നീട് ബാങ്ക് തപാലില്‍ അയച്ച എടിഎം കാര്‍ഡ് യുവതികള്‍ പോസ്റ്റുമാന്റെ കയ്യില്‍ നിന്നും ഒപ്പിട്ടു വാങ്ങുകയും ഇതുപയോഗിച്ച് പണം തട്ടുകയുമായിരുന്നു. മരുന്നു വാങ്ങാനായി ബാങ്കില്‍ നിന്നും പണമെടുക്കാന്‍ ചെന്നപ്പോഴാണ് സരോജിനിയമ്മ തട്ടിപ്പ് മനസ്സിലാക്കിയത്. നിക്ഷേപിച്ച പണത്തിനൊപ്പം പെന്‍ഷന്‍ കിട്ടിയ കാശ് കൂടി നഷ്ടമായെന്ന് തിരിച്ചറിഞ്ഞ ഇവര്‍ പോലീസില്‍ പരാതി നല്‍കുകയും പരാതിയുടെ അടിസ്ഥാനത്തില്‍ കേസെടുത്ത പോലീസ് രണ്ടു പേരെയും പിടികൂടുകയും ചെയ്തു.