വൈദ്യുത മന്ത്രി എം.എം.മണിയുടെ സഹോദരന്‍ മുണ്ടയ്ക്കല്‍ സനകന്‍ (56)ന്റെ ദുരൂഹ മരണവുമായി ബന്ധപ്പെട്ട് ഒരാളെ പൊലീസ് കസ്റ്റഡിയിലെടുത്തു. സനകനെ ഇടിച്ചെന്ന് കരുതുന്ന വാഹനത്തിന്റെ ഡ്രൈവര്‍ മുരിക്കാശേരി ഉപ്പുതോട് വേലംകുന്നേല്‍ എബിയെയാണ് (28) അടിമാലി സി.ഐ പി.കെ. സാബുവിന്റെ നേതൃത്വത്തില്‍ പൊലീസ് കസ്റ്റഡിയിലെടുത്തത്. ഇയാളെ ചോദ്യം ചെയ്തുവരുന്നതായി പൊലീസ് പറഞ്ഞു.

തലയ്ക്ക് ഗുരുതരമായി പരിക്കേറ്റ നിലയില്‍ കൊച്ചി ധനുഷ്‌കോടി ഹൈവേയില്‍ കുത്തുപാറയില്‍ കണ്ടെത്തിയ സനകനെ ഒക്‌ടോബര്‍ ഒമ്പതിന് വൈകിട്ടാണ് കോട്ടയം മെഡിക്കല്‍ കോളേജ് ആശുപത്രിയിലെത്തിച്ചത്. സനകനും കുടുംബവും പത്താം മൈലിലാണ് താമസിക്കുന്നത്. ഏഴാം തീയതി വീട്ടില്‍ നിന്നും സനകനും ഭാര്യയും കുഞ്ചിത്തണ്ണിയിലെ കുടുംബവീട്ടിലേക്ക് പോവുംവഴി അടിമാലിയിലെ ചായക്കടയില്‍ കയറി ഭക്ഷണം കഴിച്ചു. പുറത്തിറങ്ങിയ സനകനെ കാണാതാവുകയായിരുന്നു. ഭാര്യയും മറ്റും അവിടെയാകെ തെരഞ്ഞെങ്കിലും കണ്ടെത്താനായില്ല.

അപസ്മാര രോഗിയാണ് സനകനെന്ന് പറയപ്പെടുന്നു. വഴിയരികില്‍ അബോധാവസ്ഥയില്‍ കണ്ടെത്തിയ സനകനെ നാട്ടുകാര്‍ വെള്ളത്തൂവല്‍ ആശുപത്രിയിലെത്തിക്കുകയായിരുന്നു. തുടര്‍ന്ന് പൊലീസ് എത്തി അടിമാലി താലൂക്ക് ആശുപത്രിയിലും പിന്നീട് കോട്ടയം മെഡിക്കല്‍ കോളേജിലേക്കും മാറ്റി. ഗുരുതരമായി പരിക്കേറ്റ സനകന്‍ വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയിരുന്നത്. എന്നാല്‍ പിന്നീട് മരണത്തിന് കീഴടങ്ങുകയായിരുന്നു.

ഏതെങ്കിലും വാഹനം ഇടിച്ചാവാം അപകടമെന്നായിരുന്നു സംശയം. എന്നാല്‍ ഒക്‌ടോബര്‍ ഏഴിന് രാവിലെ അടിമാലി അമ്പലപ്പടിയില്‍ എബിയുടെ കാര്‍ സനകനെ ഇടിച്ചതായി മന്ത്രിക്ക് ഊമക്കത്ത് ലഭിച്ചതോടെയാണ് കാര്യങ്ങള്‍ വഴിത്തിരിയുന്നത്.ഇതുകൂടാതെ മറ്റൊരു സഹോദരനായ എം.എം. ലംബോദരന്‍ പൊലീസ് അന്വേഷണത്തില്‍ വീഴ്ചവന്നതായി ആരോപിച്ചതോടെ അന്വേഷണം ഊര്‍ജിതമാക്കിയ പൊലീസ് സനകനെ ഇടിച്ച വാഹനവും െ്രെഡവറെയും കസ്റ്റഡിയിലെടുത്തു.

തന്റെ വാഹനത്തിന്റെ കണ്ണാടിയാണ് സനകനെ ഇടിച്ചതെന്നാണ് ഇയാളുടെ വാദം. സാരമായ പരിക്കല്ലാത്തതിനാല്‍ ആശുപത്രിയില്‍ അഡ്മിറ്റ് ചെയ്തിരുന്നില്ല. എന്നാല്‍ ഇതിന്റെ പിറ്റേന്നാണ് സനകനെ ഗുരുതര പരിക്കേറ്റ നിലയില്‍ കണ്ടെത്തുന്നത്. കൂടുതല്‍ ചോദ്യം ചെയ്യലിന് ശേഷം എബിയുടെ അറസ്റ്റ് അടക്കമുള്ളവ രേഖപ്പെടുത്തുമെന്നാണ് പൊലീസ് നല്‍കുന്ന സൂചന.