നടി ആക്രമിക്കപ്പെട്ട കേസിന്റെ വിചാരണ വേഗത്തില്‍ നടത്തണമെന്ന് അന്വേഷണസംഘം സര്‍ക്കാരിനോട് ആവശ്യപ്പെടാന്‍ തീരുമാനിച്ചു. വിചാരണ ഒരു വര്‍ഷത്തിനകം തീര്‍ക്കണമെന്നും വൈകിയാല്‍ സാക്ഷികള്‍ കൂറുമാറാന്‍ സാധ്യതയുണ്ടെന്നും കിട്ടിയ നിയമോപദേശത്തിന്റെ അടിസ്ഥാനത്തിലാണ് അന്വേഷണസംഘത്തിന്റെ ഈ നീക്കം. കഴിഞ്ഞ ദിവസമാണ് കേസില്‍ അന്വേഷണസംഘം അങ്കമാലി കോടതിയില്‍ കുറ്റപത്രം സമര്‍പ്പിച്ചത്.

സിനിമാ മേഖലയില്‍ നിന്നു തന്നെ അമ്പതോളം പേര്‍ സാക്ഷികളായ കേസില്‍ വിചാരണ നീളുന്നത് കേസിന്റെ ഫലപ്രാപ്തിയെ തന്നെ ബാധിക്കുമെന്ന് അന്വേഷണസംഘം പറയുന്നു. ഈ സാഹചര്യത്തിലാണ് കേസ് നടപടികള്‍ വേഗത്തില്‍ വേണമെന്നും പ്രത്യേക കോടതി വേണമെന്ന് പറഞ്ഞിരിക്കുന്നത്. ദിലീപിനെ കേസില്‍ എട്ടാം പ്രതിയാക്കിയാണ് ചേര്‍ത്തിരിക്കുന്നത്.

കൂട്ടബലാത്സംഗം ഉള്‍പ്പെടെ 11 കുറ്റങ്ങളാണ് ചുമത്തിയിരിക്കുന്നത്. ഒന്നുമുതല്‍ 12 വരെ പ്രതികളുള്ള കേസില്‍ രണ്ടു പേരെ മാപ്പു സാക്ഷിയാക്കിയിട്ടുണ്ട്. ദിലീപിന്റെ മുന്‍ഭാര്യയും നടിയുമായ മഞ്ജു വാര്യര്‍ കേസില്‍ മുഖ്യസാക്ഷിയാണ്. ആക്രമിക്കപ്പെട്ട നടി ഒന്നാം സാക്ഷിയായ കേസില്‍ മഞ്ജുവാര്യര്‍ 13 ാം സാക്ഷിയാണ്.

സുനിക്ക് അകമ്പടി പോകുകയും വിളിക്കാന്‍ ഫോണ്‍ നല്‍കുകയും ചെയ്ത പോലീസുകാരന്‍ അനീഷും സുനിയെ കത്തെഴുതാന്‍ സഹായിച്ച തടവുകാരന്‍ വിപിന്‍ലാലുമാണ് മാപ്പുസാക്ഷിയാകുന്നത്. അതിനിടയില്‍ നടി ആക്രമിക്കപ്പെട്ട സംഭവം നടന്നതിന് ശേഷവും നടിയെ മോശക്കാരിയാക്കി ചിത്രീകരിക്കാന്‍ ദിലീപ് ശ്രമം നടത്തിയെന്നും കുറ്റപത്രത്തില്‍ പറയുന്നുണ്ട്.

കടുത്ത പ്രതികാര മനോഭാവമാണ് ഇതിലൂടെ വെളിവാകുന്നതെന്നും പറഞ്ഞിട്ടുണ്ട്. നടി ആക്രമിക്കപ്പെട്ട കേസിലെ അന്വേഷണം തന്നിലേക്ക് വരുന്നു എന്ന ഘട്ടത്തില്‍ നടി ജാഗ്രത പാലിക്കണമെന്നു പറഞ്ഞതും മറ്റുള്ളവരെ കൊണ്ടു പറയിച്ചതും ഇത്തരം ഒരു നീക്കത്തിന്റെ ഭാഗമായിരുന്നു. ഇതിനായി സിനിമാ രംഗത്തെ പല പ്രമുഖരെയും ഉപയോഗിക്കുകയും ചെയ്തു. താന്‍ നിരപരാധിയാണെന്ന് വരുത്തി തീര്‍ക്കാന്‍ തനിക്ക് അനുകൂലമായി നില്‍ക്കുന്ന സിനിമാരംഗത്തെ പ്രമുഖരെ ഉപയോഗിക്കുകയും ചെയ്തു.

സംഭവം നടന്ന ദിവസം ആശുപത്രിയില്‍ അഡ്മിറ്റായിരുന്നെന്ന് വരുത്തിത്തീര്‍ക്കാനും ശ്രമം നടത്തി. ഫെബ്രുവരി 14 നും 27 നും ഇടയില്‍ ആശുപത്രിയില്‍ അഡ്മിറ്റായിരുന്നു എന്നാണ് വാദം. എന്നാല്‍ ആശുപത്രിയില്‍ കിടക്കുന്നെന്ന് പറഞ്ഞ സമയത്ത രാംലീല ഉള്‍പ്പെടെയുള്ള വിവിധ സിനിമയുടെ ഷൂട്ടിംഗ് ലൊക്കേഷനിലായിരുന്നു ദിലീപെന്ന് പോലീസ് കണ്ടെത്തി.

അസുഖം ബാധിച്ച് ആശുപത്രിയില്‍ കഴിയുന്നയാള്‍ എങ്ങിനെയാണ് ഷൂട്ടിംഗ് സെറ്റിലെത്തുക എന്നാണ് അന്വേഷണ സംഘത്തിന്റെ വാദം. നേരത്തേ ദിലീപിന്റെ ജാമ്യം നിഷേധിക്കണമെന്ന് ആവശ്യപ്പെട്ട് അന്വേഷണസംഘം നേരത്തെ ഹൈക്കോടതിയെ സമീപിച്ചിരുന്നു. അങ്കമാലി കോടതിയില്‍ വേണമെങ്കില്‍ ഹര്‍ജി സമര്‍പ്പിക്കാനായിരുന്നു ഇതിന് ഹൈക്കോടതിയുടെ നിര്‍ദേശം.