ഫോണ്‍കെണി വിവാദത്തില്‍ മന്ത്രിക്കസേര ഉപേക്ഷിച്ച എ.കെ ശശീന്ദ്രന്‍ വീണ്ടും മന്ത്രിയാകും. സത്യപ്രതിജ്ഞ അടുത്താഴ്ചയുണ്ടാക്കേും. ഇത് സംബന്ധിച്ച് എന്‍.സി.പി സംസ്ഥാന ആക്ടിംഗ് പ്രസിഡന്റ് ടി.പി പീതാംബരന്‍ മാസ്റ്റര്‍ എല്‍.ഡി.എഫ് കണ്‍വീനര്‍ വൈക്കം വിശ്വനെ നേരില്‍ക്കണ്ട് കത്ത് നല്‍കും. നഷ്ടപ്പെട്ട മന്ത്രിസ്ഥാനം എത്രയും പെട്ടെന്ന് നേടിയെടുക്കണമെന്ന് എന്‍.സി.പി ദേശീയ നേതൃത്വം സംസ്ഥാന നേതാക്കളോട് ആവശ്യപ്പെട്ടിട്ടുണ്ട്. ശശീന്ദ്രനെതിരായി അന്വേഷണം നടത്തിയ കമ്മിഷന്‍ അദ്ദേഹത്തിന് ക്ലീന്‍ ചിറ്റ് നല്‍കിയിട്ടുണ്ട്. മംഗളം ചാനല്‍ പുറത്ത് വിട്ട ശബ്ദരേഖ മശശീന്ദ്രന്റേതാണെന്ന് തെളിയിക്കപ്പെട്ടിട്ടില്ലെന്ന് റിപ്പോര്‍ച്ചില്‍ പറയുന്നുണ്ട്. മാത്രമല്ല കേസിലെ പ്രതിയായ മാധ്യമമ പ്രവര്‍ത്തക ശശീന്ദ്രനെതിരെ നല്‍കിയ കേസ് പിന്‍വലിക്കുകയാണെന്ന് ഹൈക്കോടതിയെ അറിയിച്ചിട്ടുണ്ട്. കോടതി നടപടി താമസിക്കാതെ പൂര്‍ത്തിയാകുമെന്നറിയുന്നു. അതോടെ ശശീന്ദ്രന് ക്ലീന് ഇമേജാകും.

ശശീന്ദ്രനെ മന്ത്രിയാക്കുന്നതിനെ തോമസ് ചാണ്ടി പരസ്യമായി എതിര്‍ക്കില്ല. കാരണം ധാരണപ്രകാരം ആരാണോ ആദ്യം കുറ്റവിമുക്തരായി എത്തുക, അവര്‍ക്കായിരിക്കും മന്ത്രിക്കസേര. തോമസ് ചാണ്ടി മാര്‍ത്താണ്ഡം കായല്‍ കയ്യേറിയെന്ന ആലപ്പുഴ ജില്ലാ കളക്ടറുടെ നടപടിക്കെതിരെ അദ്ദേഹം ഹൈക്കോടതിയ സമീപിച്ചതിനെ തുടര്‍ന്ന് കോടതി നടത്തിയ പരാമര്‍ശങ്ങള്‍ റദ്ദാക്കണമെന്ന് ആവശ്യപ്പെട്ട് സുപ്രിംകോടതിയെ സമീപിക്കുമെന്ന് പറഞ്ഞിരുന്നെങ്കിലും അത് ഉണ്ടാവില്ല. കോടതിയില്‍ നിന്ന് കൂടുതല്‍ തിരിച്ചടികള്‍ ഉണ്ടാകുമെന്ന സൂചനയെ തുടര്‍ന്നാണിത്. കളക്ടറെ സമീപിക്കാന്‍ ഹൈക്കോടതി നിര്‍ദ്ദേശിച്ചതിനാല്‍ തോമസ് ചാണ്ടിയുടെ അഭിഭാഷകന്‍ കളക്ടറെ നേരില്‍ക്കണ്ട് കാര്യങ്ങള്‍ ബോധ്യപ്പെടുത്തും. 

ശശീന്ദ്രന്‍ വീണ്ടും മന്ത്രിക്കുപ്പായം അണിയുന്നതോടെ തോമസ് ചാണ്ടിയുടെ തിരിച്ചുവരവ് എന്നെന്നേക്കുമായി ഇല്ലാതാകും. രണ്ട് എം.എല്‍.എമാരുള്ള എന്‍.സി.പിക്ക് ഒരു മന്ത്രിസ്ഥാനമാണ് എല്‍.ഡി.എഫ് നല്‍കിയിട്ടുള്ളത്. ശശീന്ദ്രന്റെ തിരിച്ചുവരവിനെ സി.പി.ഐ എതിര്‍ക്കുന്നില്ല എന്നതും ശ്രദ്ധേയമാണ്. സാധാരണ അവര്‍ ഉയര്‍ത്താറുള്ള ധാര്‍മികപ്രശ്‌നങ്ങളൊന്നും ഉയര്‍ത്തുന്നുമില്ല. പ്രതിപക്ഷനേതാവ് രമേശ് ചെന്നിത്തലയടക്കം പ്രതിഷേധവുമായി രംഗത്തെത്തിയിട്ടുണ്ടെങ്കിലും അതിനൊന്നും അധികം ആയുസ് ഉണ്ടാകില്ലെന്ന് എല്‍.ഡി.എഫിന് നന്നായി അറിയാം. മുഖ്യമന്ത്രി പിണറായി വിജയനടക്കമുള്ള നേതാക്കള്‍ക്ക് തോമസ് ചാണ്ടിയേക്കാള്‍ താല്‍പര്യം അഴിമതിയുടെ കറപുരളാത്ത ശശീന്ദ്രനോടാണ്.