ഗുളിക തൊണ്ടയില്‍ കുടുങ്ങിയ കോട്ടയം സ്വദേശിയായ പെണ്‍കുഞ്ഞിന്റെ മരണത്തിന് കാരണമായത് ഗതാഗത കുരുക്കാണെന്ന് ആശുപത്രിയിലെത്തിച്ച കാറുടമ എറണാകുളം സ്വദേശി അബ്ദുള്‍ സലാം. അല്‍പ്പം കൂടി മുന്‍പ് എത്തിക്കാന്‍ സാധിച്ചിരുന്നെങ്കില്‍ ഐലിന്‍ എന്ന കുഞ്ഞിന്റെ ജീവന്‍ രക്ഷിക്കാമായിരുന്നു. ഗുളിക തൊണ്ടയില്‍ കുടുങ്ങിയായിരുന്നു പരുത്തുംപാറ നടുവിലേപ്പറമ്പില്‍ റിന്റു- റിനു ദമ്പതികളുടെ മകള്‍ ഐലിന്റെ മരണം.

ചിങ്ങവനത്തിനടുത്ത് മാവിളങ്ങ് പെട്രോള്‍ പമ്പിനു സമീപം ബന്ധുവീട്ടിലായിരുന്നു ഐലിനും മാതാവ് റിനുവും. കടുത്ത ചുമയുണ്ടായിരുന്ന ഐലിന്‍ അഞ്ചു മണിയോടെയാണു ഗുളിക കഴിച്ചത്. ഗുളിക തൊണ്ടയില്‍ കുടുങ്ങി കുട്ടി അസ്വസ്ഥത പ്രകടിപ്പിച്ചതോടെ റിനുവും സഹോദരി സജിനയും ഇവരുടെ അമ്മ സജിയും ചേര്‍ന്ന് ഐലിനെയും കൊണ്ട് എംസി റോഡിലേക്ക് ഓടി. കൈകാണിച്ചിട്ടും വാഹനങ്ങളൊന്നും നിര്‍ത്തിയില്ല. അതുവഴി വന്ന അബ്ദുല്‍ സലാം കാര്‍ നിര്‍ത്തി ഐലിനെ ആശുപത്രിയിലേക്കു കൊണ്ടുപോയി. നഗരത്തില്‍ ഒരു സംഘടനയുടെ പ്രകടനം നടന്ന ദിവസമായിരുന്നു അന്ന്.

ചിങ്ങവനത്തു നിന്ന് കുട്ടിയുമായി കോട്ടയം നഗരത്തിലെ ആശുപത്രിയിലേക്കു കാറോടിക്കുന്നതിനിടെ കോടിമത പാലത്തില്‍ കുരുക്കില്‍പ്പെട്ടു. കാര്‍ ഇഴയാന്‍ തുടങ്ങി. ഇടവഴികളിലൂടെ ഓടിച്ചെങ്കിലും സമയത്ത് കുട്ടിയെ ആശുപത്രിയില്‍ എത്തിക്കാനായില്ലെന്നു വേദനയോടെ സലാം പറയുന്നു.

ആശുപത്രിയിലെത്തും മുന്‍പേ കാറില്‍ തന്നെ അമ്മയുടെയും മറ്റും കണ്‍മുന്‍പില്‍ ഐലിന്റെ ജീവന്‍ പൊലിഞ്ഞു. നാലിനു വീട്ടിലെ ശുശ്രൂഷകള്‍ക്കു ശേഷം അഞ്ചിന് ചിങ്ങവനം സെന്റ് ജോണ്‍സ് ദയറാപള്ളിയിലാണു സംസ്‌കാരം.