മൂന്നാംതവണ പ്രതിയായാണ് ദിലീപ് കോടതി കയറുന്നത്; സിനിമയിലെ കോടതിയല്ല, യഥാര്ത്ഥ കോടതി
സിനിമകളില് ഒരു പാട് കോടതി രംഗങ്ങളില് തിളങ്ങിയിട്ടുള്ള നടന് ദിലീപ് രണ്ട് തവണ കോടതി കയറിയിട്ടുണ്ട്. നടിയെ ആക്രമിച്ച കേസിന്റെ വിചാരണ കൂടിയാകുമ്പോള് മൂന്നാം തവണയും. പ്രതിഫലത്തുക നല്കാത്ത നിര്മാതാവ് ദിനേശ് പണിക്കരെ ജയിലിലടച്ച ദിലീപ് ബലാല്സംഗ കേസില് വിചാരണ തടവുകാരനായി അതേ ജയിലില് കിടന്നത് കാലത്തിന്റെ കാവ്യനീതിയാകും. 1999ല് ഉദയപുരം സുല്ത്താന് എന്ന സിനിമയില് അഭിനയിച്ചതിന്റെ പ്രതിഫലം മുഴുവനും ലഭിക്കാത്തതിനെ തുടര്ന്നാണ് ദിലീപ് ദിനേശ് പണിക്കര്ക്കെതിരെ കോടതിയില് പരാതി നല്കിയത്. നിര്മാതാവ് ചെക്ക് നല്കിയിരുന്നെങ്കിലും താന് പറഞ്ഞ ശേഷമേ ബാങ്കില് ഹാജരാക്കാവൂ എന്ന് പറഞ്ഞിരുന്നു. പണത്തിന് പ്രയാസം നേരിട്ടപ്പോള് ദിലീപിന് കോടതി കയറേണ്ടിവന്നു.
അന്ന് പലരും ദിലീപിനോട് കേസ് പിന്വലിക്കാന് ആവശ്യപ്പെട്ടെങ്കിലും നടന്നില്ല. ആലുവ സബ്ജയിലില് 523ാം നമ്പര് വിചാരണ തടവുകാരനായി ദിനേശ് പണിക്കര് കിടന്നു. വര്ഷങ്ങള്ക്ക് ശേഷം ദിലീപ് ആലുവ സബ്ജയിലില് എത്തിയപ്പോഴും ഇതേ നമ്പര് തന്നെയാണ് ലഭിച്ചത്. ആ കേസ് കോടതിക്ക് പുറത്ത് ഒത്തുതീര്പ്പായി. പിന്നീട് വര്ഷങ്ങള്ക്ക് ശേഷം ദിനേശ് പണിക്കരുമായി ദിലീപ് നേരിട്ടിടപെട്ട് പ്രശ്നം പരിഹരിച്ചു. റിംഗ് മാസ്റ്ററില് ശ്രദ്ധേയമായ വേഷവും നല്കി. രണ്ടാമത് ദിലീപ് കയറിയത് കുടുംബ കോടതിയാണ്. ആദ്യ ഭാര്യ മഞ്ജുവാര്യരുമായുളള ബന്ധം വേര്പിരിയുന്നതിനായി.
മഞ്ജുവിനെ പിരിയാന് ദിലീപിന് താല്പര്യമില്ലായിരുന്നു. പരമാവധി അഡ്ജസ്റ്റ് ചെയ്ത ശേഷമാണ് പിരിയാന് തീരുമാനിച്ചതെന്ന് മഞ്ജുവാര്യര് കോടതിയെ അറിയിച്ചിരുന്നു. കൗണ്സിലിംഗ് ഉള്പ്പെടെയുള്ള നടപടികള് പൂര്ത്തിയാക്കിയെങ്കിലും വിവാഹമോചനത്തിലേക്ക് നയിച്ച കാര്യങ്ങള് സ്വകാര്യമായതിനാല് അത് പ്രസിദ്ധീകരിക്കുന്നതില് നിന്ന് മാധ്യമങ്ങളെ വിലക്കണമെന്ന് ദിലീപ് കോടതിയില് അപേക്ഷ നല്കി. അതിനാല് വേര്പിരിയിലിന്റെ അണിയറക്കഥകള് പുറംലോകം അറിഞ്ഞില്ല. ആ വിവരങ്ങള് കൂടി പരിശോധിച്ച ശേഷമാണ് നടിയെ ആക്രമിച്ച കേസ് അന്വേഷിച്ച സംഘം അനുബന്ധ കുറ്റപത്രം സമര്പ്പിച്ചത്. വിചാരണ നടക്കുന്ന വേളയില് ദിലീപ് കോടതിയില് ഹാജരാകേണ്ട കാര്യമില്ല. അഭിഭാഷകന് കാര്യങ്ങള് ബോധ്യപ്പെടുത്തും. പ്രത്യേക സാഹചര്യത്തില് കോടതിയില് നേരിട്ടെത്തണമെന്ന് ആവശ്യപ്പെട്ടാല് എത്തുകയും വേണം.
അറിയപ്പെടുന്ന നടനായതിനാല് ദിലീപ് വിചാരണയ്ക്ക് എത്തുമ്പോള് സുരക്ഷാ പ്രശ്നങ്ങളുണ്ടാകാന് സാധ്യതയുണ്ട്. താരത്തെ കാണാന് ജനം തടിച്ച് കൂടിയാല് അത് കോടതി നടപടികളെ ഉള്പ്പെടെ തടസപ്പെടുത്തുന്ന അവസ്ഥയിലേക്ക് എത്തിച്ചേക്കാം. ഇതെല്ലാം കണക്കിലെടുത്താണ് ഓരോ സിറ്റിംഗിനും താരം ഹാജരാകണ്ട എന്ന് തീരുമാനിക്കുന്നത്.
https://www.facebook.com/Malayalivartha
