എ.കെ ശശീന്ദ്രനെ മന്ത്രിയാക്കണമെന്ന് ആവശ്യപ്പെട്ട് എന്‍.സി.പി സംസ്ഥാന പ്രസിഡന്റ് ടി.പി പീതാംബരന്‍ മാസ്റ്റര്‍ എല്‍.ഡി.എഫ് കണ്‍വീനറെ രണ്ടു. ഫോണ്‍ കെണിക്കേസില്‍ അന്വേഷണം നടത്തിയ കമ്മിഷന്‍ ശശീന്ദ്രന് ക്ലീന്‍ചിറ്റി നല്‍കിയതിനാല്‍ മന്ത്രിസഭയില്‍ എത്തുന്നതിന് തടസമില്ലെന്ന് കണ്‍വീനര്‍ വൈക്കം വിശ്വനോട് അഭ്യര്‍ത്ഥിച്ചു. ഹൈക്കോടതിയിലെ പരാതിയും മന്ത്രിസഭാ പ്രവേശനവും തമ്മില്‍ ബന്ധമില്ലെന്നും അദ്ദേഹം ചൂണ്ടിക്കാട്ടി. മന്ത്രിസഭാ പ്രവേശനം സംബന്ധിച്ച് എന്‍.സി.പി നേതാക്കള്‍ തന്നെ നേരില്‍ കണ്ട് ആവശ്യപ്പെട്ടെന്ന് വൈക്കം വിശ്വന്‍ മാധ്യമങ്ങളോട് പറഞ്ഞു. എല്‍.ഡി.എഫ് ചര്‍ച്ച ചെയ്ത് ഇക്കാര്യം തീരുമാനിക്കുമെന്നും മുന്നണിയിലെ മറ്റ് ഘടകക്ഷികളൊന്നും ഇതിനെ എതിര്‍ക്കില്ലെന്നും അദ്ദേഹം വ്യക്തമാക്കി.

ശശീന്ദ്രന്റെ മന്ത്രിസഭാ പ്രവേശനത്തില്‍ ധാര്‍മികതയില്ലെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ച കാര്യം മാധ്യമപ്രവര്‍ത്തകര്‍ ശ്രദ്ധയില്‍പ്പെടുത്തിയപ്പോള്‍ ധാര്‍മികതയെ കുറിച്ച് പറയാന്‍ ചെന്നിത്തലയ്ക്ക് ധാര്‍മികതയില്ലെന്നും വൈക്കം വിശ്വന്‍ മറുപടി നല്‍കി. ശശീന്ദ്രന്റെ മന്ത്രിസഭാ പ്രവേശനം താമസിക്കാതെ ഉണ്ടാകുമോ എന്ന് ചോദിച്ചപ്പോള്‍ എല്ലാവരുമായും ആശയവിനിമയം നടത്തണമെന്നും ഒറ്റയ്ക്ക് ഒരു തീരുമാനം എടുക്കാനോ അഭിപ്രായം പറയാനോ പറ്റില്ലെന്നും വൈക്കം വിശ്വന്‍ പറഞ്ഞു. വൈക്കം വിശ്വന്റെ കോട്ടയത്തെ വീട്ടിലെത്തിയാണ് എന്‍.പി.സി നേതാക്കള്‍ അദ്ദേഹത്തെ കണ്ടത്.

ശശീന്ദ്രനെ വീണ്ടും മന്ത്രിയാക്കാനുള്ള നീക്കം ജനാധിപത്യത്തോടുള്ള വെല്ലുവിളിയാണെന്ന് പ്രതിപക്ഷനേതാവ് രമേശ് ചെന്നിത്തല കോട്ടയത്ത് ആരോപിച്ചു. സദാചാരവിരുദ്ധമായ കാര്യം ചെയ്ത ശശീന്ദ്രന്‍ അക്കാര്യം നിഷേധിച്ചിട്ടില്ല. ചാനല്‍ സംപ്രേക്ഷണം ചെയ്ത ശബ്ദം അദ്ദേഹത്തിന്റേതല്ലെന്ന് പറഞ്ഞാണ് ക്ലീന്‍ ചിറ്റ് നല്‍കിയത്. പൊതുസമൂഹം ഇത് അംഗീകരിക്കില്ലെന്നും ധാര്‍മികതയ്ക്ക് നിരക്കാത്ത നടപടിയാണിതെന്നും ചെന്നിത്തല ആരോപിച്ചു.