സംസ്ഥാനത്തെ ആറ് സര്വകലാശാലയിലെ ഭരണ, അക്കാദമിക പ്രവര്ത്തനങ്ങളും പരീക്ഷാനടത്തിപ്പും ഏകോപിപ്പിക്കാനുള്ള നടപടിക്ക് തുടക്കം
സംസ്ഥാനത്തെ ആറ് സര്വകലാശാലയിലെ ഭരണ, അക്കാദമിക പ്രവര്ത്തനങ്ങളും പരീക്ഷാനടത്തിപ്പും ഏകോപിപ്പിക്കാനുള്ള നടപടിക്ക് തുടക്കം. ഇതിനായി കേരള, എംജി, കണ്ണൂര്, കലിക്കറ്റ്, കുസാറ്റ്, ശ്രീശങ്കരാചാര്യ സര്വകലാശാലകളിലെയും കൊളീജിയറ്റ് വിദ്യാഭ്യാസവകുപ്പ്, സാങ്കേതിക വിദ്യാഭ്യാസവകുപ്പ് എന്നിവയിലെയും സേവനങ്ങള് ഒറ്റ കംപ്യൂട്ടര് ശൃംഖലയിലാക്കാന് പുതിയ സോഫ്റ്റ്വെയര് വികസിപ്പിക്കുന്ന നടപടിക്ക് സര്ക്കാര് ഉത്തരവിറക്കി.
സര്വകലാശാലകളുടെ പ്രവര്ത്തനങ്ങള് ഏകോപ്പിപ്പിക്കുന്നതോടെ പ്രവേശനം മുതല് ഫലപ്രഖ്യാപനം വരെയുള്ളവയുടെ സമയക്രമങ്ങള് ഏകീകരിക്കപ്പെടും. മുഴുവന് സര്വകലാശാലകളിലും ഒരേ സമയം പ്രവേശന നടപടി ആരംഭിക്കും. ബിരുദ, ബിരുദാനന്തര കോഴ്സുകളുടെ ഫലങ്ങളും ഒരേ സമയം പ്രസിദ്ധീകരിക്കാനാകും. കോഴ്സിന് ചേരുമ്പോള് ലഭിക്കുന്ന രജിസ്റ്റര് നമ്പരുപയോഗിച്ച് എപ്പോഴും ഓണ്ലൈനായി സര്വകലാശാലയുടെ സേവനങ്ങളെ വിദ്യാര്ഥിക്ക് സമീപിക്കാം.
പുതിയ സംവിധാനം വരുന്നതോടെ സര്വകലാശാലകളില് പരീക്ഷാതീയതി പ്രഖ്യാപിക്കുമ്പോള് ഓരോ പേപ്പറിന്റെയും മൂല്യനിര്ണയം, ഫലപ്രഖ്യാപനം, പുനര്മൂല്യനിര്ണയം, സപ്ളിമെന്ററി പരീക്ഷ, അതിന്റെ ഫലപ്രഖ്യാപനം എന്നിവയുടെ തീയതികളും പ്രഖ്യാപിക്കും. നിശ്ചിത തീയതികളില്ത്തന്നെ ഫലം പ്രസിദ്ധീകരിക്കും.
ഇതോടെ സംസ്ഥാനത്തെ ഉന്നത വിദ്യാഭ്യാസ മേഖലയില് വലിയ മാറ്റമുണ്ടാക്കും. നിലവില് പല സമയങ്ങളിലാണ് പരീക്ഷകളും ഫലപ്രഖ്യാപനങ്ങളും നടക്കുന്നത്. ഇത് വിദ്യാര്ഥികള്ക്ക് വലിയ ബുദ്ധിമുട്ടുകള് സൃഷ്ടിക്കുന്നു. ഉപരിപഠന സാധ്യതകളെയും തൊഴില് അവസരങ്ങളെയും ബാധിക്കുന്നു. പുതിയ സംവിധാനഗത്താടെ ഇതിനെല്ലാം പരിഹാരമാകും.
കെല്ട്രോണുമായി ചേര്ന്ന് പദ്ധതിനടത്തിപ്പിന് പ്ളാറ്റ്ഫോം കണ്ടെത്താന് എംജി സര്വകലാശാലാ വൈസ് ചാന്സലര് ഡോ. ബാബു സെബാസ്റ്റ്യന് അധ്യക്ഷനായ സമിതിയെ നിയോഗിച്ചു. ടി വി മധു (എംജി സര്വകലാശാല), ഡോ. സി വിനോദ് ചന്ദ്രന് (കേരള സര്വകലാശാല), ഡോ. ഡേവിഡ് പീറ്റര് (കുസാറ്റ്) എന്നിവര് സമിതി അംഗങ്ങളായിരിക്കും. കെല്ട്രോണുമായി കൂടിയാലോചന നടത്തേണ്ടതും കരാറിന് കരട് മെമ്മോറാണ്ടം തയ്യാറാക്കേണ്ടതും ഈ സമിതിയാണ്.
സര്വകലാശാലകളിലെ ഭരണപരമായ വീഴ്ചകള് ഏറെ വിമര്ശത്തിന് ഇടയാക്കുന്നുണ്ട്. ലോക്കല് ഫണ്ട് ഓഡിറ്റ്, എജി എന്നിവ സര്വകലാശാലകളിലെ കുത്തഴിഞ്ഞ രീതി പരിഹരിക്കേണ്ടതിന്റെ ആവശ്യകത നിരവധിതവണ ചൂണ്ടിക്കാട്ടി. നിലവില് പ്രവേശനനടപടികള്ക്കുള്ള ഏകജാലക സംവിധാനം സര്വകലാശാലകളിലുണ്ട്്. എന്നാല്, പരീക്ഷാ നടത്തിപ്പ് വിദ്യാര്ഥികള്ക്ക് പരീക്ഷണമാണ്. ഇതിന് പരിഹാരമുണ്ടാകണമെന്ന് വിദ്യാഭ്യാസമന്ത്രി സി രവീന്ദ്രനാഥ് ഉന്നത വിദ്യാഭ്യാസവകുപ്പിനോട് നിര്ദേശിച്ചിട്ടുണ്ട്.
2018 ജൂണില് മുഴുവന് സര്വകലാശാലകളും പൂര്ണമായും ഏകജാലക സംവിധാനത്തിലേക്ക് മാറണമെന്നും നവംബറില് ആദ്യ സെമസ്റ്റര് ഫലം പ്രസിദ്ധീകരിക്കാനും ഉത്തരവിട്ടതായി ഉന്നത വിദ്യാഭ്യാസ ജോയിന്റ് സെക്രട്ടറി എം ജി രഞ്ജിത്കുമാര് അറിയിച്ചു.
https://www.facebook.com/Malayalivartha
