ഹാദിയ കേസില്‍ സുപ്രിംകോടതി വിധി തന്റെ വിജയമെന്ന് പിതാവ് അശോകന്‍. കേസില്‍ എന്‍.ഐ.എയുടെ തുടരന്വേഷണത്തിന് കോടതി അനുമതി നല്‍കിയത് കുടുംബത്തിന്റെ വിജയമായി കാണുന്നു. നിയമ പോരാട്ടത്തില്‍ ഇതുവരെ വിജയിച്ചു. ഹാദിയ പഠനം തുടരുന്നതില്‍ സന്തോഷമുണ്ട്. പഠനം മുടങ്ങിയതില്‍ തനിക്ക് ദുഖമുണ്ടായിരുന്നു. അത് കോടതി പരിഹരിച്ചെന്നും അശോകന്‍ പറഞ്ഞു. തനിക്ക് ഹാദിയയെ സന്ദര്‍ശിക്കാമെന്ന് കോടതി പറഞ്ഞെന്ന് ഷെഫിന്‍ ജഹാന് പറഞ്ഞ കാര്യം ചോദിച്ചപ്പോള്‍ വഴിയേ പോകുന്നവര്‍ക്കൊന്നും സന്ദര്‍ശിക്കാനൊക്കില്ലെന്ന് അശോകന്‍ മറുപടി നല്‍കി. സന്ദര്‍ശകര്‍ എന്ന് പറയുന്നത് മകള്‍ക്ക് വേണ്ടപ്പെട്ടവരാണ്. തമിഴ്‌നാട്ടില്‍ പഠിക്കാന്‍ പോകുന്നത് കൊണ്ട് മകളുടെ സുരക്ഷയില്‍ ആശങ്കയില്ല. മകളുടെ സുരക്ഷയ്ക്ക് ശക്തമായ ഇരുമ്പ് കവചമാണ് തീര്‍ത്തിരിക്കുന്നതെന്നും അശോകന്‍ ഡല്‍ഹിയില്‍ മാധ്യമങ്ങളോട് പറഞ്ഞു. കോടതി നന്‍മമാത്രമേ ചെയ്തിട്ടുളളൂ.

ഭര്‍ത്താവിനൊപ്പം പോകണമെന്നാണ് ആഗ്രഹമെന്ന് ഹാദിയ വ്യക്തമാക്കി. കൂട്ടുകാര്‍ക്കൊപ്പം പോകാനുള്ള അനുമതിയും കോടതി നല്‍കിയിട്ടുണ്ടെന്നാണ് അറിയുന്നത്. ഷെഫിന്‍ ജഹാനെ കാണാനായിട്ടില്ല. സേലത്ത് വെച്ച് കാണാനാകുമെന്ന് പ്രതീക്ഷിക്കുന്നു. തനിക്ക് പൂര്‍ണ സ്വാതന്ത്ര്യം ലഭിക്കുമെന്ന് പ്രതീക്ഷിക്കുന്നു. സുഹൃത്തുക്കളെ കാണാനാകുന്നതിലും കോളജില്‍ പോകാനാകുന്നതിലും സന്തോഷമുണ്ട്. കോടതി വിധിയിലും സന്തോഷമുണ്ടെന്നും ഹാദിയ പറഞ്ഞു. തീവ്രവാദിയെ കൊണ്ട് മകളെ കെട്ടിച്ചില്ലേയെന്ന് ഹാദിയയുടെ അമ്മ ചോദിച്ചു. തന്റെ വീട് ചേര്‍ത്തലയില്‍ ആണെന്നും അതിനടുത്തെങ്ങും മുസ്്‌ലിം കുടുംബങ്ങള്‍ ഇല്ലെന്നും തങ്ങളുടെ പരിചയത്തില്‍ ആര്‍ക്കും മുസ്ലിം സമുദായവുമായി ബന്ധമില്ല. ഇത്തരം ഒരു ചതി പറ്റുമെന്ന് പ്രതീക്ഷിച്ചിരുന്നില്ല. മകളുടെ മാനസികാവസ്ഥ ശരിയല്ലെന്നും അവര്‍ ഡല്‍ഹി വിമാനത്താവളത്തില്‍ പറഞ്ഞു. 

ഹാദിയയുടെ വിവാഹം റദ്ദാക്കിയ ഹൈക്കോടതി വിധി സുപ്രിംകോടതി സ്‌റ്റേ ചെയ്തില്ല. അതിനര്‍ത്ഥം കോടതിക്ക് ഈ വിവാഹത്തില്‍ സംശയം ഉള്ളതിനാലാണെന്നും അശോകന്‍ പറഞ്ഞു. താന്‍ വീട്ടു തടങ്കലിലായിരുന്നെന്ന ഹാദിയയുടെ വാദം ശരിയല്ലെന്നും അശോകന്‍ വ്യക്തമാക്കി. നാല് പൊലീസുകാരുടെ കാവലിലായിരുന്നു ഹാദിയ. വീടിന് പുറത്തും കാവലുണ്ടായിരുന്നു. മകളോട് വീടിന് പുറത്തിറങ്ങണമെന്നും പാര്‍ക്കിലോ മറ്റോ പോകണമെന്നും പലവട്ടം ആവശ്യപ്പെട്ടെങ്കിലും അവള്‍ പോയില്ലെന്നും അശോകന്‍ പറഞ്ഞു. രാവിലെ ഹാദിയ ഡല്‍ഹി വിമാനത്താവളത്തില്‍ നിന്ന് സുരക്ഷാ ജീവനക്കാരുടെ അകമ്പടിയോടെ സേലത്തേക്ക് പോയി. മാതാപിതാക്കള്‍ കൊച്ചിയിലേക്കും.