പോണ്ടിച്ചേരിയില് കൃഷിഭൂമിയുണ്ടെന്ന് സുരേഷ് ഗോപി ചോദ്യം ചെയ്യല് വേളയില് അറിയിച്ചു; വാടകവീടിന്റെ രേഖകളും ഹാജരാക്കി
ആഢംബരവാഹനത്തിന്റെ നികുതിവെട്ടിച്ച കേസില് സുരേഷ്ഗോപി എം.പിയെ ക്രൈംബ്രാഞ്ച് ചോദ്യം ചെയ്തു. വ്യാജരേഖകളുണ്ടാക്കി പോണ്ടിച്ചേരിയില് വാഹനം റജിസ്റ്റര് ചെയ്തെന്ന് കണ്ടെത്തിയതിനെ തുടര്ന്നായിരുന്നു ചോദ്യം ചെയ്യല്. പോണ്ടിച്ചേരിയില് കൃഷിഭൂമിയുണ്ടെന്ന് സുരേഷ് ഗോപി ചോദ്യം ചെയ്യല് വേളയില് അറിയിച്ചു. സഹോദരങ്ങള്ക്കും കൃഷിഭൂമിയുണ്ട്. അവിടേക്ക് പോകാനായി വാടകയ്ക്ക് എടുത്ത വിലാസത്തിലാണ് വാഹനങ്ങള് രജിസ്റ്റര് ചെയ്തത്. ഇതിന്റെ വാടക ചീട്ട് ഉള്പ്പെടെ ഹാജരാക്കി. ചോദ്യം ചെയ്യല് പൂര്ത്തിയായതായി ഐ.ജി ശ്രീജിത്ത് പറഞ്ഞു. രേഖകള് പരിശോധിച്ച ശേഷം സംശയം ഉണ്ടെങ്കില് വീണ്ടും വിളിക്കുമെന്ന് പൊലീസ് അറിയിച്ചു.
ജാമ്യമില്ലാ വകുപ്പ്പ്രകാരം കേസ് എടുത്തതിനാല് സുരേഷ് ഗോപി ഹൈക്കോടതിയില് മുന്കൂര് ജാമ്യം നല്കിയിരുന്നു. മൂന്നാഴ്ചത്തേക്ക് സുരേഷ് ഗോപിയെ അറസ്റ്റ് ചെയ്യരുതെന്ന് ഹൈക്കോടതി ക്രൈംബ്രാഞ്ചിന് നിര്ദ്ദേശം നല്കിയിരുന്നു. ഇന്ന് ക്രൈംബ്രാഞ്ചിന് മുന്നില് ഹാജരാകണമെന്നും കോടതി സുരേഷ് ഗോപിക്ക് നിര്ദ്ദേശം നല്കിയിരുന്നു. അന്വേഷണ സംഘത്തോട് സഹകരിക്കണം. ആവശ്യമെങ്കില് ക്രിമിനല് നടപടിച്ചട്ടത്തിലെ വ്യവസ്ഥപ്രകാരം സുരേഷ് ഗോപിക്ക് നോട്ടിസ് നല്കിയ ശേഷം വിളിച്ചുവരുത്തണമെന്നും കോടതി പറഞ്ഞിരുന്നു. ക്രിസ്മസ് അവധിക്ക് ശേഷം ഹൈക്കോടതി ജാമ്യാപേക്ഷ പരിഗണിക്കും. കേന്ദ്ര, സംസ്ഥാന മോട്ടോര് വാഹനച്ചട്ടങ്ങള് സുരേഷ് ഗോപി ലംഘിച്ചതായി സര്ക്കാര് അഭിഭാഷകന് ആരോപിച്ചു.
സമാനമായ കേസില് അമലാപോളും ഫഹദ് ഫാസിലും അന്വേഷണം നേരിടുകയാണ്. സുരേഷ് ഗോപിക്ക് പിന്നാലെ അമലയും മുന്കൂര് ജാമ്യത്തിനായി ഹൈക്കോടതിയെ സമീപിച്ചിരുന്നു. താരങ്ങള്ക്ക് കേസുകളില് പ്രത്യേക അനുകൂല്യം നല്കരുതെന്ന് അമലയുടെ ജാമ്യം പരിഗണിക്കവേ കോടതി വ്യക്തമാക്കിയിരുന്നു. ഫഹദ് 17 ലക്ഷം പിഴയടച്ചെങ്കിലും നിയമനടപടികളില് നിന്ന് ഒഴിവാക്കിയിട്ടില്ല. താരവും ജാമ്യാപേക്ഷ നല്കിയിട്ടുണ്ട്. കോടതി വിധി പ്രസ്താവിച്ചിട്ടില്ല.
https://www.facebook.com/Malayalivartha
