സി.പി.എം അനുഭാവിയും കൈരളി ചാനലുമായി അടുത്തബന്ധം പുലര്‍ത്തിയിരുന്നയാളുമായ ഡബ്ബിംഗ് ആര്‍ടിസ്റ്റ് സി.പി.ഐ മെമ്പര്‍ഷിപ്പ് എടുത്ത്. സി.പി.ഐ സംസ്ഥാന സെക്രട്ടറി കാനംരാജേന്ദ്രനെ എം.എന്‍ സ്മാരകത്തിലെത്തി സന്ദര്‍ശിച്ച ശേഷമായിരുന്നു അംഗത്വമെടുത്തത്. സി.പി.എം നേതാവ് ടി.എന്‍ സീമയുമായി അടുത്തബന്ധം പുലര്‍ത്തിയിരുന്ന ഭാഗ്യലക്ഷ്മി കഴിഞ്ഞ നിയമസഭാ തെരഞ്ഞെടുപ്പ് വേളയില്‍ ടി.എന്‍ സീമയ്ക്ക് വേണ്ടി വട്ടിയൂര്‍ക്കാവ് മണ്ഡലത്തില്‍ അഹോരാത്രം പണിയെടുത്തിരുന്നു. സി.പി.എമ്മിന്റെ പല പരിപാടികളിലും ഭാഗ്യലക്ഷ്മി സ്ഥിരം സാനിധ്യമായിരുന്നു. എല്‍.ഡി.എഫ് സര്‍ക്കാര്‍ അധികാരത്തില്‍ വന്ന ശേഷം സി.പി.എമ്മിന്റെ വടക്കാഞ്ചേരിയിലെ ലോക്കല്‍ നേതാവ് ജയന്ദനെതിരായ പീഡനക്കേസ് ഭാഗ്യലക്ഷ്മി വഴി പുറത്ത് വന്നതോടെയാണ് പാര്‍ട്ടിയുമായി അകന്നത്.

ജയന്ദന്‍ പീഡിപ്പിച്ചെന്ന ആരോപണവുമായി യുവതിയും ഭര്‍ത്താവും ഭാഗ്യലക്ഷ്മിയെയാണ് സമീപിച്ചത്. ഭാഗ്യലക്ഷ്മി അവരെയും കൂട്ടി തിരുവനന്തപുരം പ്രസ്‌ക്ലബില്‍ വാര്‍ത്താസമ്മേളനം നടത്തിയിരുന്നു. അത് വലിയ കോളിളക്കമാണ് സൃഷ്ടിച്ചത്. മുഖ്യമന്ത്രി പിണറായി വിജയനെ നേരില്‍ കാണാന്‍ യുവതി അനുമതി തേടിയെങ്കിലും നല്‍കിയില്ല. അതിനെതിരെ ഭാഗ്യലക്ഷ്മി പരസ്യപ്രതികരണം നടത്തിയിരുന്നു. ഇതേത്തുടര്‍ന്ന് സി.പി.എം പ്രവര്‍ത്തര്‍ ഭാഗ്യലക്ഷ്മിക്കെതിരെ സമൂഹമാധ്യമങ്ങളിലൂടെ ആക്രമണം നടത്തി. തൃശൂരില്‍ ഒരു പരിപാടിക്കെത്തിയ ഭാഗ്യലക്ഷ്മിയെ വടക്കാഞ്ചേരി എം.എല്‍.എ അനില്‍ അക്കരെ സന്ദര്‍ശിച്ചിരുന്നു. അതോടെ ഭാഗ്യലക്ഷ്മിയും അനില്‍ അക്കരയും ഹോട്ടലിലെ അടച്ചിട്ടമുറിയില്‍ ചര്‍ച്ച നടത്തിയെന്ന് ദേശാഭിമാനിയില്‍ വാര്‍ത്ത വന്നു. ഇത് തന്നെ ഏറെ വേദനപ്പിച്ചെന്ന് ഭാഗ്യലക്ഷ്മി പറഞ്ഞിരുന്നു.

സി.പി.എമ്മില്‍ നിന്ന് ഇത്രയും എതിര്‍പ്പുകളും പ്രതിഷേധവും ഉയര്‍ന്നിട്ടും ടി.എന്‍ സീമ തന്നെ വിളിച്ചില്ലെന്നും അതില്‍ പരാതിയില്ലെന്നും ഭാഗ്യലക്ഷ്മി പറഞ്ഞിരുന്നു. കൈരളി ചാനലില്‍ ഭാഗ്യലക്ഷ്മി അതരിപ്പിച്ചിരുന്ന പരിപാടിയും നിര്‍ത്തിയിരുന്നു. പാര്‍ട്ടി ചാനലിലെ പരിപാടി കൊണ്ടല്ലേ നിങ്ങള്‍ ജീവിക്കുന്നതെന്ന് സമൂഹമാധ്യമങ്ങളിലൂടെ സി.പി.എം പ്രവര്‍ത്തകര്‍ ആക്രോശിച്ചതിനെ തുടര്‍ന്നായിരുന്നു ഇത്. പിന്നീട് നടി ആക്രമിക്കപ്പെട്ട സംഭവം നടന്നപ്പോഴും ഭാഗ്യലക്ഷ്മി ഇടപെട്ടിരുന്നു. അതിനെതിരെയും വിമര്‍ശനങ്ങളുണ്ടായി. ഇതോടെ പൊതുരംഗത്ത് നിന്ന് മാറി നിന്ന ഭാഗ്യലക്ഷമി. ഈ ആഴ്ചയാണ് സി.പി.ഐ അംഗത്വം എടുത്തത്. 

അടുത്തകാലത്തായി സി.പി.ഐ എടുത്ത നിലപാടുകളാണ് ഭാഗ്യലക്ഷ്മിയെ അവര്‍ക്കൊപ്പം പ്രവര്‍ത്തിക്കാന്‍ പ്രേരിപ്പിച്ചത്. മാത്രമല്ല സി.പി.ഐക്ക് മുന്‍നിരയില്‍ വനിതാ നേതാക്കളും കുറവാണ്. നടിയെ ആക്രമിക്കപ്പെട്ട സംഭവത്തിന് ശേഷം പല സിനിമാ സംഘടനകളും ഭാഗ്യലക്ഷ്മിക്കെതിരെ തിരിഞ്ഞിട്ടുണ്ട്. അവരെയൊക്കെ നേരിടണമെങ്കില്‍ രാഷ്്ട്രീയ പിന്തുണ വേണം. സി.പി.എമ്മുമായി അത്രരസത്തിലല്ലാത്തതിനാല്‍ സി.പി.ഐയെ സമീപിക്കുകയായിരുന്നു. പല പ്രശ്‌നങ്ങളിലും സി.പി.ഐ എടുത്ത നിലപാടുകള്‍ ഭാഗ്യലക്ഷ്മിക്ക് ഇഷ്ടമായി. ജനങ്ങള്‍ ആഗ്രഹിക്കുന്ന നിലപാടുകളാണ് തോമസ് ചാണ്ടി വിഷയത്തിലടക്കം സി.പി.ഐ സ്വീകരിച്ചത്.