70 ലക്ഷത്തിന്റെ ബെന്സ് ഒന്നരലക്ഷം നികുതിയടച്ചാണ് ഫഹദ് പോണ്ടിച്ചേരിയില് രജിസ്റ്റര് ചെയ്തത്; 17 ലക്ഷം താരം പിഴയടിച്ചിരുന്നു
ആഢംബര വാഹനം പോണ്ടിച്ചേരിയില് രജിസ്റ്റര് ചെയ്ത് നികുതി വെട്ടിച്ച കേസില് നടന് ഫഹദ് ഫാസിലിന് മുന്കൂര് ജാമ്യം. ആലപ്പുഴ ജില്ലാ സെക്ഷന് കോടതിയാണ് ജാമ്യം നല്കിയത്. കേസില് ചോദ്യം ചെയ്യാന് വ്യാഴാഴ്ച ഹാജരാകണമെന്ന് ആവശ്യപ്പെട്ട് ക്രൈംബ്രാഞ്ച് ഫഹദിന് നോട്ടീസ് നല്കിയിരുന്നു. ഷൂട്ടിംഗിന്റെ തിരക്ക് കാരണം എത്താന് പറ്റില്ലെന്ന് അഭിഭാഷകന് മുഖേന ഫഹദ് അറിയിച്ചിരുന്നു. അതിന് പിന്നാലെയാണ് ജാമ്യം ലഭിച്ചത്. പോണ്ടിച്ചേരിയിലെ വ്യാജമേല്വിലാസത്തില് വാഹനങ്ങള് റജിസ്റ്റര് ചെയ്ത് നികുതി വെട്ടിച്ചെന്നാണ് ഫഹദിനെതിരായ കേസ്. 17 ലക്ഷം രൂപ നികുതിയിനത്തില് സര്ക്കാരിന് നഷ്ടം വന്നെന്ന് അന്വേഷണത്തില് കണ്ടെത്തിയിരുന്നു. ഇതോടെ താരം പിഴയടച്ചെങ്കിലും നിയമനടപടികള് അവസാനിപ്പിച്ചിരുന്നില്ല.
പോണ്ടിച്ചേരിയിലേതെന്ന് പറഞ്ഞ് ഫഹദ് നല്കിയ വിലാസത്തില് മറ്റാരോ ആണ് താമസിക്കുന്നത്. താരം ആ ഭാഗത്തേക്ക് ചെന്നിട്ടില്ലെന്ന് പ്രദേശവാസികള് പറയുന്നു. സമാനമായ കേസില് നടി അമലാപോളിനും സുരേഷ് ഗോപിക്കും ക്രൈംബ്രാഞ്ച് നോട്ടീസ് നല്കിയിരുന്നു. സുരേഷ് ഗോപി ഇന്ന് ക്രൈംബ്രാഞ്ച് ഐ.ജിക്ക് മുന്പാകെ ഹാജരായി. അമാലാപോള് എത്തിയില്ല. ഹൈക്കോടതിയില് അമല മുന്കൂര് ജാമ്യാപേക്ഷ നല്കിയിട്ടുണ്ട്. ക്രിസ്മസ് അവധിക്ക് ശേഷമേ ഹര്ജി കോടതി പരിഗണിക്കൂ. ഫഹദും അമലയും ഓരോ കാര് വീതമാണ് റജിസ്റ്റര് ചെയ്തിരിക്കുന്നത് . പുതുച്ചേരിയിലെ വ്യാജമേല് വിലാസത്തിലാണിതെന്ന് അന്വേഷസംഘം കണ്ടെത്തിയിരുന്നു. മലയാളത്തിലെ പല താരങ്ങളും വലിയ ബിസിനസുകാരും പോണ്ടിച്ചേരിയില് വ്യാജവിലാസം ഉണ്ടാക്കി ആഢംബരവാഹനങ്ങള് രജിസ്റ്റര് ചെയ്യുന്നതായി മുമ്പും കണ്ടെത്തിയിരുന്നെങ്കിലും തുടര് നടപടികള് ഉണ്ടായിരുന്നില്ല.
70 ലക്ഷം രൂപ വിലയുളള ബെന്സ് കാര് ഒന്നരലക്ഷം രൂപ നികുതി അടച്ചാണ് ഫഹദ് പോണ്ടിച്ചേരിയില് രജിസ്റ്റര് ചെയ്തത്. അമലാപോള് തന്റെ ബി.എം.ഡബ്ല്യൂ പോണ്ടിച്ചേരിയിലാണ് രജിസ്റ്റര് ചെയ്തതെന്നും കര്ണാടകയിലും തമിഴ്നാട്ടിലുമാണ് വാഹനം ഓടുന്നതെന്നും വ്യക്തമാക്കി. എന്നാല് ചില ചാനലുകള് നടത്തിയ അന്വേഷണത്തില് താരത്തിന്റെ ഇടപ്പള്ളിയിലെ വീട്ടില് കാര് പാര്ക്ക് ചെയ്തിരുന്നതായി കണ്ടെത്തിയിരുന്നു.
https://www.facebook.com/Malayalivartha
