പള്ളികളില്‍ വീഞ്ഞ്‌ വിതരണം ചെയ്യുന്നത്‌ ആചാരത്തിന്റെ ഭാഗമാണെന്ന്‌ കെപിസിസി പ്രസിഡന്റ്‌ വിഎം സുധീരന്‍. നൂറ്റാണ്ടുകളായി ക്രൈസ്‌തവ സഭ തുടര്‍ന്നു വരുന്ന പാരമ്പര്യമാണ്‌. അത്‌ നിരോധിക്കണം എന്ന്‌ പറയുന്നത്‌ ശരിയാണോ?
മദ്യം നിരോധിക്കണമെങ്കില്‍ വീഞ്ഞും നിരോധിക്കണമെന്ന എസ്‌എന്‍ഡിപി ജനറല്‍ സെക്രട്ടറി വെള്ളാപ്പള്ളി നടേശന്റെ ആവശ്യത്തോട്‌ പ്രതികരിക്കുകയായിരുന്നു സുധീരന്‍. വീഞ്ഞ്‌ നിരോധിക്കുന്നത്‌ സംബന്ധിക്കുന്ന കാര്യം തീരുമാനിക്കുന്നത്‌ ക്രൈസ്‌തവ സഭകളാണ്‌. അതില്‍ ബാഹ്യമായ ഇടപെടല്‍ നടത്തുന്നത്‌ ശരിയല്ലെന്നും സുധീരന്‍ കൂട്ടിച്ചേര്‍ത്തു.
ബാര്‍ വിഷയത്തില്‍ താന്‍ വിമര്‍ശിച്ചത്‌ എജിയെ മാത്രമാണെന്ന്‌ സുധീരന്‍ പറഞ്ഞു. എക്‌സൈസ്‌ മന്ത്രിയെ താന്‍ വിമര്‍ശിച്ചിട്ടില്ല. മദ്യദുരന്തമുണ്ടാകാന്‍ സാധ്യതയുണ്ടെന്ന്‌ എക്‌സൈസ്‌ മന്ത്രിയെ നേരത്തെ അറിയിച്ചിരുന്നു. കോടതിവിധിയെക്കുറിച്ച്‌ താന്‍ പറഞ്ഞത്‌ തെറ്റായി വ്യാഖ്യാനിക്കപ്പെട്ടുവെന്നും ഇതുമായി ബന്ധപ്പെട്ട്‌ യാതൊരു വിവാദത്തിനും താല്‌പര്യമില്ലെന്നും സുധീരന്‍ പറഞ്ഞു.
മദ്യദുരന്തം ഒഴിവാക്കാന്‍ നടപടിയെടുത്ത സര്‍ക്കാരിനെ അഭിനന്ദിക്കുന്നു. മദ്യനിരോധനം മൂലം മദ്യദുരന്തമുണ്ടായെന്നു വരുത്തിത്തീര്‍ക്കാനുള്ള ശ്രമം ഏതു കോണില്‍ നിന്നും പ്രതീക്ഷിക്കാം. അതിനാല്‍ സര്‍ക്കാര്‍ തുടര്‍ന്നും ജാഗ്രത പാലിക്കണമെന്നും സുധീരന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha