312 ബാറുകളും പൂട്ടാന്‍ ബുധനാഴ്‌ചത്തെ മന്ത്രി സഭ തീരുമാനമെടുക്കും; ബാറുകള്‍ ബിയര്‍പാര്‍ലറും വൈന്‍ പാര്‍ലറുമാക്കും
സംസ്ഥാനത്ത് അവശേഷിക്കുന്ന 312 ബാറുകള്‍ കൂടി പൂട്ടാന്‍ ബുധനാഴ്‌ചത്തെ മന്ത്രിസഭാ യോഗം തീരുമാനമെടുക്കും. കഴിഞ്ഞ യുഡിഎഫ്‌ യോഗത്തില്‍ എടുത്ത തീരുമാനം എത്രയും പെട്ടെന്ന്‌ നടപ്പാക്കാനാണ്‌ മുഖ്യമന്ത്രിയുടെ ശ്രമം. ഈ അനുകൂല സാഹചര്യം മുതലെടുത്ത്‌ ബാക്കിയുള്ള ബാറുകള്‍ കൂടി പൂട്ടാനുള്ള തീവ്രശ്രമത്തിലാണ്‌ മുഖ്യമന്ത്രി.
ഇതിനിടെ ബാര്‍ നഷ്‌ടപ്പെട്ട ടു സ്റ്റാര്‍ ത്രീ സ്റ്റാര്‍ ഹോട്ടലുകളിലെ ബാറുകള്‍ ബിയര്‍ പാര്‍ലറും വൈന്‍ പാര്‍ലറുമാക്കാനുള്ള അണിയറ ശ്രമങ്ങളും നടക്കുന്നുണ്ട്‌. ബാറുകളെ ബിയര്‍ പാര്‍ലറും വൈന്‍ പാര്‍ലറുമാക്കാനുള്ള എക്‌സൈസ്‌ കമ്മീഷറുടെ തീരുമാനത്തെ വകുപ്പ്‌ സെക്രട്ടറി അംഗീകരിച്ചിട്ടില്ല. ഈ വിഷയവും മന്ത്രിസഭ ചര്‍ച്ച ചെയ്യും.
മദ്യാസക്തിയുള്ളവര്‍ക്ക്‌ സാധനം കിട്ടാതെ വരുമ്പോള്‍ അല്‍പ്പം കിക്കാകാനുള്ള വിദ്യയാകും ഈ ബിയര്‍ വൈന്‍ പാര്‍ലറുകള്‍. സാധാരണക്കാരായ കുടിയന്മാര്‍ക്ക്‌ ഫൈവ്‌ സ്റ്റാര്‍ ഹോട്ടലുകളില്‍ പോയി കുടിക്കാനുള്ള പണമില്ല. അപ്പോള്‍ അവര്‍ ഈ ബിയര്‍ പാര്‍ലറെ തന്നെ ആശ്രയിക്കും. വൈനിലും ബിയറിലും അല്‍പസ്വല്‍പം പൊടിയും കൂടി തൂറ്റി സാധാരണക്കാരെ കുളിപ്പിച്ച്‌ കിടത്താനുള്ള വിദ്യയൊക്കെ ബാറുകാര്‍ക്കറിയാം.
അതേസമയം ത്രീ സ്റ്റാര്‍ ഹോട്ടലുകളിലെ ബാറുകള്‍ക്ക്‌ പൂട്ട്‌ വീഴുമ്പോള്‍ അത്‌ ടൂറിസത്തേയും ബാധിക്കും. ഇത്തരം ഹോട്ടലുകളിലാണ്‌ സാധാരണ സെമിനാറുകളും കോണ്‍ഫറന്‍സുകളും നടക്കുന്നത്‌. ഹോട്ടലുകളില്‍ നിന്നും ബാറുകള്‍ മായുന്നതോടെ പലരും ഇത്തരം പരിപാടികള്‍ ക്യാന്‍സല്‍ ചെയ്യുകയാണ്‌.
ഇതിനിടെ 750 ബാറുകള്‍ പൂട്ടുമ്പോള്‍ ഈ ഹോട്ടലുകളിലെ ഭക്ഷണത്തിന്റെ ഗുണനിലവാരവും നഷ്‌ടപ്പെടുന്നു. ബാറില്‍ നിന്നുള്ള ലാഭം കൊണ്ടാണ്‌ നഷ്‌ടത്തിലോടുന്ന ഇത്തരം റെസ്റ്റേറന്റുകളെ കൊണ്ടു പോകുന്നത്. നല്ല ഭക്ഷണം കൊടുത്താല്‍ മാത്രമേ നല്ല കുടിയന്മാരെ കിട്ടുകയുള്ളൂ. അങ്ങനെ ഭക്ഷണത്തിലെ നഷ്‌ടം കുടിയില്‍ തീര്‍ക്കുന്നു.
മദ്യത്തിന്റെ ലഭ്യത കുറയുന്നതോടെ ആ സ്ഥാനം കൈയ്യേറാന്‍ ലഹരി മാഫിയയും തയ്യാറായി നില്‍ക്കുകയാണ്‌. രഹസ്യമായി മയക്കു മരുന്നുകള്‍ എവിടേയും കിട്ടുന്ന അവസ്ഥയിലേക്കാണ്‌ അവര്‍ കാര്യങ്ങള്‍ കൊണ്ടു പോകുന്നത്.
അതേസമയം മദ്യ നിരോധനത്തില്‍ ജനങ്ങളുടെ ഉറച്ച പിന്തുണയാണ്‌ സര്‍ക്കാരിന്‌ ലഭിക്കുന്നത്‌. വി.എം. സുധീരന്റെ ധീരമായ നിലപാടിന്‌ മുഖ്യമന്ത്രി വഴിത്തിരിവായത്‌ ജനങ്ങള്‍ ഇരു കൈയ്യും നീട്ടി സ്വീകരിച്ചു. ഉമ്മന്‍ ചാണ്ടിയുടേയും സുധീരന്റേയും ഇമേജ്‌ പതിന്മടങ്ങ്‌ കൂടുകയും ചെയ്‌തു. ബാര്‍ കാര്യത്തില്‍ ഒരടി പ്രതീക്ഷിച്ച പ്രതിപക്ഷത്തിനും ഷോക്കായി.
ഇന്നത്തെ കോടതി വിധിയും സുധീരന്റെ ശ്രമങ്ങള്‍ക്ക്‌ കരുത്തു പകര്‍ന്നു. കോടതി വിധി ബാറുകാര്‍ക്ക്‌ അനുകൂലമായാല്‍ സര്‍ക്കാര്‍ മലക്കം മറിഞ്ഞേനെ. എന്നാല്‍ തത്‌കാലം ഇടപെടില്ലെന്ന്‌ കേടതി വ്യക്തമാക്കി.
എന്തായാലും മദ്യ നിരോധനത്തിന്റെ ഭാവിയെപ്പറ്റി ജനങ്ങള്‍ക്ക്‌ രണ്ടഭിപ്രായമുണ്ട്‌. മാന്യന്മാരായ കുടിയന്മാര്‍ മദ്യത്തിന്‌ അലഞ്ഞ്‌ നടക്കാതെ വീട്ടിലെത്തും. വാഹനാപകടങ്ങള്‍ കുറയും. എന്നാല്‍ സാധാരണക്കാരായ കുടിയന്മാര്‍ പെട്ടിക്കടകള്‍ തോറും കയറിയിറങ്ങും. ബാര്‍ മുതലാളിമാര്‍ പൂട്ടിക്കെട്ടുമ്പോള്‍ സര്‍ക്കാര്‍ മുതലാളിയുടെ കീഴിലുള്ള ബിബറേജസ്‌ വെന്നിക്കൊടി പാറിക്കും തീര്‍ച്ച.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
