കേരള ഗവര്‍ണര്‍ ഷീല ദീക്ഷിത്‌ രാജിവച്ചു. മിസോറാമിലേക്ക്‌ ഷീല ദീക്ഷിതിനെ സ്ഥലം മാറ്റി നിര്‍ദ്ദേശം വന്നപ്പേള്‍ ഓണം വരെ തുടരണമെന്നായിരുന്നു ഷീലയുടെ ആവശ്യം. ഇത്‌ തത്വത്തില്‍ അംഗീകരിച്ചിരുന്നതുമാണ്‌. എന്നാല്‍ ഇന്നലെ ന്യൂഡല്‍ഹിയില്‍ കേന്ദ്ര ആഭ്യന്തരമന്ത്രി രാജ്‌നാഥ്‌ സിങ്ങിനെയും അതിനു പിന്നാലെ രാഷ്‌ട്രപതി പ്രണബ്‌ മുഖര്‍ജിയെയും കണ്ടതിനുശേഷമാണ്‌ രാജി പ്രഖ്യാപനം ഉണ്ടായത്‌. ആറുമാസം മുന്‍പാണ്‌ മുന്‍ ഡല്‍ഹി മുഖ്യമന്ത്രിയായ ഷീല ദീക്ഷിതിനെ കേരളാ ഗവര്‍ണറായി നിയമിച്ചത്‌.
നേരത്തെ മിസോറാം ഗവര്‍ണറായിരുന്ന വക്കം പുരുഷോത്തമന്‍ നാഗാലാന്‍ഡിലേക്ക്‌ സ്ഥലം മാറ്റിയതിനെ തുടര്‍ന്നു രാജിവച്ചിരുന്നു. മുന്‍ യുപിഎ സര്‍ക്കാരിന്റെ കാലത്ത്‌ നിയമിക്കപ്പെട്ട പശ്ചിമബംഗാള്‍ ഗവര്‍ണര്‍ എം.കെ.നാരായണന്‍, ഗോവ ഗവര്‍ണര്‍ ബി.വി വാഞ്ചു തുടങ്ങിയവരും പുതിയ സര്‍ക്കാര്‍ കേന്ദ്രത്തില്‍ അധികാരത്തിലെത്തിയശേഷം സ്ഥാനമൊഴിഞ്ഞിരുന്നു.
ശങ്കരനാരായണന്‍ രാജിവെച്ച ഒഴിവിലേക്കുള്‍പ്പെടെ നാലു സംസ്ഥാനങ്ങളിലേക്കുള്ള ഗവര്‍ണര്‍മാരുടെ പേരുകള്‍ കേന്ദ്ര സര്‍ക്കാര്‍ നിര്‍ദേശിച്ചിട്ടുണ്ട്‌. മഹാരാഷ്‌ട്ര, രാജസ്ഥാന്‍, കര്‍ണാടക, ഗോവ എന്നീ സംസ്ഥാനങ്ങളിലേക്കുള്ള പുതിയ ഗവര്‍ണര്‍മാരുടെ പേരുകളാണ്‌ കേന്ദ്ര സര്‍ക്കാര്‍ രാഷ്‌ട്രപതിയെ അറിയിച്ചത്‌.

മുന്‍ യുപി മുഖ്യമന്ത്രി കല്യാണ്‍ സിംഗിനെ രാജസ്ഥാനിലേക്കും ഗുജറാത്ത്‌ അസംബ്ലി സ്‌പീക്കര്‍ വാജുഭായി വാലയെ കര്‍ണാടകയിലേക്കും മുതിര്‍ന്ന ബിജെപി നേതാവ്‌ വിദ്യാസാഗര്‍ റോയിയെ മഹാരാഷ്‌ട്രയിലേക്കും മുന്‍ ബിജെപി മഹിളാ മോര്‍ച്ചാ പ്രസിഡന്റ്‌ മൃദുല സിംഹയെ ഗോവയിലേക്കുമാണ്‌ നിര്‍ദേശിച്ചിരിക്കുന്നത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha