സേഫ്‌ കേരള പദ്ധതിയുടെ ഭാഗമായി ആരോഗ്യവകുപ്പു നടത്തിയ പരിശോധനയില്‍ വ്യാപക ക്രമക്കേടുകള്‍ കണ്ടെത്തി. ലാബുകള്‍, എക്‌സ്‌ റേ-സ്‌കാനിങ്‌ സെന്ററുകള്‍, ഡന്റല്‍ ക്ലിനിക്കുകള്‍ എന്നിവിടങ്ങളിലാണ്‌ പരിശോധന നടത്തിയത്‌. ആകെ 4278 സ്ഥാപനങ്ങളിലാണ്‌ റെയ്‌ഡ്‌ നടത്തിയത്‌. ഇതില്‍ 1342 എണ്ണം ലൈസന്‍സില്ലാതെ പ്രവര്‍ത്തിക്കുന്നവയാണ്‌. 120 ലാബുകള്‍ പൂട്ടി. 1121 ലാബുകള്‍ക്ക്‌ നോട്ടീസ്‌ നല്‍കി. 2000 ത്തോളം ലാബുകള്‍ പിഴ ചുമത്തിയിട്ടുണ്ട്‌. ലാബോറട്ടറിയിലും എക്‌സ്‌റേ യൂണിറ്റുകളിലും പ്രവര്‍ത്തിക്കുന്ന സ്റ്റാഫുകള്‍ക്ക്‌ നിശ്ചിത യോഗ്യതയില്ലെന്നും കണ്ടെത്തിയിട്ടുണ്ട്‌. മാലിന്യസംസ്‌കരണത്തിന്‌ സൗകര്യമില്ലാത്ത ലാബുകളും അണുവിമുക്തി വരുത്താത്ത ഉപകരണങ്ങള്‍ ഉപയോഗിക്കുന്ന ലാബുകളും കണ്ടെത്തിയിട്ടുണ്ട്‌. ഈ ലാബുകള്‍ക്ക്‌ ആരോഗ്യവകുപ്പ്‌ നോട്ടീസ്‌ അയച്ചു.
കോട്ടയം ജില്ലയിലെ ചങ്ങനാശേരിയില്‍ മരുന്നുകളും മറ്റും സൂക്ഷിക്കേണ്ട ഫ്രിജില്‍ മീന്‍ വച്ചിരിക്കുന്നതു കണ്ടെത്തി.
കോട്ടയം ജില്ലയില്‍ 11 ലബോറട്ടറികള്‍ അടച്ചുപൂട്ടി. 243 സ്‌ഥാപനങ്ങളില്‍ നടത്തിയ പരിശോധനയില്‍ പ്രശ്‌നങ്ങള്‍ കണ്ടെത്തിയ 98 സക്കഥാപനങ്ങള്‍ക്കു നോട്ടീസ്‌ നല്‍കി. കാലാവധി കഴിഞ്ഞ മരുന്നുകള്‍ ഉപയോഗിക്കുന്ന ലാബും ഉപയോഗിച്ച സിറിഞ്ചുകള്‍ വീണ്ടും ഉപയോഗിക്കുന്ന ലാബും കാഞ്ഞിരപ്പള്ളിയില്‍ കണ്ടെത്തി.
കൊല്ലം ജില്ലയില്‍ അടിസ്‌ഥാന സൗകര്യങ്ങള്‍ ഇല്ലാത്ത 10 സ്‌ഥാപനങ്ങള്‍ താല്‍ക്കാലികമായി അടച്ചുപൂട്ടാന്‍ നിര്‍ദേശം നല്‍കി.
തൃശൂര്‍ ജില്ലയില്‍ മാനദണ്ഡങ്ങള്‍ പാലിക്കാത്ത ഏഴു സ്‌ഥാപനങ്ങള്‍ പൂട്ടി. 82 സ്‌ഥാപനങ്ങള്‍ക്കു നോട്ടീസ്‌ നല്‍കി. മൂന്നു സ്‌ഥാപനങ്ങളില്‍ നിന്നു പിഴ ഈടാക്കി. 38 സ്‌ഥാപനങ്ങള്‍ക്കു ലൈസന്‍സ്‌ ഇല്ലെന്നും കണ്ടെത്തി.
വയനാട്‌ ജില്ലയില്‍ 128 ലാബുകളില്‍ പരിശോധന നടത്തിയപ്പോള്‍ പലതും മതിയായ നിലവാരമില്ലാതെയാണു പ്രവര്‍ത്തിക്കുന്നതെന്ന്‌ കണ്ടെത്തി. 45 സ്‌ഥാപനങ്ങള്‍ക്കു നോട്ടീസ്‌ നല്‍കി. പത്തെണ്ണം പൂട്ടിച്ചു. എറണാകുളം ജില്ലയില്‍ തീരെ നിലവാരമില്ലാത്ത 11 സ്വകാര്യലാബുകള്‍ അടച്ചുപൂട്ടി.
കോഴിക്കോട്‌ ജില്ലയില്‍ 240 ലാബുകള്‍ പരിശോധിച്ചപ്പോള്‍ ലൈസന്‍സ്‌ ഇല്ലാത്തതും മാര്‍ഗനിര്‍ദേശങ്ങള്‍ പാലിക്കാത്തതുമായ 15 എണ്ണം അടച്ചുപൂട്ടി. 90 സ്‌ഥാപനങ്ങള്‍ക്കു നോട്ടീസ്‌ നല്‍കി.
മലപ്പുറം ജില്ലയിലെ രണ്ടു ലബോറട്ടറികള്‍ അടച്ചു. ആലപ്പുഴ ജില്ലയില്‍ അപാകതകള്‍ കണ്ടെത്തിയ 133 സ്‌ഥാപനങ്ങള്‍ക്കു നോട്ടീസ്‌ നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha