പാര്‍ട്ടി സജീവ പ്രവര്‍ത്തകരല്ലാത്ത സുരേഷ് ഗോപി, അല്‍ഫോണ്‍സ് കണ്ണന്താനം, രാജീവ് ചന്ദ്രശേഖരന്‍ എന്നിവര്‍ക്ക് നരേന്ദ്ര മോഡി രാജ്യസഭ സീറ്റ് നല്‍കിയിരുന്നു. എന്നാല്‍ അവസാനം പാര്‍ട്ടിക്ക് വേണ്ടി കഷ്ടപ്പെട്ട ഒരാള്‍ക്ക് രാജ്യസഭാ സ്ഥാനം നല്‍കിയിരിക്കുകയാണ്. ബിജെപി നേതാവ് വി.മുരളീധരന്‍ രാജ്യസഭാ സ്ഥാനാര്‍ത്ഥിയാകും. മഹാരാഷ്ട്രയില്‍ നിന്നാണ് മുരളീധരന്‍ മല്‍സരിക്കുക. കര്‍ണാടകയില്‍ നിന്ന് രാജീവ് ചന്ദ്രശേഖരന്‍ വീണ്ടും മല്‍സരിക്കും.

18 രാജ്യസഭാ സ്ഥാനാര്‍ത്ഥികളുടെ പട്ടികയാണ് ബിജെപി പ്രഖ്യാപിച്ചത്. തുഷാര്‍ വെള്ളാപ്പള്ളിയെ തള്ളിയാണ് മുരളീധരനെ ബിജെപി ദേശീയ നേതൃത്വം തിരഞ്ഞെടുത്തത്. തുഷാറിനെ എംപിയാക്കുമെന്ന് ബിജെപി ദേശീയ നേതൃത്വം സൂചന നല്‍കിയിരുന്നു. എന്നാല്‍ ഇതിനെതിരെ കേരളത്തിലെ ബിജെപിക്കാര്‍ ശക്തമായി രംഗത്തുവന്നു. തുഷാറിനെ എംപിയാക്കിയാല്‍ നായര്‍ വോട്ടുകള്‍ പാര്‍ട്ടിയില്‍ നിന്ന് അകലുമെന്ന് ഇവര്‍ നേതൃത്വത്തെ അറിയിച്ചു. ഇതോടെ തുഷാറിനെ എംപിയാക്കേണ്ടെന്ന നിലപാടിലേക്ക് പാര്‍ട്ടി ദേശീയ അധ്യക്ഷന്‍ അമിത് ഷാ എത്തിച്ചേരുകയായിരുന്നു.

അതിനിടെ ബിഡിജെഎസ് ഇടഞ്ഞുനില്‍ക്കുന്നതു കൊണ്ട് ഞായറാഴ്ച ചെങ്ങന്നൂരില്‍ ചേരാനിരുന്ന എന്‍ഡിഎ യോഗം മാറ്റിവച്ചു.14 ന് ബിഡിജെഎസ് നേതൃയോഗം ചേരും. ഈ യോഗത്തിലായിരിക്കും ഭാവി കാര്യങ്ങള്‍ നിശ്ചയിക്കുക. രാജ്യസഭാംഗത്വം വാഗ്ദാനം ചെയ്ത് പറ്റിക്കുന്നുവെന്ന തോന്നലാണ് ബിഡിജെഎസിനെ അലട്ടുന്നത്. രാജ്യസഭയിലേക്ക് മല്‍സരിക്കാന്‍ നാമനിര്‍ദ്ദേക പത്രിക സമര്‍പ്പിക്കേണ്ടത് തിങ്കളാഴ്ചയാണെന്ന് ഇരിക്കെ തങ്ങള്‍ക്ക് സീറ്റ് ലഭിക്കുമോയെന്ന കാര്യത്തില്‍ ബിഡിജെഎസിന് കടുത്ത ആശങ്കയുണ്ട്. മുന്നണി വിടുമെന്ന് കടുപ്പിച്ചു പറയാന്‍ തുഷാര്‍ വെള്ളാപ്പള്ളിയെ പ്രേരിപ്പിച്ചതും ഈ ഘടകമാണ്.

രാജ്യസഭാ സീറ്റും മറ്റു പ്രതിനിധികള്‍ക്കു ബോര്‍ഡ്, കോര്‍പറേഷനുകളില്‍ പദവികളുമാണു ഘടകകക്ഷികള്‍ ആവശ്യപ്പെട്ടത്. കഴിഞ്ഞ ദിവസം രാജ്യസഭയിലേക്കുള്ള സ്ഥാനാര്‍ത്ഥികളെ ബിജെപി പ്രഖ്യാപിച്ചെങ്കിലും ബിഡിജെഎസിനെ തഴഞ്ഞു. ഘടകകക്ഷികളുടെ സ്ഥാനാര്‍ത്ഥി പട്ടിക പിന്നീടു പ്രഖ്യാപിക്കുമെന്നു കരുതിയെങ്കിലും ഫലമുണ്ടായില്ല.

ഇതോടെയാണ് പ്രശ്‌നം സങ്കീര്‍ണ്ണമായത്. ചെങ്ങന്നൂരില്‍ ബിഡിജെഎസിനും ഘടക കക്ഷികള്‍ക്കും സ്വാധീനം ചെലുത്താന്‍ കഴിയുമെന്നതിനാല്‍ പ്രശ്‌നം പരിഹരിക്കാന്‍ ശ്രമം നടക്കുന്നുണ്ട്. ബിഡിജെഎസ് ഭാരവാഹികളുമായി കഴിഞ്ഞദിവസം തിരുവനന്തപുരത്ത് ബിജെപി ദേശീയ നേതാവ് ബി.എല്‍.സന്തോഷ് കൂടിക്കാഴ്ച നടത്തിയിരുന്നു. അതിനിടെ ബിഡിജെഎസ് ഇപ്പോഴും എന്‍ഡിഎയുടെ ഘടക കക്ഷിയാണെന്നും നേതൃത്വ യോഗങ്ങളില്‍ പങ്കെടുക്കുന്നുണ്ടെന്നും ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍ പറഞ്ഞു.

തുഷാര്‍ വെള്ളാപ്പള്ളിക്ക് രാജ്യസഭാ സീറ്റ് നല്‍കുന്നതിനെതിരെ ബിജെപി സംസ്ഥാന ഘടകത്തില്‍ കടുത്ത അതൃപ്തിയാണ് ഉണ്ടായത്. പാര്‍ട്ടിയിലെ മുതിര്‍ന്ന നേതാക്കളെ പോലും അവഗണിച്ച് പദവികള്‍ വീതം വെക്കുന്നതിനെതിരെ ഒരു വിഭാഗം നേതാക്കള്‍ കേന്ദ്രനേതൃത്വത്തിന് പരാതി നല്‍കി. വാഗ്ദാനം ചെയ്ത പദവികള്‍ നല്‍കിയില്ലെങ്കില്‍ മുന്നണിവിടുമെന്ന് ബിഡിജെഎസും അന്ത്യശാസനം നല്‍കി.

നാളികേര വികസന ബോര്‍ഡിലേക്ക് മുതിര്‍ന്ന നേതാവും സംസ്ഥാന വൈസ്പ്രസിഡന്റുമായ കെപി ശ്രീശന്റെ പേരായിരുന്നു സംസ്ഥാന നേതൃത്വം നല്‍കിയിരുന്നത്, റബ്ബര്‍ ബോര്‍ഡിലേക്ക് മുന്‍ അധ്യക്ഷന്‍ സികെ പത്മനാഭന്റെയും പേര് നിര്‍ദ്ദേശിച്ചിരുന്നു. എന്നാല്‍ കഴിഞ്ഞ നാല് വര്‍ഷം ഈ പദവികള്‍ കേന്ദ്രനേതൃത്വം ഒഴിച്ചിട്ടു. സ്‌പൈസസ് ബോര്‍ഡ് ചെയര്‍മാന്‍ പദവിയും ഒഴിഞ്ഞ് കിടക്കുകയാണ്. രണ്ട് എംപിമാരെയും ഒരു കേന്ദ്രമന്ത്രിയെയും കേരളത്തിന് നല്‍കിയെങ്കിലും പാര്‍ട്ടിയിലെ സജീവ നേതാക്കളെ അവഗണിച്ചതാണ് പ്രധാന പ്രശ്‌നം.

തുഷാര്‍വെള്ളാപ്പള്ളിക്ക് എംപി സ്ഥാനം നല്‍കിയാല്‍ പാര്‍ട്ടിവിടുമെന്ന ഭീഷണിയും ചില നേതാക്കള്‍ ഉന്നയിച്ചിട്ടുണ്ട്. പാര്‍ട്ടിയില്‍ ശക്തരായ ഈഴവ നേതാക്കള്‍ ഉണ്ടായിരുന്നിട്ടും ബിഡിജെഎസിനെ പരിഗണിക്കേണ്ടതില്ലെന്നും മുതിര്‍ന്ന നേതാക്കള്‍ അമിത് ഷായെ അറിയിച്ചു.

കേരളം ഉള്‍പ്പടെ 17 സംസ്ഥാനങ്ങളിലായി ഒഴിവുവന്ന 59 രാജ്യസഭാ സീറ്റുകളിലേക്കുള്ള തിരഞ്ഞെടുപ്പ് മാര്‍ച്ച് 23 ന് നടക്കും. 58 സീറ്റുകളില്‍ ഭൂരിപക്ഷം സീറ്റുകളും ഒഴിവ് വരുന്നത് ബിജെപി നേതൃത്വം നല്‍കുന്ന എന്‍ഡിഎ ഭരിക്കുന്ന സംസ്ഥാനങ്ങളിലാണ്. ഉത്തര്‍ പ്രദേശില്‍ നിന്നും പത്ത് രാജ്യസഭാ അംഗങ്ങളും മഹാരാഷ്ട്ര, ബിഹാര്‍ എന്നിവിടങ്ങളില്‍ നിന്നും ആറ് ഒഴിവുകളിലേയ്ക്കുമാണ് മല്‍സരം നടക്കുക. ബിജെപി ഭരിക്കുന്ന മധ്യപ്രദേശിലും തൃണമൂല്‍ കോണ്‍ഗ്രസ് ഭരിക്കുന്ന ബംഗാളിലും അഞ്ച് സീറ്റുകളിലേയ്ക്ക് വീതമാണ് മല്‍സരം. ബിജെപി ഭരിക്കുന്ന ഗുജറാത്തിലും കോണ്‍ഗ്രസ് ഭരിക്കുന്ന കര്‍ണാടകത്തിലും നാല് സീറ്റുകള്‍ വീതമാണ് ഒഴിയുന്നത്. തെലങ്കാന, ആന്ധ്രപ്രദേശ്, ഒഡിഷ, രാജസ്ഥാന്‍ എന്നിവിടങ്ങളില്‍ മൂന്ന് സീറ്റ് വീതമാണ് ഒഴിയുന്നത്.