തുഷാറിന് സീറ്റ് നഷ്ടപ്പെട്ടതോടെ വെള്ളാപ്പള്ളിയും സംഘവും ഇടഞ്ഞു; ചെങ്ങന്നൂരില് ശ്രീധരന്പിള്ളയ്ക്ക് വോട്ട് കുറയുമെന്ന് ഭീഷണി
ബി.ഡി.ജെ.എസ് നേതാവ് തുഷാര് വെള്ളാപ്പള്ളിക്ക് രാജ്യസഭാ സീറ്റ് നിഷേധിച്ചതോടെ വെള്ളാപ്പള്ളിയും ബി.ഡി.ജെ.എസും ഇടഞ്ഞു. ചെങ്ങന്നൂര് ഉപതെരഞ്ഞെടുപ്പില് ബി.ജെ.പിക്ക് വേണ്ടത്ര വോട്ട് കിട്ടില്ലെന്ന് വെള്ളാപ്പള്ളി നടേശന് പരസ്യമായി പ്രതികരിച്ചു. തുഷാറിന് നല്കാമെന്ന് പറഞ്ഞ സീറ്റ് മുന് സംസ്ഥാന പ്രസിഡന്റ് വി.മുരളീധരന് നല്കിയതാണ് ബി.ഡി.ജെ.എസിനെ ചൊടിപ്പിച്ചത്. അതേസമയം വി.മുരളീധരന്റെ സ്ഥാനാര്ത്ഥിത്വത്തെ വെള്ളാപ്പള്ളി സ്വാഗതവും ചെയ്തു. എസ്.എന്.ഡി.പി യോഗത്തിന് നിര്ണായക സ്വാധീനമുള്ള യൂണിയനാണ് ചെങ്ങന്നൂര്. കഴിഞ്ഞതവണ ബി.ജെ.പിക്കാര് തന്നെ ശ്രീധരന് പിള്ളയെ അവിടെ തഴയുകയായിരുന്നു.
പാര്ട്ടിക്കു ബി.ജെ.പി നനല്കിയ വാഗ്ദാനം പാലിക്കാത്തതില് ബിഡിജെഎസ് നിരാശരാണ്. ബോര്ഡ്, കോര്പ്പറേഷന് പദവികളാണ് ബി.ഡി.ജെ.എസ് ആവശ്യപ്പെട്ടത്. അത് നല്കാമെന്ന് പറഞ്ഞ് തുടങ്ങിയിട്ട് രണ്ട് വര്ഷം കഴിഞ്ഞു. ഇതോടെ തുഷാറും സംഘവും ഇടഞ്ഞു. വെള്ളാപ്പള്ളി പൂര്ണമായും എന്.ഡി.എ ബന്ധത്തില് നിന്ന് മാറി. തങ്ങളോട് ആലോചിക്കാതെ ചെങ്ങന്നൂരില് ശ്രീധരന്പിള്ളയെ സ്ഥാനാര്ത്ഥിയാക്കിയെന്നും ഇത് മുന്നണിമര്യാദയ്ക്ക് ചേര്ന്നതല്ലെന്നും വെള്ളാപ്പള്ളി തുറന്നടിച്ചിരുന്നു. ചെങ്ങന്നൂരില് സി.പി.എം ജയിക്കുമെന്നും അവര്ക്ക് പിന്തുണ നല്കുന്നെന്നും പറഞ്ഞിരുന്നു.
പിന്നാലെ ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരന് ബി.ഡി.ജെ.എസ് നേതാക്കളുമായി ചര്ച്ചനടത്തി. പ്രശ്നങ്ങള് പരിഹരിച്ചിരുന്നു. അതിന് പിന്നാലെയാണ് രാജ്യസഭാ സീറ്റും ഒരുവഴിക്കായത്. ഇതോടെ വാക്ക് പാലിക്കാത്ത മുന്നണിയില് തുടരണോ എന്ന് പോലും ചര്ച്ചകള് നടക്കുന്നു. തങ്ങള് ആവശ്യപ്പെട്ടിട്ടാണ് സി.കെ ജാനു അടക്കമുള്ളവര് മുന്നണിയിലെത്തിയതെന്ന് തുഷാര് പറയുന്നു. രാജ്യസഭാ സീറ്റ് ഒഴിവുണ്ടാകുമ്പോള് തുഷാര് വെള്ളാപ്പള്ളിയെ പരിഗണിക്കുമെന്നു മുന്പു ധാരണയുണ്ടായിരുന്നു. എന്നാല് അല്ഫോണ്സ് കണ്ണന്താനത്തിനെ രാജ്യസഭ വഴി കേന്ദ്രമന്ത്രിപദത്തില് എത്തിച്ചതില് സംസ്ഥാനത്തെ നേതാക്കള്ക്ക് അമര്ഷമുണ്ട്. അത് പരിഹരിക്കാനാണ് മുരളീധരനെ മല്സരിപ്പിച്ചത്. മുമ്പ് സുരേഷ് ഗോപിയെ എം.പിയാക്കിയതും ഇവിടുത്തെ നേതാക്കള്ക്ക് അതൃപ്തിയുണ്ടായിരുന്നു. അടികൊള്ളാന് ഞങ്ങളും സീറ്റ് വല്ലവര്ക്കും എന്ന കേന്ദ്രനിലപാട് ശരിയല്ല എന്നായിരുന്നു ഇവരുടെ ആക്ഷേപം. ബി.ഡി.ജെ.എസിനെ ഒപ്പം കൂട്ടിയിട്ട് ഒരു സീറ്റ് പോലും കിട്ടിയില്ലെന്നും അതുകൊണ്ട് ഒരുപദവികളും നല്കണ്ടെന്നാണ് കേന്ദ്രനേതൃത്വത്തിന്റെ തീരുമാനം.
https://www.facebook.com/Malayalivartha
