നഴ്‌സുമാരുടെ ശമ്പളം കൂട്ടില്ലന്നും സമ്മര്‍ദം ചെലുത്തി ഉത്തരവ് നടപ്പാക്കാന്‍ ശ്രമിച്ചാല്‍ ആശുപത്രികള്‍ അനിശ്ചിതകാലത്തേക്ക് അടച്ചിടുമെന്നും ഭീഷണി. നഴ്‌സുമാര്‍ ഉള്‍പ്പെടെയുള്ളവരുടെ മിനിമം വേതനം വര്‍ധിപ്പിച്ചുള്ള സര്‍ക്കാര്‍ വിജ്ഞാപനം അംഗീകരിക്കില്ലെന്നും കേരള പ്രൈവറ്റ് ഹോസ്പിറ്റല്‍ അസോസിയേഷന്‍ (കെ.പി.എച്ച്‌.എ). വിജ്ഞാപനത്തെ നിയമപരമായി ചോദ്യംചെയ്യും. സമ്മര്‍ദം ചെലുത്തി ഉത്തരവ് നടപ്പാക്കാന്‍ ശ്രമിച്ചാല്‍ ആശുപത്രികള്‍ അനിശ്ചിതകാലത്തേക്ക് അടച്ചിടുമെന്നും ഭീഷണി.

നഴ്‌സുമാര്‍ ഉള്‍പ്പെടെയുള്ള ജോലിക്കാരുടെ ശമ്പളം സര്‍ക്കാര്‍ ഉത്തരവില്‍ പറയുന്നതുപോലെ കൂട്ടിയാല്‍ സ്വകാര്യ ആശുപത്രി മേഖല വലിയ പ്രതിസന്ധിയിലാകുമെന്നു ചൂണ്ടിക്കാട്ടിയാണ് ഇന്നലെ കൊച്ചിയില്‍ ചേര്‍ന്ന ആശുപത്രി ഉടമകളുടെ യോഗം വിജ്ഞാപനം അംഗീകരിക്കേണ്ടതില്ലെന്ന തീരുമാനത്തിലെത്തിയത്. നിയമപരമായി ചോദ്യംചെയ്യുന്നതിനു മുന്‍പ് ഉത്തരവു നടപ്പാക്കുന്നതിലെ പ്രായോഗിക ബുദ്ധിമുട്ട് സര്‍ക്കാരിനെ അറിയിക്കും. ഇതിനായി തൊഴില്‍മന്ത്രിയുമായി കൂടിക്കാഴ്ച നടത്തും.

ന്യായമായ വര്‍ധന നടപ്പാക്കാന്‍ ആശുപത്രി ഉടമകള്‍ തയാറാണ്. അതിനപ്പുറം വീണ്ടും സമരനടപടികളുമായി നഴ്‌സുമാര്‍ മുന്നോട്ടുപോയാല്‍ നേരിടുമെന്നും ആശുപത്രി ഉടമകളുടെ സംഘടന അറിയിച്ചു. കേരള പ്രൈവറ്റ് ഹോസ്പിറ്റല്‍ അസോസിയേഷനു പുറമേ ഐ.എം.എ ഹോസ്പിറ്റല്‍ ബോര്‍ഡ് ഓഫ് ഇന്ത്യ, ഓള്‍ ഇന്ത്യ ഹെല്‍ത്ത് പ്രൊെവെഡേഴ്‌സ് തുടങ്ങിയ സംഘടനകളും യോഗത്തില്‍ പങ്കെടുത്തു. കെ.പി.എച്ച്‌ എ പ്രസിഡന്റ് ഡോ. പി.കെ മുഹമ്മദ് റഷീദ്, ഡോ. ഇ.കെ രാമചന്ദ്രന്‍ എന്നിവരും പത്രസമ്മേളനത്തില്‍ പങ്കെടുത്തു.

വര്‍ധന അതേപോലെ നടപ്പാക്കിയാല്‍ വരുമാനത്തിന്റെ 64 ശതമാനവും ശമ്പളത്തിനു മാറ്റിവയ്‌ക്കേണ്ടി വരും. ചികില്‍സാച്ചെലവില്‍ 100 ശതമാനംവരെ വര്‍ധന ഏര്‍പ്പെടുത്താന്‍ ആശുപത്രികള്‍ നിര്‍ബന്ധിതരാകുമെന്നും കെ.പി.എച്ച്‌.എ. ജനറല്‍ സെക്രട്ടറി ഹസന്‍ കോയ തങ്ങള്‍ പറഞ്ഞു. കഴിഞ്ഞ ദിവസമാണു നഴ്‌സുമാരുടെ അടിസ്ഥാന ശമ്ബളം 20,000 രൂപയായും മറ്റു ജീവനക്കാരുടെ ശമ്ബളം 16,000 രൂപയുമാക്കി നിജപ്പെടുത്തി സര്‍ക്കാര്‍ ഉത്തരവിറക്കിയത്. മിനിമം വേജസ് ആക്‌ട് നിലനില്‍ക്കെ സര്‍ക്കാരിന്റെ ഉത്തരവ് അന്യായമാണെന്നു കെ.പി.എച്ച്‌.എ. ആരോപിച്ചു. ഉടമകളുടെ പരാതികള്‍ കേള്‍ക്കാതെ ഏകപക്ഷീയമായി വേതനം വര്‍ധിപ്പിക്കാന്‍ തീരുമാനിച്ചത് അംഗീകരിക്കില്ലെന്നും ഹസന്‍ കോയ തങ്ങള്‍ പറഞ്ഞു.