ബൈപാസില്‍ കുളത്തൂര്‍ ടി.എസ്.സി.ആശുപത്രിക്ക് സമീപം കാര്‍ നിയന്ത്രണം വിട്ട് മരത്തിലിടിച്ചുണ്ടായ അപകടത്തില്‍ കാര്‍ യാത്രക്കാരനായ ഒരാള്‍ മരിച്ചു. കാറിലുണ്ടായിരുന്ന മറ്റു മൂന്ന് പേര്‍ക്ക് ഗുരുതരമായി പരിക്കേറ്റു. ഇന്ന് രാവിലെ 5.30നാണ് സംഭവം നടന്നത്. കൊല്ലം തട്ടാമല ഇരവിപുരം തേജസ് നഗര്‍ അഷര്‍ മന്‍സിലില്‍ ഷാജഹാന്‍ (49) ആണ് മരിച്ചത്. ഭാര്യ സജിത, മകന്‍ അസറുദീന്‍ (24), ബന്ധു ഷാജിന്‍ (44) എന്നിവര്‍ക്കാണ് പരിക്കേറ്റത്.

തിരുവനന്തപുരത്തെ സ്വകാര്യ ആശുപത്രിയില്‍ ഷാജഹാന് ഡയാലിസിസ് നടത്താന്‍ വേണ്ടി വരികയായിരുന്നു ഇവര്‍. യാത്രാമദ്ധ്യേ നിയന്ത്രണം വിട്ട കാര്‍ ഡിവൈഡറിലിടിച്ചശേഷം മരത്തില്‍ ഇടിക്കുകയായിരുന്നു. അപകടത്തില്‍ കാര്‍ പൂര്‍ണമായി തകര്‍ന്നു. അസറുദീനായിരുന്നു കാറോടിച്ചിരുന്നത്. 

പരിക്കേറ്റവരെ സ്വകാര്യ ആശുപത്രിയില്‍ പ്രവേശിപ്പിച്ചു. വിവരമറിഞ്ഞ് സ്ഥലത്തെത്തിയ തുമ്പ പോലീസാണ് രക്ഷാപ്രവര്‍ത്തനം നടത്തിയത്.