ജ്യോതിഷത്തില്‍ അടിയുറച്ച് വിശ്വസിക്കുന്ന കര്‍ണാടക മന്ത്രി എച്ച്.ഡി.രേവണ്ണ ദിവസവും 300 കിലോമീറ്റര്‍ ദൂരം സഞ്ചരിക്കുന്നത് ജ്യോതിഷിയുടെ നിര്‍ദേശപ്രകാരമാണെന്നാണ് ഇപ്പോള്‍ പരക്കുന്നത്. 

എന്നാല്‍, അതെല്ലാം നിഷേധിച്ചിരിക്കുകയാണ് മന്ത്രി തനിക്ക് മതിയായ സൗകര്യങ്ങള്‍ ഔദ്യോഗികവസതിയില്‍ ഇല്ലാത്തതിനാലാണ് ഈ യാത്രയെന്നാണ് രേവണ്ണ പറയുന്നത്. തനിക്ക് അനുവദിച്ച മന്ത്രിമന്ദിരം കിട്ടുംവരെ ഇങ്ങനെ തന്നെ തുടരാനാണ് തീരുമാനമെന്നും രേവണ്ണ പറഞ്ഞു. രേവണ്ണ ആവശ്യപ്പെട്ട മന്ത്രിമന്ദിരത്തില്‍ ഇപ്പോള്‍ താമസിക്കുന്നത് മുന്‍ പൊതുമരാമത്ത് മന്ത്രി എച്ച്.സി.മഹാദേവപ്പയാണ്. മൂന്നുമാസം കൂടി കഴിഞ്ഞാലേ ഔദ്യോഗികവസതിയിലെ മഹാദേവപ്പയുടെ കാലാവധി അവസാനിക്കുകയുള്ളു. പുലര്‍ച്ചെ 5 മണിക്ക് എഴുന്നേറ്റാണ് രേവണ്ണ 169 കിലോമീറ്റര്‍ സഞ്ചരിച്ച് ബംഗളൂരുവിലെത്തുന്നത്. രാത്രിവൈകിയാലും മന്ത്രി തിരികെപ്പോകുകയും ചെയ്യും.

പൊതുമരാമത്ത് വകുപ്പ് മന്ത്രിയും മുഖ്യമന്ത്രി എച്ച്ഡി കുമാരസ്വാമിയുടെ ജ്യേഷ്ഠനുമായ രേവണ്ണ ജ്യോതിഷവിധി പ്രകാരം മാത്രം കാര്യങ്ങളില്‍ തീരുമാനമെടുക്കുന്നയാളാണെന്ന് എല്ലാവര്‍ക്കും അറിയാം. അതുകൊണ്ടാണ് ജ്യോതിഷിയുടെ നിര്‍ദേശപ്രകാരം നിയമസഭാമന്ദിരത്തിലെത്തി തിരിച്ചുവരാന്‍ ദിവസവും 300 കിലോമീറ്റര്‍ ദൂരം സഞ്ചരിക്കുന്നുവെന്ന ആരോപണം ഉയരുന്നതും. വിധാന്‍സഭ സ്ഥിതി ചെയ്യുന്ന ബംഗളൂരുവില്‍ നിന്ന് സ്വന്തം മണ്ഡലമായ ഹൊളേനരാസിപുരയിലേക്കാണ് രേവണ്ണ ദിവസവും പോയിവരുന്നത്.