ഗാര്‍ഹികാവശ്യത്തിന് ഉപയോഗിക്കുന്ന സബ്‌സിഡിയില്ലാത്ത ഗ്യാസ് സിലിണ്ടറിന് 30.50 രൂപ കൂടി. അതേസമയം, സബ്‌സിഡി സിലിണ്ടറിന് 1.49 രൂപയും കൂടി. ഇതോടെ ഡല്‍ഹിയില്‍ 498.02 രൂപയായിരുന്ന സബ്‌സിഡി സിലിണ്ടറിന് 499.51 രൂപയായി. സെപ്തംബര്‍ ഒന്നു മുതല്‍ വിലവര്‍ദ്ധന നിലവില്‍ വന്നു.

വാണിജ്യ സിലിണ്ടറുകളുടെ വില 1363 രൂപയില്‍ നിന്ന് 47.50 രൂപ വര്‍ദ്ധിച്ച് 1410.50 രൂപയായി. അഞ്ച് കിലോ സിലിണ്ടറുകളുടെ വില 15 രൂപ കൂടി 394 രൂപയായി.

ആഗോള വിപണിയില്‍ എണ്ണവില ഉയര്‍ന്നതും രൂപയ്‌ക്കെതിരെ ഡോളറിന്റെ മൂല്യം ഉയര്‍ന്നതുമാണ് വില വര്‍ദ്ധിക്കാന്‍ ഇടയാക്കിയതെന്ന് എണ്ണക്കമ്പനികള്‍ പറഞ്ഞു. ക്രൂഡോയില്‍ വില കുതിക്കുന്നത് കാരണം എണ്ണക്കമ്പനികളും ബാങ്കുകളും വന്‍തോതില്‍ ഡോളര്‍ വാങ്ങിക്കൂട്ടുകയാണ്.

പെട്രോള്‍ വിലയിലും ഉയര്‍ച്ച രേഖപ്പെടുത്തി. തിരുവനന്തപുരത്ത് പെട്രോളിന് ലിറ്ററിന് 82.04 രൂപയും ഡീസലിന് 75.53 രൂപയുമാണ് വില.