ലോക്‌സഭ തെരഞ്ഞെടുപ്പില്‍ വോട്ടുയന്ത്ര അട്ടിമറി തടയാനും വോട്ടര്‍ പട്ടികയിലെ ക്രമക്കേട് കണ്ടെത്താനും നേതാക്കള്‍ക്ക് കോണ്‍ഗ്രസ് പരിശീലനം നല്‍കും. വോട്ടെടുപ്പ് ദിവസം നാല് ഘട്ടങ്ങളില്‍ വോട്ടുയന്ത്രം പരിശോധിക്കാന്‍ തെരഞ്ഞെടുപ്പ് കമീഷന്‍ ബൂത്ത് ഏജന്റുമാര്‍ക്ക് അവസരം നല്‍കും. ഈസമയം ഏതെല്ലാം രീതിയില്‍ അട്ടിമറി തടയാന്‍ സാധിക്കും എന്ന് കൃത്യമായി പരിശീലനം നല്‍കാനാണ് കോണ്‍ഗ്രസ് പദ്ധതി. ഇതു സംബന്ധിച്ച് സംസ്ഥാന അധ്യക്ഷന്മാര്‍ക്ക് എ.െഎ.സി.സി നിര്‍ദേശം നല്‍കി.

വോട്ടുയന്ത്രം പരിശോധിക്കാന്‍ അവസരം നല്‍കുന്ന സമയം പരിശീലനം ലഭിച്ചവരെ മാത്രം ബൂത്തുകളില്‍ വിന്യസിക്കും. അവര്‍ക്ക് പരിശീലനം നല്‍കാന്‍ വിദഗ്ധരെ നിയോഗിക്കും. കൂടാതെ, വോേട്ടഴ്‌സ് ലിസ്റ്റ് കൃത്യമായി വിലയിരുത്താനും സംസ്ഥാന നേതൃത്വത്തിന് നിര്‍ദേശം നല്‍കിയിട്ടുണ്ട്. വോേട്ടഴ്‌സ് ലിസ്റ്റിലെ നീക്കം ചെയ്ത പേരുകളും വ്യാജ പേരുകളും കണ്ടെത്തി വിവരങ്ങള്‍ യഥാസമയം ചുമതലയുള്ളവരെ അറിയിക്കുന്നതടക്കമുള്ള പ്രവര്‍ത്തനങ്ങളുമായി മുന്നോട്ടുപോവാനാണ് മറ്റൊരു നിര്‍ദേശം. അടുത്തിടെ നടന്ന മധ്യപ്രദേശ്, രാജസ്ഥാന്‍, ഛത്തിസ്ഗഢ് സംസ്ഥാന തെരഞ്ഞെടുപ്പുകളില്‍ വോട്ടുയന്ത്രം അട്ടിമറി തടയാന്‍ പലയിടങ്ങളിലും പാര്‍ട്ടി പ്രവര്‍ത്തകരെ കോണ്‍ഗ്രസ് സജ്ജമാക്കിയിരുന്നു.കുറച്ചു വര്‍ഷങ്ങളായി തെരഞ്ഞെടുപ്പുകളില്‍ വോട്ടിങ്ങ് മെഷീനുകള്‍ വ്യാപകമായി ദുരുപയോഗം ചെയ്യപ്പെടുന്നുണ്ടെന്ന് പ്രതിപക്ഷ കക്ഷികള്‍ ആരോപണമുയര്‍ത്തുന്നുണ്ട്. മധ്യപ്രദേശ് നിയമസഭാ തെരഞ്ഞെടുപ്പില്‍ വോട്ടിങ്ങ് മെഷിനുകള്‍ ബിജെപി അട്ടിമറിക്കാന്‍ ശ്രമിക്കുന്നുവെന്ന് ആരോപിച്ച് കോണ്‍ഗ്രസ് മെഷിനുകള്‍ക്ക് കാവലിരുന്നിരുന്നു.

ഇന്ത്യയില്‍ ബിജെപി വന്‍ വിജയം കൈവരിച്ച തെരഞ്ഞെടുപ്പുകളില്‍ വോട്ടിങ് യന്ത്രത്തില്‍ തിരിമറി നടത്തിയിരുന്നെന്ന് യുഎസ് ഹാക്കര്‍ സെയ്ദ് ഷൂജയുടെ വെളിപ്പെടുത്തല്‍ ഏറെ വിവാദമായിരുന്നു.

2014ല്‍ ബിജെപി കേവലഭൂരിപക്ഷം നേടിയ ലോക്‌സഭാ തെരഞ്ഞെടുപ്പില്‍ വോട്ടിങ് യന്ത്രം ഹാക്ക് ചെയ്തിരുന്നുവെന്നും ഉത്തര്‍പ്രദേശ്, മഹാരാഷ്ട്ര, ഗുജറാത്ത് തെരഞ്ഞെടുപ്പുകളിലും തിരിമറി നടത്തിയെന്നും വാര്‍ത്താ സമ്മേളനത്തില്‍ സെയ്ദ് ഷൂജ വ്യക്തമാക്കി. ഒപ്പം ഇന്ത്യയിലെ വോട്ടിങ് യന്ത്രത്തില്‍ എങ്ങനെയാണ് കൃത്രിമത്യം നടത്തുന്നതെന്ന് ലൈവായി കാണിച്ചു നല്‍കുകയും ചെയ്തു.

തെരഞ്ഞെടുപ്പിലെ വോട്ടുയന്ത്ര തിരിമറിയെക്കുറിച്ചുള്ള വാര്‍ത്ത പുറത്തുവിടാന്‍ ഉദ്ദേശിച്ചിരുന്ന ഘട്ടത്തിലാണ് ബംഗളൂരുവില്‍ ഗൗരി ലങ്കേഷ് എന്ന മാധ്യമ പ്രവര്‍ത്തക വെടിയേറ്റു മരിച്ചതെന്നും അമേരിക്കന്‍ സൈബര്‍ വിദഗ്ധന്റെ വെളിപ്പെടുത്തല്‍. തിരിമറിയുടെ വിശദാംശങ്ങള്‍ മുഴുവന്‍ പ്രമുഖനായൊരു ഇന്ത്യന്‍ മാധ്യമ പ്രവര്‍ത്തകനോട് ഇവര്‍ പറഞ്ഞിരുന്നു.

ഈ തട്ടിപ്പ് അറിയാമായിരുന്നതു കൊണ്ടാണ് കേന്ദ്രമന്ത്രിയായി ദിവസങ്ങള്‍ക്കകം മഹാരാഷ്ട്രക്കാരനായ ഗോപിനാഥ് മുണ്ടെ വാഹനാപകടത്തില്‍ കൊല്ലപ്പെട്ടതെന്നും അന്വേഷണം നടത്തിയ എന്‍.ഐ.എ ഉദ്യോഗസ്ഥന്‍ തന്‍സില്‍ അഹ്മദ് എഫ്.ഐ.ആര്‍ സമര്‍പ്പിക്കുന്ന ഘട്ടമായപ്പോഴേക്ക് ആത്മഹത്യ ചെയ്തതെന്നും ഹാക്കര്‍ വെളിപ്പെടുത്തുന്നു.

2014ലെ ലോക്‌സഭ തെരഞ്ഞെടുപ്പില്‍ ടെലികോം ഭീമനായ റിലയന്‍സ് ബി.ജെ.പിയെ സഹായിച്ചുവെന്നും അമേരിക്കന്‍ ഹാക്കറുടെ വെളിപ്പെടുത്തല്‍. വോട്ടുയന്ത്രം ഹാക്ക് ചെയ്യാനുള്ള തീവ്രത കുറഞ്ഞ തരംഗദൈര്‍ഘ്യമുള്ള സിഗ്‌നലുകള്‍ ലഭ്യമാക്കിയത് അവരാണ്. ഒമ്ബതിടത്ത് ഇതിന് സൗകര്യങ്ങള്‍ ഒരുക്കി. വോട്ടുയന്ത്രങ്ങളില്‍ തിരിമറി നടത്തുകയാണെന്ന് അതിലെ ജീവനക്കാര്‍ക്ക് അറിയാമായിരുന്നില്ല. കമ്ബ്യൂട്ടറില്‍ ഡാറ്റ എന്‍ട്രി നടത്തുന്നു എന്നാണ് അവര്‍ ധരിച്ചതെന്നും അദേഹം പറഞ്ഞു. ടെലികോം രംഗത്തെ അതികായരായ കമ്ബനിയുടെ സഹായത്തോടെ നടന്ന ക്രമക്കേടു വഴി കോണ്‍ഗ്രസിന് 201 സീറ്റെങ്കിലും നഷ്ടപ്പെട്ടെന്നും അദേഹം വെളിപ്പെടുത്തി. അമേരിക്ക കേന്ദ്രീകരിച്ചു പ്രവര്‍ത്തിക്കുന്ന സയ്യിദ് ഷുജ, തനിക്കു നേരെ ഹൈദരാബാദില്‍വെച്ച് ആക്രമണം നടന്നുവെന്നും വെളിപ്പെടുത്തി. തന്റെ ടീമിലുള്ള ചിലര്‍ കൊല്ലപ്പെട്ടു. മുഖം മിക്കവാറും മറച്ചാണ് ഷുജ സ്‌ക്രീനില്‍ എത്തിയത്. ഇന്ത്യന്‍ ജേണലിസ്റ്റ്‌സ് അസോസിയേഷന്‍ (യൂറോപ്) സംഘടിപ്പിച്ച വാര്‍ത്തസമ്മേളനത്തില്‍ ഷുജ വെളിപ്പെടുത്തല്‍ നടത്തിയത്.