പൊതുതെരഞ്ഞെടുപ്പ് പ്രഖ്യാപനം മാര്‍ച്ചില്‍ ഉണ്ടാകുമെന്ന് സംസ്ഥാനത്തെ മുഖ്യതെരഞ്ഞെടുപ്പ് ഓഫീസര്‍ ടിക്കറാം മീണ. ഏപ്രില്‍ . മേയ് മാസങ്ങളില്‍ തെരഞ്ഞെടുപ്പ് നടക്കും. നാമ നിര്‍ദേശ പത്രിക പിന്‍വലിക്കാനുള്ള അവസാന തിയതി വരെ വോട്ടര്‍ പട്ടികയില്‍ പേരു ചേര്‍ക്കാം. ഇതുവരെ സംസ്ഥാനത്ത് 2.54 കോടി വോട്ടര്‍മാരുണ്ടെന്നും ടിക്കാറാം മീണ തിരുവനന്തപുരത്ത് പറഞ്ഞു. സംസ്ഥാനത്തെ 20 ലോക്‌സഭാ മണ്ഡലങ്ങളിലേക്കാണ് തെരഞ്ഞെടുപ്പ് നടക്കുക. രാജ്യമെമ്പാടും നടക്കുന്ന തെരഞ്ഞെടുപ്പായതിനാല്‍ പല സംസ്ഥാനങ്ങളിലും പല ദിവസങ്ങളിലായിരിക്കും വോട്ടെടുപ്പ്. എന്നാല്‍ വോട്ടെണ്ണല്‍ ഒറ്റ ദിവസമായിരിക്കും. ഇലക്ട്രോണിക് വോട്ടിംഗ് യന്ത്രമായിരിക്കും ഇത്തവണയും ഉപയോഗിക്കുക. അതിനെതിരെ ഉയര്‍ന്ന വിവാദങ്ങളില്‍ കഴമ്പില്ലെന്ന് മുഖ്യതെരഞ്ഞെടുപ്പ് കമ്മീഷന്‍ വ്യക്തമാക്കിയിരുന്നു.

കഴിഞ്ഞതവണ 11 സീറ്റിലായണ് യു.ഡി.എഫ് വിജയിച്ചത്. വയനാട് എം.പി എം.ഐ ഷാനവാസ് മരിച്ചു. കോട്ടയം എം.പി ജോസ് കെ.മാണി രാജ്യസഭയിലേക്ക് തെരഞ്ഞെടുക്കപ്പെട്ടു. 11 സീറ്റില്‍ നിന്ന് പതിനാറായി യു.ഡി.എഫ് നിലമെച്ചപ്പെടുത്തുമെന്നാണ് സര്‍വ്വേകള്‍ പറയുന്നത്. എന്നാല്‍ കനത്ത തിരിച്ചടിയുണ്ടാകുമെന്ന് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ ആരോപിച്ചിരുന്നു. കഴിഞ്ഞ തവണ പൊതുസമ്മതരേയും സ്വതന്ത്രരേയും മത്സരിപ്പിച്ചാണ് എല്‍.ഡി.എഫ് ഒന്‍പത് സീറ്റ് പിടിച്ചെടുത്തത്. ഇത്തവണ ശബരിമല വിഷയത്തിന്റെ പശ്ചാത്തലത്തില്‍ അവരുടെ സീറ്റ് കുറയുമെന്നാണ് വിലയിരുത്തല്‍. പല സിറ്റിംഗ് എം.പിമാരും എല്‍.ഡി.എഫില്‍ നിന്ന് മത്സരിച്ചേക്കില്ലെന്നും അറിയുന്നു.