തനിക്ക് ജീവിതത്തില്‍ കൂട്ടായി തന്റെ കുഞ്ഞ് എത്തിയെന്ന് ലോകത്തോട് വിളിച്ചു പറഞ്ഞുകൊണ്ട് അമൃതവര്‍ഷിണി കുഞ്ഞിനെ ലോകത്തിന് മുന്നില്‍ കാട്ടി. ആ സന്തോഷക്കാഴ്ച കാണാന്‍ അവന്റെ പിതാവ് ഈ ലോകത്തില്ല എന്ന ദു:ഖസത്യം അപ്പോള്‍ പലരുടേയും ഉള്ളുലച്ചു.

ഇഷ്ടപ്പെട്ട പെണ്ണിനെ സ്വീകരിച്ചതിന്റെ പേരില്‍ പ്രണയിനെ ഈ ലോകത്തു നിന്നും ചില കാട്ടാളന്‍മാര്‍ മടക്കി അയച്ചു. കഴിഞ്ഞ സെപ്റ്റംബറിലായിരുന്നു പ്രണയിനെ അമൃതയുടെ പിതാവ് മാരുതി റാവുവിന്റെ നിര്‍ദേശപ്രകാരം കൊലപ്പെടുത്തിയത്.

ഉന്നത ജാതിയില്‍പെട്ട അമൃത ദളിത് യുവാവായ പ്രണയിനെ പ്രണയിച്ചതായിരുന്നു കുടുംബത്തെ ചൊടിപ്പിച്ചത്. വാട്‌സ്ആപ്പ് വഴിയാണ് അമൃതയും എഞ്ചിനീയറായിരുന്ന പി. പ്രണയ് കുമാറും പ്രണയിച്ചത്. അമൃതയുടെ വീട്ടുകാര്‍ എതിര്‍ത്തതോടെ ഇരുവരും രഹസ്യമായി വിവാഹം കഴിച്ചു. ഒരുമിച്ചു സന്തോഷപൂര്‍വം ജീവിക്കുന്നതിനിടെയാണ് പ്രണയിനെ കൊലപ്പെടുത്തിയത്.

ഇപ്പോഴിതാ തങ്ങളെ സ്‌നേഹിച്ച...പിന്തുണച്ച സുമനസുകള്‍ക്കു മുന്നില്‍ തന്റെ പൈതലിനെ പരിചയപ്പെടുത്തുകയാണ് അമൃത. പ്രണയിന്റെ ചിത്രത്തിന് മുന്നില്‍ കുഞ്ഞിനൊപ്പം നില്‍ക്കുന്ന അമൃതയുടെ ചിത്രം കാഴ്ചക്കാരുടെ കണ്ണിനെ ഈറനണിയിക്കും. കുഞ്ഞിന്റെ എക്കാലത്തെയും ഹീറോ അച്ഛനായിരിക്കുമെന്നും ചിത്രത്തില്‍ കുറിച്ചിട്ടുണ്ട്. വിവാഹവാര്‍ഷിക ദിനത്തിലാണ് ചിത്രം അമൃത പങ്കുവച്ചിരിക്കുന്നത്.

മൂന്ന് മാസം ഗര്‍ഭിണിയായിരുന്ന അമൃതയ്‌ക്കൊപ്പം ആശുപത്രിയില്‍ നിന്ന് വരുമ്പോഴാണ് അക്രമി പുറകിലൂടെ വന്ന് പ്രണയിനെ വെട്ടിയത്. നാല്‍ഗോണ്ടയിലെ ജ്യോതി ആശുപത്രിയ്ക്ക് സമീപമായിരുന്നു അക്രമം നടന്നത്. അമൃതയുടെ പിതാവ് ടി. മാരുതി റാവു ഒരു കോടി രൂപ നല്‍കി ബീഹാറില്‍ നിന്നിറക്കിയ ക്വട്ടേഷന്‍ സംഘമാണ് പ്രണയിനെ വെട്ടി കൊലപ്പെടുത്തിയത്. ഏകമകള്‍ താഴ്ന്ന ജാതിയിലുള്ള ഒരാളെ വിവാഹം ചെയ്തത് മാരുതി റാവുവിന് അംഗീകരിക്കാന്‍ സാധിച്ചിരുന്നില്ല. ഈ വൈരാഗ്യമാണ് പ്രണയിന്റെ കൊലയ്ക്ക് കാരണമായതെന്ന് പൊലീസ് പറയുന്നു.