ചത്തീസ്ഗഡില് ബിജെപിയുടെ ജില്ലാതല യോഗം റിപ്പോര്ട്ട് ചെയ്യാനെത്തിയ മാധ്യമപ്രവര്ത്തകനെ ബിജെപി പ്രവര്ത്തകര് ചേര്ന്ന് ക്രൂരമായി മര്ദ്ദിച്ചു
ചത്തീസ്ഗഡില് മാധ്യമപ്രവര്ത്തകന് നേരെ ബിജെപി നേതാക്കളുടെ ആക്രമണം. റായ്പൂരില് നടക്കുന്ന ബിജെപിയുടെ ജില്ലാതല യോഗം റിപ്പോര്ട്ട് ചെയ്യാനെത്തിയ മാധ്യമപ്രവര്ത്തകന് സുമന് പാണ്ഡെയെയാണ് ഒരു സംഘം ബിജെപി പ്രവര്ത്തകര് ചേര്ന്ന് ക്രൂരമായി മര്ദ്ദിച്ചത്. ശനിയാഴ്ച ഉച്ചയ്ക്കാണ് സംഭവം.
അക്രമണത്തില് സുമന് തലയ്ക്ക് പരിക്കേറ്റിടുണ്ട്. സംഭവത്തില് സുമന്റെ പരാതിയില്മേല് നാല് പേര്ക്കെതിരെ പൊലീസ് കേസെടുത്തിട്ടുണ്ട്. ബിജെപി റായ്പൂര് ജില്ലാ പ്രസിഡന്റ് രാജീവ് അഗര്വാള്, ബിജെപി ഓഫീസര് ഭാരവാഹി വിജയ് വ്യാസ്, ഉത്ത്കാര്ഷ് ത്രിവേദി, ദീന ഡോങ്ക്രേ എന്നിവര്ക്കെതിരേയാണ് പൊലീസ് കേസെടുത്തതെന്ന് വാര്ത്ത ഏജന്സിയായ പിടിഐ റിപ്പോര്ട്ട് ചെയ്തു. കേസില് ഇതുവരെ ആരുടേയും അറസ്റ്റ് രേഖപ്പെടുത്തിയിട്ടില്ല.
റായ്പൂരിലെ ബിജെപിയുടെ ഏകാത്മ പരിസര് ഓഫീസില് നടക്കുന്ന യോഗം റിപ്പോര്ട്ട് ചെയ്യുന്നതിനിടെയാണ് പാര്ട്ടി പ്രവര്ത്തകര് മര്ദ്ദിച്ചതെന്ന് സുമന് നല്കിയ പരാതിയില് പറയുന്നു. മൊബൈല് ഉപയോഗിച്ചായിരുന്നു യോഗത്തിന്റെ ദൃശ്യങ്ങള് പകര്ത്തിയത്. എന്നാല് യോഗത്തിനിടയില് നേതാക്കള് തമ്മില് അടിപിടി ഉണ്ടാകുകയും അത് താന് ചിത്രീകരിക്കുകയും ചെയ്തു. പിന്നീട് അടിപിടികൂടുന്നതിന്റെ ദൃശ്യങ്ങള് മായ്ച്ചുകളയാന് നേതാക്കന്മാര് തന്നോട് ആവശ്യപ്പെട്ടു.
എന്നാല് ദൃശ്യങ്ങള് മായ്ച്ചുകളയാന് വിസമതിച്ചതിനെ തുടര്ന്ന് നേതാക്കന്മാര് ചേര്ന്ന് തന്നെ മര്ദ്ദിക്കുകയും ബലം പ്രയോഗിച്ച് ദൃശ്യങ്ങള് മായ്ച്ചുകളയുകയും ചെയ്തു. സംഭവത്തിനുശേഷം 20 മിനിറ്റോളം ഓഫീസിനുള്ളില് തടഞ്ഞുവച്ചിരുന്നു. പിന്നീട് ഓഫീസില്നിന്ന് പുറത്തുവന്നതിനുശേഷമാണ് സംഭവത്തെക്കുറിച്ച് മറ്റ് മാധ്യമപ്രവര്ത്തകരെ അറിയിച്ചതെന്നും സുമന് കൂട്ടിച്ചേര്ത്തു.
സംഭവത്തില് പ്രതിഷേധം ശക്തമാണ്. ബിജെപി ഓഫീസിന് മുന്നില് മാധ്യമപ്രവര്ത്തകര് തടിച്ചുകൂടുകയും മാധ്യമപ്രവര്ത്തകനെ മര്ദ്ദിച്ചവരെ ഉടന് പിടികൂടണമെന്ന് ആവശ്യപ്പെട്ട് പ്രതിഷേധം സംഘടിപ്പിക്കുകയും ചെയ്തു. അതേസമയം സംഭവത്തില് പാര്ട്ടി പ്രവര്ത്തകര് അക്രമത്തിന് ഇരയായ മാധ്യമപ്രവര്ത്തകനോട് ക്ഷമ പറഞ്ഞതായി മുതിര്ന്ന ബിജെപി വക്താവ് സച്ചിതാനന്ദ് ഉപാസന പറഞ്ഞു.
കഴിഞ്ഞ നിയമസഭാ തെരഞ്ഞെടുപ്പ് മത്സരത്തിലെ പരാജയം സംബന്ധിച്ചാണ് യോഗത്തില് ചര്ച്ച ചെയ്തത്. റിപ്പോര്ട്ട് ചെയ്യാനെത്തിയ മാധ്യമപ്രവര്ത്തകരോട് യോഗം നടക്കുന്ന ഓഫീസില്നിന്ന് പുറത്തേക്ക് പോകാന് ആവശ്യപ്പെട്ടിരുന്നു. എന്നാല് യോഗത്തിന്റെ ദൃശ്യങ്ങള് സുമന് മൊബൈലില് പകര്ത്തുന്നത് പ്രവര്ത്തകര് കാണുകയും റെക്കോര്ഡ് ചെയ്യുന്നത് നിര്ത്താനും വീഡിയോ മായ്ച്ചുകളയാന് അവശ്യപ്പെടുകയും ചെയ്യുകയായിരുന്നു.
https://www.facebook.com/Malayalivartha
