കൊല്‍ക്കത്ത പൊലീസ് കമ്മീഷണറെ ചോദ്യം ചെയ്യാനെത്തിയ സിബിഐ സംഘത്തെ തടയാന്‍ ബംഗാള്‍ മുഖ്യമന്ത്രി മമതാ ബാനര്‍ജി നേരിട്ടെത്തി. സിബിഐ ഉദ്യോഗസ്ഥരെ പോലീസ് കസ്റ്റഡിയില്‍ എടുത്തതോടെ കേന്ദ്രസേന സംരക്ഷണവുമായി സിബിഐയ്ക്ക് സംരക്ഷണവുമായി ഓടിയെത്തി.

നരേന്ദ്ര മോഡിയുടെയും ബിജെപി ദേശീയ അദ്ധ്യക്ഷന്‍ അമിത് ഷായുടേയും ശ്രമങ്ങളാണ് സിബിഐ നീക്കങ്ങള്‍ക്ക് പിന്നിലെന്നും മമത പറഞ്ഞു. കേന്ദ്രസര്‍ക്കാരിനെതിരെ ആഞ്ഞടിച്ച മമത അടിയന്തിരാവസ്ഥയേക്കാള്‍ മോശമായ അവസ്ഥയാണ് ഇപ്പോഴുള്ളതെന്ന് പ്രസ്താവിച്ചു. ബിജെപി ബംഗാളിനെ വേട്ടയാടുകയാണ്. പ്രധാനമന്ത്രി സിബിഐയെ ദുരുപയോഗം ചെയ്തു.

ജനുവരി 19ന് പ്രതിപക്ഷ പാര്‍ട്ടികള്‍ നടത്തിയ റാലി തടസപ്പെടുത്താന്‍ മോഡിയും ഷായും ശ്രമിച്ചു. മോഡി റാലിക്ക് മുമ്ബ് സിബിഐയെ വിളിച്ച് 'എന്തെങ്കിലും ചെയ്യൂ' എന്ന് ഉത്തരവിട്ടു എന്നും മമത കൂട്ടിച്ചേര്‍ത്തു.

കമ്മീഷണര്‍ രാജീവ് കുമാറിന്റെ വീട്ടിലെത്തി നേരിട്ട് പിന്തുണയറിയിച്ച ശേഷം നടത്തിയ വാര്‍ത്താസമ്മേളനത്തിലായിരുന്നു ബംഗാള്‍ മുഖ്യമന്ത്രിയുടെ പ്രതികരണം. കളളന്‍മാരുടെ പാര്‍ട്ടിയാണ് ബിജെപിയെന്നും മമത പറഞ്ഞു. ചിട്ടികള്‍ 1980കള്‍ മുതലുണ്ട്. തങ്ങള്‍ ബിജെപിയോ സിപിഐഎമ്മോ അല്ലെന്നും മമത വ്യക്തമാക്കി.