ബി.ജെ.പിയുമായി നേരിട്ട് മത്സരിക്കുന്ന പ്രദേശങ്ങളില്‍ പ്രചാരണത്തിന് പോകാതെ എ.ഐ.സി.സി ജനറല്‍ സെക്രട്ടറി പ്രിയങ്ക ​ഗാന്ധി വെറുതെ സമയം പാഴാക്കുകയാണെന്ന് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍. ഡല്‍ഹിയില്‍ കോണ്‍​ഗ്രസിന്റെ തിരഞ്ഞെടുപ്പ് പ്രചാരണ റാലി നടക്കാനിരിക്കെയാണ് വിമര്‍ശനവുമായി കെജ്‌രിവാള്‍ രംഗത്തെത്തിയത്.

എന്തുകൊണ്ടാണ് പ്രിയങ്ക ഗാന്ധി രാജസ്ഥാനിലോ മദ്ധ്യപ്രദേശിലോ തിരഞ്ഞെടുപ്പ് പ്രചാരണത്തിന് പോകാത്തതെന്തെന്ന് കെ‌ജ്‌രിവാള്‍ ചോദിച്ചു. ഉത്തര്‍പ്രദേശില്‍ ബി.എസ്‌.പിക്കും സമാജ്‌വാദി പാര്‍ട്ടിക്കുമെതിരെയായിരുന്നു പ്രിയങ്ക പ്രചാരണം നടത്തിയത്. ഡല്‍ഹിയില്‍ ആം ആദ്മിക്കെതിരെയും. ബി.ജെ.പിയുമായി നേരിട്ട് മത്സരിക്കുന്ന പ്രദേശങ്ങളിലൊന്നും രാഹുല്‍ ​ഗാന്ധിയും പ്രിയങ്ക ​ഗാന്ധിയും പ്രചാരണത്തിന് പോകുന്നില്ലെന്നും കെജ്‌രിവാള്‍ പറഞ്ഞു.