ജമ്മു കാഷ്മീരില്‍ സുരക്ഷാസേനയുമായുണ്ടായ ഏറ്റുമുട്ടലില്‍ ഭീകരന്‍ കൊല്ലപ്പെട്ടു. ഇസ്ലാമിക് സ്‌റ്റേറ്റ് ജമ്മു കാഷ്മീര്‍ (ഐഎസ്‌ജെകെ) എന്ന ഭീകര സംഘടനയിലെ അംഗമായ ഇഷ്ഫാഖ് സോഫിയാണു കൊല്ലപ്പെട്ടത്. ഷോപ്പിയാനിലായിരുന്നു ഏറ്റുമുട്ടലെന്ന് ശ്രീനഗര്‍ ആസ്ഥാനമാക്കിയ ചിനാര്‍ കോര്‍പ്‌സ് അറിയിച്ചു. രഹസ്യവിവരത്തിന്റെ അടിസ്ഥാനത്തിലാണ് ഷോപ്പിയാനിലെ രാമനഗരി മേഖലയില്‍ തെരച്ചില്‍ ആരംഭിച്ചതെന്നും ഭീകരരാണ് ആദ്യം വെടിയുതിര്‍ത്തതെന്നും പോലീസ് അറിയിച്ചു.

സേനയുടെ തിരിച്ചടിയിലാണ് സോഫി കൊല്ലപ്പെട്ടത്. ബാരാമുള്ള ജില്ലയിലെ സോപോര്‍ സ്വദേശിയാണ് കൊല്ലപ്പെട്ട സോഫി. ഹര്‍ക്കത്തുള്‍ മുജാഹുദീനിലൂടെ ഭീകരപ്രവര്‍ത്തനം ആരംഭിച്ച ഇയാളെ, പോലീസ് ഭീകര പ്രവര്‍ത്തനങ്ങളുമായി ബന്ധപ്പെട്ട് അറസ്റ്റ് ചെയ്തിരുന്നെങ്കിലും പിന്നീട് ജാമ്യത്തില്‍ വിട്ടയയ്ക്കുകയായിരുന്നു.