സഹോദരിയുടെ വിവാഹദിവസം യുവഡോക്ടര് ജീവനൊടുക്കി, വിവാഹത്തില് പങ്കെടുക്കാന് അവധി നിഷേധിച്ച വകുപ്പ് മേധാവിയ്ക്കെതിരെ പ്രതിഷേധം
ഹരിയാനയിലെ റോത്തക്കില് യുവഡോക്ടര് ഹോസ്റ്റല് മുറിയില് ആത്മഹത്യചെയ്ത നിലയില്. റോത്തക്കിലെ പിജിഐഎംഎസ് ആശുപത്രിയില് പീഡിയാട്രിക്സില് എം.ഡി ചെയ്യുകയായിരുന്ന കര്ണാടക സ്വദേശി 30 വയസ്സുള്ള ഡോ. ഓങ്കാറാണ് വ്യാഴാഴാച രാത്രി ജീവനൊടുക്കിയത്.
കഴിഞ്ഞ ദിവസം ഓങ്കാറിന്റെ സഹോദരിയുടെ വിവാഹമായിരുന്നു. എന്നാല് വകുപ്പ് മേധാവി അവധി അനുവദിക്കാത്തതിനാല് വിവാഹത്തില് സംബന്ധിക്കാന് ഓങ്കാറിന് സാധിച്ചിരുന്നില്ല. ഈ മനോവിഷമമാണ് ആത്മഹത്യയിലേക്ക് നയിച്ചതെന്നാണ് പൊലീസ് പറയുന്നത്. സഹോദരിക്ക് സമ്മാനമായി നല്കാന് വാങ്ങിയ ദുപ്പട്ട കഴുത്തില് കുരുക്കി ഫാനില് കെട്ടിത്തൂങ്ങിയാണ് ഓങ്കാര് ജീവനൊടുക്കിയത്.
വകുപ്പ് മേധാവി ഇയാളെ വിവിധ കാരണങ്ങള് പറഞ്ഞ് അധിക്ഷേപിക്കാറുണ്ടെന്നും മാനസികമായി പീഡിപ്പിക്കാറുണ്ടായിരുന്നെന്നും സഹപ്രവര്ത്തകര് പറഞ്ഞു. 'ഓങ്കാറില് നിന്ന് ആത്മഹത്യാ കുറിപ്പൊന്നും കണ്ടെത്താന് കഴിഞ്ഞില്ലെങ്കിലും അയാളുടെ വകുപ്പ് മേധാവി നിരന്തരമായി പീഡിപ്പിക്കാറുണ്ടായിരുന്നെന്ന് ബന്ധുക്കളില് നിന്നും സുഹൃത്തുക്കളില് നിന്നും അറിയാന് സാധിച്ചു. സഹോദരിയുടെ വിവാഹത്തില് പങ്കെടുക്കാനായി ഓങ്കാറിന് അവധിയും അവര് അനുവദിച്ചില്ല', പൊലീസ് പറഞ്ഞു.
വകുപ്പ് മോധാവി ഡോ. ഗീതാ ഗത് വാലിനെതിരെ പൊലീസ് കേസെടുത്ത് അന്വേഷണം ആരംഭിച്ചു. ഇവരെ അറസ്റ്റു ചെണമെന്ന് ആവശ്യപ്പെട്ട് ഓങ്കാറിന്റെ സഹപ്രവര്ത്തകര് ഗീതയുടെ വീട്ടിലേക്ക് പ്രതിഷേധ പ്രകടനം നടത്തി.
സഹപ്രവര്ത്തകന്റെ ആത്മഹത്യയില് പ്രതിഷേധിച്ച് അനിശ്ചിതകാല സമരത്തിനൊരുങ്ങുകയാണ് മറ്റ് ഡോക്ടര്മാര്. ഓങ്കാറിന്റെ കുടുംബത്തിന് ഒരു കോടി രൂപ നഷ്ടപരിഹാരം നല്കണമെന്നും ഡോ. ഗീതയെ പുറത്താക്കണമെന്നും ആവശ്യപ്പെട്ട് ഇവര് വൈസ് ചാന്സിലര്ക്ക് കത്തയച്ചിട്ടുണ്ട്.
https://www.facebook.com/Malayalivartha