പറന്നുയര്‍ന്ന വിമാനത്തില്‍ പക്ഷിയിടിച്ച് വ്യോമസേന വിമാനത്തിന്റെ എഞ്ചിന്‍ തകരാറിലായി. ഹരിയാനയിലെ അമ്പാല എയര്‍ബേസില്‍ നിന്നും പറന്നുയര്‍ന്ന ജഗ്വാര്‍ യുദ്ധവിമാനമാണ് പക്ഷിയിടിച്ചതിനെ തുടര്‍ന്ന് തിരിച്ചിറക്കിയത്. വ്യാഴാഴ്ച നടന്ന പരീശീലന പറക്കലിനിടെയാണ് സംഭവം. എയര്‍ ബേസില്‍ നിന്നും പറന്നുയര്‍ന്ന വിമാനത്തിന്റെ രണ്ട് എഞ്ചിനുകളില്‍ ഒന്ന് പക്ഷി ഇടിച്ച് തകരുകയായിരുന്നു.
തുടര്‍ന്ന് ഇന്ധനടാങ്കും പരീശീലനത്തിന്റെ ഭാഗമായി ഘടിപ്പിച്ചിരുന്ന 10 കിലോ ഭാരം വരുന്ന ബോംബും ഉപേക്ഷിച്ച പൈലറ്റ് വിമാനം സുരക്ഷിതമായി തിരിച്ചിറക്കുകയായിരുന്നു. വിമാനത്തില്‍ നിന്നും ഇജക്റ്റ് ചെയ്ത ബോംബ് കണ്ടെടുത്തതായി അമ്പാല പൊലീസ് ഡെപ്യൂട്ടി കമീഷണര്‍ രജനീഷ് കുമാര്‍ അറിയിച്ചു. വിമാനം അപകടത്തില്‍പെടാനുള്ള സാഹചര്യങ്ങള്‍ വ്യോമസേന അന്വേഷിക്കും.