രാജ്യത്തിന് അഞ്ചുലക്ഷം കോടി ഡോളറിന്റെ സമ്പദ്‌വ്യവസ്ഥ ആ ലക്ഷ്യം ഉടന്‍ സാധ്യമാകുമെന്നും അത് ഉത്തര്‍പ്രദേശിലൂടെയായിരിക്കുമെന്നും വ്യക്തമാക്കി രംഗത്തെത്തിയിരിക്കുകയാണ് കേന്ദ്ര മന്ത്രിയും ബിജെപി അധ്യക്ഷനുമായ അമിത്ഷാ. അഞ്ചുകോടി ഡോളര്‍ സമ്പത്ത് വ്യവസ്ഥ എന്ന രാജ്യത്തിന്റെ ലക്ഷ്യം സാധ്യമാവുക ഉത്തര്‍പ്രദേശിലൂടെയായിരിക്കും. ഇതിനായി, ഒരുലക്ഷം ഡോളര്‍ സമ്പദ്വ്യവസ്ഥയായി സംസ്ഥാനത്തെ വികസിപ്പിച്ച് യു.പി. വലിയ സംഭാവന ചെയ്യുമെന്ന് തനിക്കുറപ്പുണ്ടെന്നും ഷാ പറഞ്ഞു.

സംസ്ഥാനത്തെ 65,000 കോടി രൂപയുടെ വ്യാവസായിക പദ്ധതികളുടെ രണ്ടാംഘട്ട തറക്കല്ലിടല്‍ ചടങ്ങില്‍ പങ്കെടുത്തു സംസാരിക്കുകയായിരുന്നു അദ്ദേഹം. 250 പദ്ധതികള്‍ക്കാണ് തറക്കല്ലിട്ടത്. ഒട്ടേറെ വ്യവസായികളും പരിപാടിയില്‍ പങ്കെടുത്തു. 2018ലാണ് ആദ്യഘട്ടത്തിന് തറക്കല്ലിട്ടത്. ഇത്തവണയും സംസ്ഥാനത്തേക്കു കൂടുതല്‍ നിക്ഷേപം കൊണ്ടുവരുകയാണ് ലക്ഷ്യം. അഞ്ചുവര്‍ഷത്തിനകം ഇന്ത്യയെ ലോകത്തെ ഏറ്റവും വലിയ മൂന്ന് സമ്പദ്വ്യവസ്ഥകളിലൊന്നാക്കി മാറ്റുകയാണു പ്രധാനമന്ത്രിയുടെ ലക്ഷ്യമെന്ന് അമിത് ഷാ പറഞ്ഞു. ''പ്രധാനമന്ത്രിയാകാനുള്ള വഴിയൊരുങ്ങുന്നതു യു.പി.യിലൂടെയാണെന്നു കേട്ടിട്ടുണ്ട്.

അതുപോലെ സമ്പദ്വ്യവസ്ഥയുടെ ലക്ഷ്യപൂര്‍ത്തീകരണവും യു.പി.യിലൂടെത്തന്നെയാണ് കൈവരിക്കാന്‍ പോവുന്നത്. 14ാമതു ധനക്കമ്മിഷന്‍ നിര്‍ദേശമനുസരിച്ച് സംസ്ഥാനത്തിനുള്ള ധനവിഹിതം വര്‍ധിച്ചിട്ടുണ്ട്. സംസ്ഥാനവികസനത്തില്‍ കേന്ദ്രസര്‍ക്കാരിനും ഉത്തരവാദിത്വമുണ്ട്'' അദ്ദേഹം പറഞ്ഞു. ലക്ഷം കോടി ഡോളര്‍ സമ്പദ്വ്യവസ്ഥയെന്ന ലക്ഷ്യം കൈവരിക്കാനുള്ള ശേഷിയും ആള്‍ബലവും യു.പി.ക്കുണ്ടെന്നു മുഖ്യമന്ത്രി യോഗി ആദിത്യനാഥ് നേരത്തേ പറഞ്ഞിരുന്നു.

യോഗി ആദിത്യനാഥിനെ യു.പി. മുഖ്യമന്ത്രിയായി തിരഞ്ഞെടുത്തതിനെക്കുറിച്ച് അമിത് ഷാ വിശദമാക്കി. ''ആദിത്യനാഥ് മുഖ്യമന്ത്രിയാകുമെന്ന് ആരും കരുതിയില്ല. അദ്ദേഹം ഒരു നഗരസഭപോലും ഭരിച്ചിട്ടില്ലെന്നും പിന്നെന്തുകൊണ്ടാണ് അദ്ദേഹത്തെ മുഖ്യമന്ത്രിയാക്കിയതെന്നും പലരും ചോദിച്ചു. അതുശരിയാണ്. അദ്ദേഹമൊരു ക്ഷേത്രത്തിന്റെ തലവന്‍ മാത്രമായിരുന്നു. പക്ഷേ, മോദിയും ഞാനും ആദിത്യനാഥിനെ മുഖ്യമന്ത്രിയാക്കാന്‍ തീരുമാനിച്ചു. അദ്ദേഹം കഠിനപ്രയത്‌നം ചെയ്യുന്നയാളും തന്റെ പോരായ്മകള്‍ കഠിനാധ്വാനത്തിലൂടെ മറികടക്കുന്നവനുമാണ്'' ഷാ പറഞ്ഞു. ആദിത്യനാഥ് സംസ്ഥാനത്ത് ഒട്ടേറെ മാറ്റങ്ങള്‍ കൊണ്ടുവന്നിട്ടുണ്ടെന്നും രണ്ടുവര്‍ഷത്തിനിടെ ക്രമസമാധാനം മെച്ചപ്പെടുത്തിയതിലൂടെ വികസനത്തിന്റെ ഏറ്റവും വലിയ തടസ്സമാണ് അദ്ദേഹം നീക്കിയതെന്നും ഷാ അഭിപ്രായപ്പെട്ടു.