പൂഞ്ച് മേഖലയിൽ പ്രകോപനവുമായി വീണ്ടും പാകിസ്ഥാന്‍. പാക് ഭീകരന്മാര്‍ നുഴഞ്ഞുകയറാനായി വെടിവെയ്പ്പ് നടത്തുകയാണ്. ശ്രമം തിരിച്ചറിഞ്ഞ് അതിര്‍ത്തിയില്‍ സൈന്യം തിരിച്ചടിക്കുകയാണ്. പൂഞ്ച് ജില്ലയിലെ ഷാഹ്പൂര്‍,കിരനി സെക്ടറുകളിലാണ് പാക് ഭീകരര്‍ പാകിസ്ഥാന്‍ സൈന്യത്തിന്റെ സഹായത്തോടെ അതിര്‍ത്തി നിയമലംഘനം നടത്തുന്നത്.

ഇന്ന് രാവിലെ 7.45നാണ് കനത്ത ഷെല്ലാക്രമണവും റോക്കറ്റാക്രമണവും പാക് ഭീകരരുടെ ഭാഗത്ത് നിന്നും ആരംഭിച്ചത്. ഇന്ത്യന്‍ കരസേനാ മേധാവി ബിപിന്‍ റാവത് ജമ്മുകശ്മീരിലെത്തിയതിനെതിരെയുള്ള പ്രതിഷേധവും ആക്രമണത്തിന് പിന്നിലുള്ളതായി രഹ്‌സ്യാന്വേഷണ വിഭാഗം കണ്ടെത്തിയതായി കരസേന കശ്മീര്‍ വക്താവ് ലഫ്.കേണല്‍ ദേവേന്ദര്‍ ആനന്ദ് അറിയിച്ചു.

ജൂലൈ മാസത്തില്‍ ഒരു പിഞ്ചുകുഞ്ഞടക്കം 10പേര്‍ ആക്രമണത്തിൽ കൊല്ലപ്പെട്ടിരുന്നു. രണ്ടുജില്ലകളിലായി പാകിസ്ഥാന്‍ നിരന്തരം പ്രകോപനങ്ങളാണ് സൃഷ്ടിക്കുന്നത്. സൈനികമേധാവിയുടെ യാത്രയില്‍ യൂണിറ്റുകളിലെ തയ്യാറെടുപ്പ്,വെടിനിര്‍ത്തല്‍ കരാര്‍ ലംഘനത്തിനെതിലെ ഇന്ത്യന്‍ ഭാഗത്തുനിന്നുള്ള ഒരുക്കങ്ങളള്‍, പാകിസ്ഥാന് വേണ്ടി രഹസ്യമായി ആക്രമണം നടത്തുന്ന ട്രൂപ്പുകള്‍ എന്നീ കാര്യങ്ങളാണ് ചര്‍ച്ചചെയ്യപ്പെട്ടതെന്നും വക്താവ് ലഫ്.കേണല്‍ ദേവേന്ദര്‍ ആനന്ദ് അറിയിച്ചു.