കുഞ്ചപ്പന ചെക്‌പോസ്റ്റിനടുത്താണ് യാത്രക്കാര്‍ ആനയ്ക്ക് മുന്നില്‍ പെട്ടത്. ചെക്‌പോസ്റ്റിന് സമീപത്തെ വനഭാഗത്തേക്ക് നടക്കുകയായിരുന്ന ആനയുടെ മുന്നിലേക്ക് ബൈക്കുമായി യാത്രികര്‍ എത്തിയത്. ബൈക്ക് ശ്രദ്ധയില്‍പെട്ടതോടെ യാത്രക്കാര്‍ക്ക് നേരെ പാഞ്ഞ ആനയില്‍ നിന്നും രക്ഷനേടാന്‍ യാത്രക്കാര്‍ പിറകെ വന്ന ലോറിക്ക് പിന്നില്‍ ഒളിക്കാന്‍ ശ്രമിച്ചു. ആന ഇവര്‍ക്ക് അടുത്തേക്ക് നീങ്ങുന്നത് തടയാന്‍ ലോറി ഡ്രൈവര്‍ നടത്തിയ സമയോചിതമായ ഇടപെടലാണ് കാട്ടാനയുടെ ആക്രമണത്തില്‍ നിന്നും യാത്രക്കാരെ രക്ഷിച്ചത്‌. കുറച്ച് ദിവസങ്ങൾക്ക് മുൻപാണ് ഇതേസ്ഥലത്ത് കാട്ടാനയുടെ ആക്രമണത്തിൽ ഒരാള്‍ക്ക് പരിക്കേറ്റത് . മൂത്തേടം ഉച്ചക്കുളം കോളനിയിലെ കുട്ടനാണ് പരിക്കേറ്റത്. തിങ്കളാഴ്ച വൈകുന്നേരം ആറോടെ പടുക്ക വനത്തിൽ വച്ചാണ് ആക്രമണമുണ്ടയത്. വനവിഭവങ്ങൾ ശേഖരിച്ച് തിരിച്ചു വീട്ടിലേക്ക് വരുന്നതിനിടെ വീടിനോട് അൽപ്പം അകലെവച്ചായിരുന്നു ആനയുടെ ആക്രമണം. കൂടെയുള്ളവർ ബഹളം വച്ചാണ് ആനയെ പിന്തിരിപ്പിച്ചത്. വിവരമറിയിച്ചതിന് പിന്നാലെ വനപാലകരെത്തിയാണ് കുട്ടനെ ജീപ്പിൽ നിലമ്പൂർ ജില്ലാ ആശുപത്രിയിലെത്തിച്ചത്. തുമ്പിക്കൈ കൊണ്ടുള്ള അടിയേറ്റ് കുട്ടന്റെ വലതു തോളെല്ല് പൊട്ടിയിട്ടുണ്ട്. വാരിയെല്ലിനും ക്ഷതമുണ്ട്.