പോക്‌സോ കേസില്‍ ഒഡീഷയിലെ 40-വയസ്സുകാരനായ ഒരു നെയ്ത്തുകാരന് ഗുജറാത്തിലെ കോടതി വധശിക്ഷ വിധിച്ചു. ഭാര്യയുടെ ആദ്യ വിവാഹത്തിലെ പന്ത്രണ്ടുകാരി മകളെ നിരന്തരം ബലാത്സംഗം ചെയ്യുകയും ഗര്‍ഭിണിയായപ്പോള്‍ ശ്വാസംമുട്ടിച്ച് കൊലപ്പെടുത്തുകയും ചെയ്തതിനാണ് ഒഡീഷ ശ്വദേശിയായ തുക്‌നാദാസിന് കോടതി കൊലക്കയര്‍ വിധിച്ചത്.

2017 ജൂണ്‍ 26-ന് പെണ്‍കുട്ടിയെ ഡ്യൂമാസിലേക്ക് ഓട്ടോയില്‍ കയറ്റി കൊണ്ടു പോയായിരുന്നു പിതാവ് കൊലപ്പെടുത്തിയത്. അതിന് ശേഷം മൃതദേഹം ലാല്‍ കമല്‍ തടാകത്തില്‍ ഇടുകയും ചെയ്തു. പെണ്‍കുട്ടിയെ കാണാതായതിനെ തുടര്‍ന്ന് അയല്‍ക്കാര്‍ അന്വേഷിച്ചപ്പോള്‍ മകള്‍ക്ക് കാന്‍സര്‍ ബാധിച്ചിരിക്കുകയാണെന്നും ആശുപത്രിയില്‍ പ്രവേശിപ്പിച്ചിരിക്കുകയാണെന്നും മറുപടി നല്‍കി. എന്നാല്‍ ആശുപത്രിയുടെ പേര് ചോദിച്ചവരോട് അത് പറയാന്‍ വിസമ്മതിച്ചു. ഇത് കൂടാതെ മകളെ കാണ്മാനില്ലെന്ന് ഇയാള്‍ പോലീസില്‍ പരാതിയും നല്‍കി.

ജൂണ്‍ 30-ന് ഡ്യൂമാസ് പോലീസാണ് പെണ്‍കുട്ടിയുടെ മൃതദേഹം കണ്ടെത്തിയത്. ഡ്യൂമാസ് ലാല്‍ ടാലവില്‍ നിന്നും റാംജി ഫാമിലേക്കു പോകുന്ന റോഡില്‍ നിന്നുമായിരുന്നു മൃതദേഹം കിട്ടിയത്. പെണ്‍കുട്ടിയെ ശ്വാസംമുട്ടിച്ചാണ് കൊലപ്പെടുത്തിയതെന്നും മരിക്കുമ്പോള്‍ പെണ്‍കുട്ടി ആറു മാസം ഗര്‍ഭിണി ആയിരുന്നു എന്നും പോസ്റ്റുമാര്‍ട്ടം റിപ്പോര്‍ട്ടില്‍ പറഞ്ഞിട്ടുണ്ട്.

2017 ജൂലൈ 5-ന് ഇയാളെ ചോദ്യം ചെയ്യവേ മകള്‍ക്ക് ഒരാളുമായി ശാരീരിക ബന്ധം ഉണ്ടായിരുന്നു അതുകൊണ്ട് താന്‍ കൊലപ്പെടുത്തി എന്നാണ് ഇയാള്‍ പോലീസിന് നല്‍കിയ മൊഴി. ഡിഎന്‍എ പരിശോധനയില്‍ പെണ്‍കുട്ടിയുടെ വയറ്റില്‍ വളര്‍ന്ന കുഞ്ഞിന്റെ ഡിഎന്‍എ യ്ക്ക് പിതാവിന്റേതിനോട് സാമ്യം വന്നതോടെ് ഇയാളെ അറസ്റ്റ് ചെയ്യുകയായിരുന്നു. ഇതോടെയാണ് പിതാവ് തന്നെയാണ് പെണ്‍കുട്ടിയെ ബലാത്സംഗം ചെയ്തതെന്ന നിഗമനത്തിലേക്ക് പോലീസ് എത്തിയത്.

ആറ് മാസത്തോളമാണ് ഇയാള്‍ വളര്‍ത്തുമകളെ തന്റെ ഇംഗിതത്തിന് ഇരയാക്കിയത്. മകള്‍ക്ക് കാന്‍സര്‍ ബാധിച്ചിരിക്കുകയാണെന്നും ആശുപത്രിയില്‍ പ്രവേശിപ്പിച്ചിരിക്കുകയാണെന്നും അയല്‍ക്കാരോട് പറഞ്ഞശേഷം ആശുപത്രിയുടെ പേര് ചോദിച്ചവരോട് അത് പറയാന്‍ വിസമ്മതിച്ചതും അതിനു ശേഷം മകളെ കാണ്മാനില്ലെന്ന് ഇയാള്‍ പോലീസില്‍ പരാതി നല്‍കിയതുമെല്ലാം ഇയാളുടെ ക്രിമിനല്‍ സ്വഭാവത്തെയാണ് കാണിക്കുന്നതെന്ന് കോടതി പറഞ്ഞു. വിധി സമൂഹത്തിന് താക്കീതായി മാറണമെന്ന് ഇയാള്‍ക്ക് വധശിക്ഷ വിധിച്ചുകൊണ്ട് സ്പെഷ്യല്‍ പോക്‌സോ കോടതി ജസ്റ്റീസ് പിഎസ് കല പറഞ്ഞു.