യു.എസ് പ്രസിഡന്റ് ഡൊണാള്‍ഡ് ട്രംപ് ഇന്ത്യയിലെത്തുമ്പോള്‍ എല്ലാ കാര്യങ്ങളും ചര്‍ച്ചയാകുകയാണ്. ട്രംപ് താമസിക്കുന്ന ന്യൂഡല്‍ഹി ഐ.ടി.സി മൗര്യ ഹോട്ടലില്‍ ഇനിയുള്ള രണ്ടു ദിവസം യു.എസില്‍ നിന്നുള്ളവര്‍ മാത്രമായിരിക്കും താമസക്കാര്‍. സുരക്ഷാകാരണങ്ങളാല്‍ മറ്റു ബുക്കിംഗുകള്‍ റദ്ദാക്കി. ട്രംപിന്റെ സുരക്ഷാസേന ഹോട്ടലിന്റെ നിയന്ത്രണം ഏറ്റെടുത്തു. സുരക്ഷാ വിവരങ്ങള്‍ രഹസ്യമാണ്. മാദ്ധ്യമങ്ങളുമായി ഒന്നും പങ്കുവയ്ക്കരുതെന്നാണ് നിര്‍ദ്ദേശം .ആഗ്രയില്‍ താജ്മഹല്‍ സന്ദര്‍ശനം കഴിഞ്ഞശേഷം തിങ്കളാഴ്ച രാത്രിയാണ് ട്രംപും പത്നി മെലാനിയയും മകള്‍ ഇവാന്‍കയും അടക്കമുള്ളവര്‍ ഹോട്ടലില്‍ എത്തുക. പരമ്പരാഗത രീതിയില്‍ സ്വാഗതമോതും. അദ്ദേഹത്തിനൊപ്പമുള്ള ഔദ്യോഗിക സംഘത്തിന് ആവശ്യമായി വരികയാണെങ്കില്‍ നല്‍കാന്‍ തൊട്ടടുത്ത പഞ്ചനക്ഷത്രഹോട്ടലായ താജിലും മുറി തയ്യാര്‍. ചൊവ്വാഴ്ച ഡല്‍ഹിയില്‍ ട്രംപിന് തിരക്കേറിയ പരിപാടികളുള്ളതിനാല്‍ ഹോട്ടലില്‍ അധികനേരം ചെലവഴിക്കില്ലെന്നാണ് അറിയുന്നത്.

14-ാം നിലയിലെ ചാണക്യ ട്രംപും കുടുംബവും താമസിക്കുക 14-ാം നിലയിലെ 'ചാണക്യ' എന്ന പ്രസിഡന്‍ഷ്യല്‍ സ്വീറ്റില്‍. ബുള്ളറ്റ്പ്രൂഫ് ജനാലകളുള്ള ഈ മുറിയിലേക്ക് ട്രംപിന് നേരിട്ട് കയറിവരാന്‍ പ്രത്യേക എലിവേറ്ററുണ്ട്.

ഭക്ഷണം തയ്യാറാക്കാന്‍ യു.എസില്‍ നിന്ന് പ്രത്യേക സംഘമെത്തിയിട്ടുണ്ട്. കടല്‍ വിഭവങ്ങളോടെയാണ് ട്രംപിന് ഏറെ താത്പര്യം. എങ്കിലും ഇന്ത്യന്‍ ഭക്ഷണം രുചിക്കാന്‍ ഹോട്ടലിലെ പ്രശസ്തമായ ബുഖാര റസ്റ്റോറന്റില്‍ ട്രംപ് എത്തിയേക്കും.

മുഖം മിനുക്കി ഡല്‍ഹി വിമാനത്താവളത്തില്‍ നിന്ന് ഹോട്ടല്‍ വരെയും അവിടെ നിന്ന് മദ്ധ്യ ഡല്‍ഹിയിലേക്കുമുള്ള റോഡുകള്‍ ടാര്‍ ചെയ്ത് സുന്ദരമാക്കി. മെലാനിയ ട്രംപിന്റെ സ്‌കൂള്‍ സന്ദര്‍ശനം കണക്കിലെടുത്ത് ദക്ഷിണ ഡല്‍ഹിയിലെ നാനാക് പുരിയിലേക്കുള്ള റോഡുകളും നന്നാക്കി. തുടര്‍ച്ചയായി കാറ്റുവീശുന്നതും അന്തരീക്ഷ മലിനീകരണം ഉള്ളതിനാലും നഗരം വൃത്തിയായി സൂക്ഷിക്കാന്‍ ബുദ്ധിമുട്ടുകയാണ്. പൊടിമൂടിയ വൃക്ഷങ്ങള്‍ വെള്ളം തളിച്ച് വൃത്തിയാക്കുന്നുണ്ട്. 10,000 പൂച്ചെട്ടികള്‍ രാഷ്ട്രപതി ഭവന്‍, പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തുന്ന ഹൈദരാബാദ് ഹൗസ്, ട്രംപിന്റെ വാഹനവ്യൂഹം കടന്നു പോകുന്ന റോഡുകള്‍ എന്നിവിടങ്ങളില്‍ ട്യൂലിപ്പ്, ഡാലിയാ പൂക്കള്‍ വിരിഞ്ഞു നില്‍ക്കും. ഇതിനായി 10,000 പൂച്ചെട്ടികള്‍ മുനിസിപ്പല്‍ അധികൃതര്‍ തയ്യാറാക്കി.

അതേസമയം ഇന്ത്യന്‍ സന്ദര്‍ശനത്തിനായി അമേരിക്കന്‍ പ്രസിഡന്റ് ഡോണള്‍ഡ് ട്രംപും ഭാര്യ മെലാനിയയും പുറപ്പെട്ടു. ഇന്ത്യയിലേക്ക് തിരിക്കുന്നത് ആവേശത്തോടെയെന്ന് ഡോണള്‍ഡ് ട്രംപ് പ്രതികരിച്ചു. തന്റെ സന്ദര്‍ശനം ഇരു രാഷ്ട്രങ്ങള്‍ക്കും ഗുണകരമാകുമെന്നും തന്റെ സ്വീകരണറാലി വലിയ സംഭവമാകുമെന്നും ട്രംപ് പറഞ്ഞു.

ലോകത്തെ ഏറ്റവും സുരക്ഷിത വിമാനമായ എയര്‍ഫോഴ്സ് വണ്ണില്‍ മേരിലാന്‍ഡ് സൈനിക വിമാനത്താവളത്തില്‍ നിന്നാണ് ട്രംപ് ഇന്ത്യയിലേക്ക് പുറപ്പെട്ടത്. ഇടയ്ക്ക് ജര്‍മനിയിലെ മെയിന്‍സിലുള്ള യു എസ് സൈനികത്താവളത്തില്‍ ട്രംപ് ഇറങ്ങും. ഇന്ന് രാവിലെ ഇന്ത്യന്‍ സമയം 4. 25 ന് ജര്‍മനിയില്‍ നിന്ന് യാത്ര തുടരുന്ന ട്രംപ് 11. 40 ന് അഹമ്മദാബാദിലെ സര്‍ദാര്‍ പട്ടേല്‍ അന്താരാഷ്ട്ര വിമാനത്താവളത്തില്‍ എത്തും.


രണ്ട് ദിവസത്തെ ഇന്ത്യന്‍ സന്ദര്‍ശനത്തിനായി എത്തുന്ന ട്രംപിന് നാളെ ഉച്ചയോടെ അഹമ്മദാബാദില്‍ വന്‍ സ്വീകരണം നല്‍കും. ദില്ലിയില്‍ ചൊവ്വാഴ്ചയാകും ഔദ്യോഗിക കൂടിക്കാഴ്ചകള്‍ നടക്കുക. 36 മണിക്കൂര്‍ നീണ്ട് നിലക്കുന്ന സന്ദര്‍ശനത്തിനെത്തുന്ന ട്രംപിനെ സ്വീകരിക്കാന്‍ അഹമ്മദാബാദും ആഗ്രയും ദില്ലിയും ഒരുങ്ങി കഴിഞ്ഞു.ഭാര്യ മെലാനിയ ട്രംപ് മകള്‍ ഇവാങ്ക മരുമകന്‍ ജാറദ് കഷ്നര്‍ എന്നിവര്‍ക്കൊപ്പം മന്ത്രിമാരും ദേശീയ സുരക്ഷാ ഉപദേഷ്ടാവും ട്രംപിനൊപ്പം എത്തും. നൂറോളം മാധ്യമപ്രവര്‍ത്തരും ട്രംപിനൊപ്പം ഇന്ത്യയിലേക്ക് വരുന്നുണ്ട്.