ലോക്ക് ഡൗണ്‍ ഇന്ത്യക്ക് 100 % ഗുണകരമായി എന്നതരത്തില്‍ റിപ്പോര്‍ട്ട് പുറത്തുവരുമ്പോള്‍ ഇന്ത്യക്കാരുടെ പ്രതിരോധ ശേഷി വലിയ ചര്‍ച്ചയാകുന്നുണ്ട്. ലോക്ക് ഡൗണും പ്രതിരോധശേഷിയും മരണനിരക്ക് കുറക്കുന്നതില്‍ പ്രധാന പങ്കുവഹിക്കുന്നുണ്ട് എന്നാണ് കേന്ദ്രം വ്യക്തമാക്കുന്നത്. അതുപോലെതന്നെ കോവിഡ് 19നെ തുടര്‍ന്ന് പ്രഖ്യാപിച്ച ലോക്ക്ഡൗണില്‍ രാജ്യത്തെ മരണ നിരക്കും കുറഞ്ഞു. റെയില്‍, റോഡ് അപകടങ്ങളെ തുടര്‍ന്ന് ഉണ്ടാവുന്ന മരണത്തിലും കുറവ് വന്നിട്ടുണ്ട്. ലോക്ക്ഡൗണ്‍ മാറുമ്പോള്‍ മരണ നിരക്കിലും വര്‍ദ്ധനവുണ്ടാവുമെന്ന് ആരോഗ്യ വിദഗ്ധര്‍ പറയുന്നു.

ലോക്ക്ഡൗണിനെ തുടര്‍ന്ന് വലിയ തോതിലാണ് രാജ്യത്ത് മരണ നിരക്ക് കുറയുന്നത്. ലോകരാജ്യങ്ങളെ അപേക്ഷിച്ച് കോവിഡ് മരണ നിരക്കും കുറഞ്ഞിട്ടുണ്ട്. മൂന്ന് ശതമാനത്തില്‍ താഴെ മാത്രമാണ് കോവിഡ് മരണനിരക്കെന്ന് കേന്ദ്ര സര്‍ക്കാരും വ്യക്തമാക്കുന്നു. രോഗം സ്ഥിരീകരിക്കുന്നവരില്‍ പ്രതിരോധ ശേഷി കൂടുതലാവുന്നതാണ് രാജ്യത്ത് മരണ നിരക്ക് കുറയുന്നതിന്റെ കാരണമായി ആരോഗ്യ വിദഗ്ധര്‍ ചൂണ്ടിക്കാട്ടുന്നത്. ഇന്ത്യയില്‍ 5,20,000 പേര്‍ക്ക് കോവിഡ് പരിശോധന നടത്തിയതില്‍ 4 ശതമാനം പേര്‍ക്കാണ് രോഗം സ്ഥിരീകരിച്ചത്. ഇത് ഇന്ത്യയുടെ കോവിഡ് പ്രതിരോധ പ്രവര്‍ത്തനങ്ങള്‍ക്ക് നേട്ടമാണ്. അമേരിക്കയില്‍ പരിശോധന നടത്തിയതില്‍ 18 ശതമാനം പേര്‍ക്ക് രോഗം കണ്ടെത്തി.

മാത്രമല്ല ഇന്ത്യയില്‍ റോഡ്, റെയില്‍വെ അപകടങ്ങളും കുറഞ്ഞു. 2018ല്‍ മാത്രം രാജ്യത്ത് 1,51,000 പേരാണ് വിവിധ റോഡ് അപകടങ്ങളില്‍ മരിച്ചത്. ഈ വര്‍ഷം ലോക്ക്ഡൗണ്‍ പ്രഖ്യാപിച്ചിരിക്കുന്ന മെയ് 3 വരെ ആകുമ്പോള്‍ അപകട നിരക്കില്‍ 18 ശതമാനത്തിന്റെ കുറവ് രേഖപ്പെടുത്തുമെന്നാണ് ഗതാഗത മന്ത്രാലയത്തിന്റെ കണക്ക് കൂട്ടല്‍.

മറ്റ് രോഗങ്ങള്‍ ബാധിച്ച് മരിക്കുന്നവരുടെ എണ്ണത്തിലും മാര്‍ച്ച് 25 മുതല്‍ കുറവുണ്ടായി. രാജ്യത്ത് കൊലപാതക കേസുകളുടെ എണ്ണത്തിലും ഈ ലോക്ക്ഡൗണ്‍ കാലത്ത് കുറവ് രേഖപ്പെടുത്തി. മരണ നിരക്ക് കുറഞ്ഞതായി രാജ്യത്തെ വിവിധ ശ്മശാനങ്ങളിലെ ജോലിക്കാരും വ്യക്തമാക്കി. അതേസമയം ലോക്ക്ഡൗണ്‍ തുടരുന്ന സാഹചര്യത്തില്‍ പലയിടങ്ങളിലും മരണ കണക്കുകള്‍ കൃത്യമായി രേഖപ്പെടുത്താന്‍ സാധിക്കുന്നില്ലെന്നും ആരോഗ്യ പ്രവര്‍ത്തകര്‍ പറയുന്നു.