അസിം പ്രേംജി സര്‍വകലാശാലയിലെ ബിരുദാനന്തര ബിരുദ വിദ്യാര്‍ത്ഥിയായ സുര്യശ്രീ ഹര്‍ഷ തേജ വിവരാവകാശ നിയമ പ്രകാരം പി.എം കെയര്‍ ഫണ്ടിന്റെ വിവരങ്ങള്‍ തേടിയതിന് പി.എം കെയര്‍ പൊതുസ്ഥാപനമല്ലെന്ന് പ്രധാനമന്ത്രിയുടെ ഓഫീസ് മറുപടി നല്‍കി. കൊവിഡിന്റെ പശ്ചാത്തലത്തില്‍ കേന്ദ്രസര്‍ക്കാര്‍ ആരംഭിച്ച പി.എം കെയേര്‍സ് പൊതുസ്ഥാപനമല്ലെന്നും അതിനാല്‍ ഇത് സംബന്ധിച്ച വിവരങ്ങള്‍ വിവരാവകാശ നിയമപ്രകാരം നല്‍കാനാകില്ലെന്നും പ്രധാനമന്ത്രിയുടെ ഓഫീസ് വ്യക്തമാക്കി.

ഇക്കൊല്ലംഏപ്രില്‍ ഒന്നിനാണ് തേജ വിവരാവകാശ അപേക്ഷ സമര്‍പ്പിച്ചത്. ഇതുമായി ബന്ധപ്പെട്ട സര്‍ക്കാര്‍ ഉത്തരവുകളുടെ പകര്‍പ്പും തേജ ആവശ്യപ്പെട്ടിരുന്നു. മെയ് 29-ന് തേജയ്ക്ക് മറുപടി ലഭിച്ചു. പി.എം കെയര്‍ വിവരാവകാശ നിയമത്തിന്റെ പരിധിയില്‍ വരില്ലെന്നായിരുന്നു മറുപടി. പദ്ധതിയുമായി ബന്ധപ്പെട്ട വിവരങ്ങള്‍ വെബ്സൈറ്റില്‍ ഉള്‍പ്പെടുത്തിയിട്ടുണ്ടെന്നും ആര്‍.ടി.ഐ അപേക്ഷയ്ക്കുള്ള മറുപടിയില്‍ പറയുന്നു.

പി.എം കെയര്‍ പൊതുസ്ഥാപനമല്ലെങ്കില്‍ പിന്നെ എന്താണെന്നും തേജ ചോദിച്ചു. പ്രധാനമന്ത്രിയുടെ ഓഫീസില്‍ നിന്ന് ലഭിച്ച മറുപടിക്കെതിരെ അപ്പീല്‍ പോകുമെന്ന് തേജ പ്രതികരിച്ചു. പി.എം കെയര്‍ പൊതുസ്ഥാപനമല്ലെന്ന് വ്യക്തമാക്കുന്നതോട് കൂടി ഇതിന് യാതൊരു സുതാര്യതയുമില്ലെന്നാണ് സര്‍ക്കാര്‍ പറയുന്നതെന്നും തേജ കൂട്ടിച്ചേര്‍ത്തു.