ഒരു സാധാരണക്കാരിയ വനിതാ പോലീസ് കോണ്‍സ്റ്റബിളിന്റെ അസാധാരണ കഥ അതാണ് സുനിതാ യാദവിന് സംഭവിച്ചത്. കഴിഞ്ഞ ബുധനാഴ്ച്ച ഗുജറാത്തിലെ സൂറത്തിലായിരുന്നു സംഭവം. ലോക്ക്ഡൗണ്‍ നിയന്ത്രണങ്ങള്‍ ലംഘിച്ചതിന് മന്ത്രി പുത്രനെയും സുഹൃത്തുകളെയെയും സുനിത തടഞ്ഞു. തുടര്‍ന്ന് തര്‍ക്കമുണ്ടായി. എന്നാല്‍ മന്ത്രി പുത്രനാണെന്ന് അറിഞ്ഞിട്ടും നിയമവിട്ടു കളിക്കാന്‍ ഈ വനിതാ കോണ്‍സ്റ്റബള്‍ തയാറായില്ല. അവര്‍ക്കെതിരെ കേസ് രജിസ്റ്റര്‍ ചെയ്തു അറസ്റ്റു ചെയ്തു. വിവാദമായ ഈ സംഭവത്തില്‍ സ്ഥലം മാറ്റം നല്‍കികൊണ്ടാണ് ഭരണകൂടം അവരെ പിന്തുണച്ചത്!.

സംസ്ഥാന ആരോഗ്യമന്ത്രിയും വാരാഛ റോഡ് എംഎല്‍എയുമായ കുമാര്‍ കാനാനിയുടെ മകന്‍ പ്രകാശ് കാനാനിയെ കോണ്‍സ്റ്റബിള്‍ സുനിത യാദവ് തടഞ്ഞതാണ് സ്ഥലംമാറ്റത്തില്‍ കലാശിച്ചത്. യാത്രാനിയന്ത്രണമുള്ള സമയത്ത് കറങ്ങാനിറങ്ങിയതു കൂടാതെ മാസ്‌ക് ധരിക്കാത്തതും ചൂണ്ടിക്കാട്ടിയതാണ് തര്‍ക്കത്തിനിടയാക്കിയത്. ലോക്ക് ഡൗണ്‍ നിയന്ത്രണങ്ങള്‍ ലംഘിച്ചതിനെ തുടര്‍ന്ന് പ്രകാശിന്റെ സുഹൃത്തുക്കളെയാണ് ആദ്യം പോലീസ് തടഞ്ഞത്. ഇവര്‍ പ്രകാശിനെ വിളിച്ചു വരുത്തുകയായിരുന്നു. മന്ത്രിയുടെ ഔദ്യോഗിക വാഹനത്തിലാണ് പ്രകാശ് എത്തിയത്. 365 ദിവസം ഇതേ സ്ഥലത്ത് തന്നെ സുനിതയെ നിര്‍ത്തിക്കുമെന്ന് പ്രകാശ് ഭീഷണിയുയര്‍ത്തുന്നതിന്റെ ശബ്ദരേഖ സാമൂഹിക മാധ്യമങ്ങളില്‍ പ്രചരിക്കുന്നുണ്ട്. താന്‍ ആരുടേയും അടിമയല്ലെന്നുള്ള കോണ്‍സ്റ്റബിളിന്റെ മറുപടിയും ശബ്ദരേഖയിലുണ്ട്.

സുനിതയെ പിന്നീട് പോലീസ് ആസ്ഥാനത്തേക്ക് സ്ഥലം മാറ്റി. പ്രകാശ് കാനാനിയേയും സുഹൃത്തുക്കളെയും ഞായറാഴ്ച അറസ്റ്റ് ചെയ്‌തെങ്കിലും പിന്നീട് ജാമ്യത്തില്‍ വിട്ടയച്ചു. സംഭവത്തെ കുറിച്ചുള്ള അന്വേഷണത്തിന് സൂറത്ത് പോലീസ് കമ്മിഷണര്‍ ആര്‍ ബി ബ്രഹ്മഭട്ട് ശനിയാഴ്ച ഉത്തരവിട്ടിരുന്നു. സംഭവത്തെ തുടര്‍ന്ന് സുനിത യാദവ് അവധിയില്‍ പ്രവേശിച്ചിരിക്കുകയാണ്.