അച്ഛനും മകനും പോലീസ് കസ്റ്റഡിയില്‍ മരിച്ചതിനെത്തുടര്‍ന്നാണ് തൂത്തുക്കുടിയിലെ സാത്താന്‍കുളം എന്ന പേര് കൂടുതല്‍ കേള്‍ക്കാന്‍ തുടങ്ങിയത്. ഇതോടെ നാടിന്റെ പേരുമാറ്റണമെന്ന ആവശ്യവുമായി എത്തിയിരിക്കുകയാണ് ആ നാട്ടുകാര്‍ . സാത്താന്‍കുളത്തെ വ്യാപാരികളായ ജയരാജും മകന്‍ ബെന്നിക്‌സുമാണ് കസ്റ്റഡിയില്‍ മരിച്ചത്. ഇവര്‍ക്ക് ക്രൂരപീഡനമേല്‍ക്കേണ്ടി വന്നത് സാത്താന്‍കുളം പോലീസ് സ്റ്റേഷനിലാണ്. സാത്താന്‍കുളം എന്ന പേരു കേള്‍ക്കുമ്പോള്‍ പിശാചാണ് (സാത്താന്‍) എല്ലാവരുടെയും മനസ്സിലെത്തുകയെന്നും അതിനാല്‍ നാടിന്റെ പേര് മാറ്റണമെന്നുമാണ് നാട്ടുകാരുടെ ആവശ്യം.

''നാടിന്റെ പേരില്‍ത്തന്നെ പിശാചുണ്ട്. മരണവും കൊലപാതകങ്ങളും നടക്കുമ്പോള്‍ സാത്താനാണ് മനസ്സിലെത്തുന്നത്'' - തദ്ദേശവാസിയായ ഗണേശ മൂര്‍ത്തി പറയുന്നു. സാത്താന്‍ എന്ന പദത്തിന്റെ അര്‍ഥം ഇംഗ്‌ളീഷിലും തമിഴ് ഉള്‍പ്പെടെ പല ഇന്ത്യന്‍ ഭാഷകളിലും പിശാച് എന്നാണെന്നും തൂത്തുക്കുടി കസ്റ്റഡി മരണത്തോടെ സാത്താന്‍കുളം ലോകശ്രദ്ധയിലെത്തിയിട്ടുണ്ടെന്നും പ്രദേശത്തെ അഭിഭാഷകന്‍ എ.കെ വേണുഗോപാല്‍ പറഞ്ഞു. '17-ാം നൂറ്റാണ്ടില്‍ ഈ പ്രദേശം തിരുകൊളുന്തുപുരം അല്ലെങ്കില്‍ വീരമാര്‍ത്താണ്ഡനല്ലൂര്‍ എന്നാണ് അറിയപ്പെട്ടിരുന്നത്. തെക്കന്‍ തമിഴ്നാട്ടിലെ പ്രാദേശികഭാഷയില്‍ സാത്തു എന്നാല്‍ കാളവണ്ടിയില്‍ സാധനങ്ങള്‍ കൊണ്ടുപോകുന്നതുമായി ബന്ധപ്പെട്ട വാക്കാണ്. കുളം എന്നാല്‍ ചന്ത എന്നാണ്. സാത്തുകുളം എന്ന പേര് കാലാന്തരത്തില്‍ സാത്താന്‍കുളമായി പരിണമിച്ചതായിരിക്കാം എന്നാണ് അനുമാനിക്കുന്നത്''- അഡ്വ. വേണുഗോപാല്‍ പറഞ്ഞു. വര്‍ഷങ്ങള്‍ക്കുമുമ്പ് ഇന്ത്യയും ശ്രീലങ്കയും തമ്മില്‍ വാണിജ്യ ബന്ധമുണ്ടായിരുന്ന ഇടമായിരുന്നു ഇതെന്നാണ് ചരിത്രകാരന്‍മാര്‍ പറയുന്നത്.

അതേസമയം സാത്താന്‍കുളത്തിനെപ്പറ്റി മറ്റൊരു കഥകൂടി പ്രചരിക്കുന്നുണ്ട്. പാണ്ഡ്യരാജാവ് കുലശേഖര പാണ്ഡ്യന്റെ ഭരണകാലത്ത് ഈ പ്രദേശം സാത്താന്‍ സാംബവാന്‍ എന്ന യുവാവിന്റെ അധീനതയിലായിരുന്നെന്നും അയാള്‍ നാട്ടിലെ യുവതിയുമായി പ്രണയത്തിലായെന്നും വിവരമറിഞ്ഞ യുവതിയുടെ രക്ഷിതാക്കള്‍ സാത്താന്‍ സാംബവാനെ കൊല ചെയ്‌തെന്നുമാണ് ഐതിഹ്യം. കഥകള്‍ ഇങ്ങനെ പലതുണ്ടെങ്കിലും തങ്ങളുടെ സ്ഥലത്തിന്റെ പേര് ശുഭസൂചകമല്ലെന്നും അതുകൊണ്ടുതന്നെ നാടിന്റെ പഴയ പേര് തിരിച്ചുനല്‍കാന്‍ നടപടി എടുക്കണമെന്നും ആവശ്യപ്പെട്ടാണ് പ്രദേശവാസികള്‍ രംഗത്തെത്തിയത് . സാത്താന്‍കുളം എന്ന പേരുമാറ്റി പുതിയ പേര് ഗസറ്റില്‍ വിജ്ഞാപനം ചെയ്യണമെന്നാണ് ഇവരുടെ ആവശ്യം.