രാജസ്ഥാനില്, നേതൃമാറ്റം ആവശ്യപ്പെട്ടതിനെ തുടര്ന്ന് ഉപമുഖ്യമന്ത്രി സ്ഥാനത്തുനിന്നും പിസിസി അധ്യക്ഷ സ്ഥാനത്തുനിന്നും പുറത്താക്കപ്പെട്ട സച്ചിന് പൈലറ്റ് ഇന്ന് ഭാവി പരിപാടികള് പ്രഖ്യാപിക്കും.. വിനാശകാലേ വിപരീത ബുദ്ധി 'പൈലറ്റ്' പറന്നുപോയാല് പണി കിട്ടുന്നത് കോണ്ഗ്രസിന് , നേട്ടം കൊയ്യാന് ബി ജെ പി
രാജസ്ഥാനില്, നേതൃമാറ്റം ആവശ്യപ്പെട്ടതിനെ തുടര്ന്ന് ഉപമുഖ്യമന്ത്രി സ്ഥാനത്തുനിന്നും പിസിസി അധ്യക്ഷ സ്ഥാനത്തുനിന്നും പുറത്താക്കപ്പെട്ട സച്ചിന് പൈലറ്റ് ഇന്ന് ഭാവി പരിപാടികള് പ്രഖ്യാപിക്കും. ഇന്ന് രാവിലെ പത്തിന് വിളിച്ചു ചേര്ത്ത വാര്ത്ത സമ്മേളനത്തില് അദ്ദേഹം തുടര് നടപടികള് പ്രഖ്യാപിക്കുമെന്നാണ് സൂചന. അതിനിടെ സച്ചിന് പൈലറ്റുമായി ബന്ധപ്പെട്ട് ഭാവി തന്ത്രങ്ങള്ക്ക് രൂപപ്പെടുത്താന് ബിജെപി ജ്യോതിരാധിത്യ സിന്ധ്യയെ ചുമതലപ്പെടുത്തിയതായും റിപ്പോര്ട്ടുകള് ഉണ്ട്. സച്ചിന് പൈലറ്റിന് അനുകുലമായി സംസാരിച്ച മഹാരാഷ്ട്രയിലെ കോണ്ഗ്രസ് നേതാവ് സഞ്ജയ് ഝായെയും കോണ്ഗ്രസ് നേതൃത്വം സസ്പെന്റ് ചെയ്തു.
രാജസ്ഥാനില് കലാപക്കൊടി ഉയര്ത്തിയ സച്ചിന് പൈലറ്റിനെ അനുനയിപ്പിക്കാന് ഹൈക്കമാന്ഡ് ശ്രമിച്ചപ്പോള്, അദ്ദേഹത്തിനു പുറത്തേക്കുള്ള വഴിയൊരുക്കാന് അണിയറ നീക്കം നടത്തി അശോക് ഗെലോട്ട് പക്ഷം. ഗെലോട്ടിനെ മുഖ്യമന്ത്രിപദവിയില് നിന്നു നീക്കണമെന്ന ആവശ്യത്തില് സച്ചിന് ഉറച്ചുനിന്നതോടെ, പ്രതിസന്ധി പരിഹരിക്കാന് മറ്റു മാര്ഗമില്ലെന്ന നിലയിലേക്ക് ഹൈക്കമാന്ഡ് എത്തി.
ജനപിന്തുണയിലും സ്വീകാര്യതയിലും പാര്ട്ടിയിലെ എണ്ണംപറഞ്ഞ യുവനേതാക്കളിലൊരാളായ സച്ചിനെ കൈവിടുന്നതിലൂടെ, ഹിന്ദി ഹൃദയഭൂമിയില് കൈവിട്ട കളിക്കാണു കോണ്ഗ്രസ് മുതിരുന്നത്. വ്യക്തിയല്ല, പാര്ട്ടിയാണു വലുതെന്ന വാദം നിരത്തിയാണ് ആ കളി. ജ്യോതിരാദിത്യ സിന്ധ്യയ്ക്കു പിന്നാലെ സച്ചിനും പുറത്തേക്കു പോകുന്നതോടെ, യുവനേതാക്കള്ക്ക് ഇടമില്ലാത്ത പാര്ട്ടി എന്ന ആക്ഷേപം എതിരാളികള് കോണ്ഗ്രസിനെതിരെ ഉന്നയിക്കുന്നു.
ഗെലോട്ടിനോടു പിണങ്ങി ഏതാനും എംഎല്എമാര്ക്കൊപ്പം ഞായറാഴ്ച സച്ചിന് ഡല്ഹിക്കു പറന്നതിനു പിന്നാലെ ദേശീയ നേതാക്കളായ രണ്ദീപ് സിങ് സുര്ജേവാല, അജയ് മാക്കന്, അവിനാഷ് പാണ്ഡെ എന്നിവരെ പാര്ട്ടി അധ്യക്ഷ സോണിയ ഗാന്ധി ജയ്പുരിലേക്ക് അയച്ചു. കേരളത്തിലായിരുന്ന കെ.സി.വേണുഗോപാലിനോടും അടിയന്തരമായി അവിടേക്കെത്താന് നിര്ദേശിച്ചു.
സച്ചിന് പോകുന്നെങ്കില് പോകട്ടെ എന്ന നിലപാട് ദേശീയ നേതാക്കളെ ഗെലോട്ട് അറിയിച്ചു. തിങ്കളാഴ്ച നടന്ന നിയമസഭാകക്ഷി യോഗത്തില് പങ്കെടുക്കാതിരുന്ന സച്ചിനും ഏതാനും എംഎല്എമാര്ക്കുമെതിരെ അച്ചടക്ക നടപടി സ്വീകരിക്കണമെന്ന് ഗെലോട്ട് ആവശ്യപ്പെട്ടു.
സച്ചിനെ അനുനയിപ്പിക്കാന് പരമാവധി ശ്രമിക്കണമെന്ന് സോണിയയുടെ നിര്ദേശമുള്ളതിനാല്, അച്ചടക്ക നടപടിക്കു ദേശീയ നേതാക്കള് അനുമതി നല്കിയില്ല. പകരം, സച്ചിന്റെ പേരു പരാമര്ശിക്കാതെ അദ്ദേഹത്തിനെതിരെ പ്രമേയം പാസാക്കാന് അനുവദിച്ചു. അടുത്ത ദിവസം യോഗം വീണ്ടും നടത്താമെന്നും അതിലേക്കു സച്ചിനെ ക്ഷണിക്കാമെന്നും ദേശീയ നേതൃത്വം വ്യക്തമാക്കി. അതിലും പങ്കെടുത്തില്ലെങ്കില് സച്ചിനെ പദവിയില് നിന്നൊഴിവാക്കണമെന്നു ഗെലോട്ട് നിലപാടെടുത്തു.
കോണ്ഗ്രസില്നിന്ന് പുറത്തുവരുന്ന സച്ചിന് പൈലറ്റ് എന്ത് നിലപാടായിരിക്കും സ്വീകരിക്കുകയെന്നത് സംബന്ധിച്ച് ഇതുവരെ സൂചനകളൊന്നും നില്കിയിട്ടില്ല. ഇന്ന് രാവിലെ പത്തുമണിക്കാണ് അദ്ദേഹം വാര്ത്ത സമ്മേളനം വിളിച്ചത്. ബിജെപിയില് ചേരില്ലെന്ന് അദ്ദേഹം നേരത്തെ പ്രഖ്യാപിച്ചിരുന്നു. പുതിയ സാഹചര്യത്തില് നിലപാടില് മാറ്റമുണ്ടോ എന്ന് വ്യക്തമല്ല. 15 എംഎല്എമാരുടെ പിന്തുണ സച്ചിന് പൈലറ്റിന് ഉണ്ടെന്നാണ് കരുതുന്നത്. അദ്ദേഹം 30 എം എല്എമാരുടെ പിന്തുണയായിരുന്നു നേരത്തെ അവകാശപ്പെട്ടത്. അതിനിടെ സച്ചിന് പൈലറ്റിനെ പോലുള്ള നേതാവിനെ പോലും നിലനിര്ത്തന് കഴിയാതിരുന്നതിനെതിരെ കോണ്ഗ്രസില് നേതൃത്വത്തിനെതിരെ വികാരം രൂപപ്പെടുന്നതായും റിപ്പോര്ട്ടുകളുണ്ട്. ഇതാാദ്യമായാണ് ഗാന്ധി കുടുംബത്തതിന്റെ തീരുമാനങ്ങള്ക്കെതിരെ പാര്ട്ടിക്കുള്ളില് വ്യാപകമായ എതിര്പ്പുണ്ടാകുന്നത്. കപില് സിബലായിരുന്നു ആദ്യമായി പാര്ട്ടി നേതൃത്വത്തിനെതിരെ രംഗത്തുവന്നത്. എല്ലാവരും പോയ് കഴിഞ്ഞതിന് ശേഷമായിരിക്കുമോ പാര്ട്ടി നേതൃത്വം ഉണരുകയെന്നതായിരുന്നു അദ്ദേഹത്തിന്റെ ചോദ്യം. നേരത്തെയും ഇക്കര്യത്തില് പ്രതികരിച്ച ശശി തരൂര് ഇന്നലെ പൈലറ്റിനെതിരെ നടപടിയെടുത്തതിനെതിനെയും പരോക്ഷമായി വിമര്ശിച്ചു. കോണ്ഗ്രസ് പാര്ട്ടിയിലെ ഏറ്റവും മികച്ച നേതാക്കളിലൊരാളിയിരുന്നു സച്ചിന് പൈലറ്റെന്ന് ശശി തരൂര് അഭിപ്രായപ്പെട്ടു. അദ്ദേഹത്തിന് പുറത്തുപോകേണ്ടുന്ന അവസ്ഥ ഉണ്ടാകാന് പാടില്ലായിരുന്നു. പാര്ട്ടിയെ മെച്ചപ്പെടുത്തുന്നതിനുള്ള ശ്രമങ്ങളായിരുന്നു അദ്ദേഹം നടത്തേണ്ടെതെന്നുമാണ് ശശി തരൂര് അഭിപ്രായപ്പെട്ടത്.
https://www.facebook.com/Malayalivartha