ബിഹാറില്‍ നിന്നെത്തിയ ഓള്‍ ഇന്ത്യ ആസാദ് ബുദ്ധിസ്റ്റ് ആര്‍മി നേതാവ് ഭാണ്ഡേയ ബുദ്ധശരണ്‍ കേസരിയയും സഹപ്രവര്‍ത്തകനും അയോധ്യ ജില്ലാ മജിസ്‌ട്രേട്ട് ഓഫിസിനു മുന്‍പില്‍ സമരം തുടങ്ങി. രാമജന്മഭൂമിയില്‍ നിന്നു ലഭിച്ചത് ബുദ്ധമതവുമായി ബന്ധപ്പെട്ട അവശിഷ്ടങ്ങളാണെന്നും അവ സംരക്ഷിക്കണമെന്നും ആവശ്യപ്പെട്ടായിരുന്നു അയോധ്യയില്‍ ബുദ്ധസന്യാസിമാരുടെ സത്യഗ്രഹം.

യുനെസ്‌കോയുടെ നേതൃത്വത്തില്‍ രാമജന്മഭൂമിയില്‍ ഖനനം നടത്തി ബാക്കി അവശിഷ്ടങ്ങള്‍ കൂടി കണ്ടെടുക്കണമെന്നും അതു ചെയ്യാതെ ക്ഷേത്രനിര്‍മാണം ആരംഭിച്ചാല്‍ സമരം തുടങ്ങുമെന്നും ബുദ്ധ സന്യാസിമാര്‍ വ്യക്തമാക്കി. ക്ഷേത്രം നിര്‍മിക്കുന്നതിനോട് എതിര്‍പ്പില്ല. പക്ഷേ അവശിഷ്ടങ്ങള്‍ കണ്ടെടുത്ത് സംരക്ഷിക്കണം. ആവശ്യങ്ങള്‍ ബന്ധപ്പെട്ടവരെ അറിയിക്കാമെന്ന കലക്ടറുടെ അറിയിപ്പിനെത്തുടര്‍ന്നു സമരം തല്‍ക്കാലത്തേക്കു നിര്‍ത്തി.

രാമജന്മഭൂമിയില്‍ ക്ഷേത്രനിര്‍മാണത്തിനു ഭൂമി നിരപ്പാക്കുമ്പോള്‍ ചില പ്രതിമകളും അവശിഷ്ടങ്ങളും ലഭിച്ചിരുന്നു. ഇത് നേരത്തേയുണ്ടായിരുന്ന ബുദ്ധനഗരമായ സാകേതിലെ ചില ബുദ്ധവിഹാരങ്ങളുടെയും ആരാധനാലയങ്ങളുടേതുമാണെന്നും ഇത് യുനെസ്‌കോ ഏറ്റെടുത്തു സംരക്ഷിക്കണമെന്നുമാണ് സന്യാസിമാരുടെ ആവശ്യം.

കഴിഞ്ഞ മാസം ഭൂമി നിരപ്പാക്കുമ്പോള്‍ ഒരു ശിവലിംഗവും അനേകം പ്രതിമകളും ചില കെട്ടിടാവശിഷ്ടങ്ങളും ലഭിച്ചതായി രാമജന്മഭൂമി ക്ഷേത്രനിര്‍മാണ ട്രസ്റ്റ് അറിയിച്ചിരുന്നു. ഇതെന്താണെന്നു പരസ്യപ്പെടുത്തണമെന്നും ബുദ്ധസന്യാസിമാര്‍ ആവശ്യപ്പെട്ടു. ബുദ്ധനഗരമായ സാകേത് കോസല രാജാവ് നിര്‍മിച്ചതാണെന്നാണ് ബുദ്ധമത വിശ്വാസം.

ശ്രീരാമനെക്കുറിച്ചും അയോധ്യയെക്കുറിച്ചുമുള്ള നേപ്പാള്‍ പ്രധാനമന്ത്രി കെ.പി.ശര്‍മ ഒലിയുടെ വിവാദ പ്രസ്താവനയില്‍ വിശദീകരണവും തിരുത്തുമായി നേപ്പാള്‍. പ്രധാനമന്ത്രിയുടെ പ്രസ്താവനയില്‍ രാഷ്ട്രീയമില്ലെന്നും അത് ആരുടെയെങ്കിലും വികാരത്തെ വ്രണപ്പെടുത്താനായിരുന്നില്ലെന്നും നേപ്പാള്‍ വിദേശകാര്യമന്ത്രാലയം വ്യക്തമാക്കി

ശ്രീരാമന്‍ ജനിച്ചത് നേപ്പാളിലെ ബിര്‍ഗുഞ്ജിനു സമീപം തോറിയിലാണെന്നും അതാണ് യഥാര്‍ഥ അയോധ്യയെന്നുമായിരുന്നു ശര്‍മ ഒലിയുടെ പ്രസ്താവന. പ്രധാനമന്ത്രിയുടേത് നിരുത്തരവാദപരമായ നടപടിയാണെന്ന് വിമര്‍ശനമുയര്‍ന്നിരുന്നു.