കൊറോണയ്‌ക്കെതിരെ പ്രതിരോധശേഷി വര്‍ധിപ്പിക്കും എന്നവകാശപ്പെട്ട് പപ്പടത്തിന്റെ പ്രചാരണം നടത്തിയ കേന്ദ്രമന്ത്രിയ്ക്ക് പരിഹാസം
കോവിഡിനെതിരെ പ്രതിരോധശേഷി വര്‍ധിപ്പിക്കാന്‍ ശേഷിയുള്ള പപ്പടം എന്നവകാശപ്പെട്ട് ഭാബിജി കാ പപ്പഡ് എന്ന ബ്രാന്‍ഡിന്റെ പ്രചാരണം നടത്തിയ കേന്ദ്രമന്ത്രി അര്‍ജുന്‍ റാം മേഘ്വാളിനെതിരെ സമൂഹമാധ്യമങ്ങളില്‍ പരിഹാസം.
തന്റെ മണ്ഡലത്തില്‍ നിന്നുള്ള പപ്പട നിര്‍മാതാക്കള്‍ ആത്മനിര്‍ഭര ഭാരതത്തിന്റെ ഭാഗമായി നിര്‍മിച്ച ഈ പപ്പടം കൊറോണ വൈറസിനെതിരായ ആന്റിബോഡി ശരീരത്തിലുല്‍പാദിപ്പിക്കുമെന്നാണു വിഡിയോയില്‍ പറയുന്നത്. ഉല്‍പ്പാദകരെ മന്ത്രി അഭിനന്ദിക്കുകയും ചെയ്തു.
ഈ പപ്പടത്തില്‍ മഞ്ഞള്‍, കുരുമുളക്, തുളസിയില, കായം തുടങ്ങിയവയൊക്കെ അടങ്ങിയിട്ടുണ്ട് എന്നാണ് ഉല്‍പാദകര്‍ പറയുന്നത്. ഇത് അശാസ്ത്രീയമാണെന്നു സമൂഹമാധ്യമങ്ങളില്‍ പലരും ചൂണ്ടിക്കാട്ടി.
രാവിലെ ഗോമൂത്രം, ഉച്ചയ്ക്ക് കൊറോനില്‍, വൈകുന്നേരം 100 തവണ ഗോ കൊറോണ ജപം, വൈകുന്നേരം ഭാബിജി പപ്പടം എന്നിവ ശീലമാക്കിയാല്‍ കോവിഡ് വാക്‌സിന്‍ വേണ്ടി വരില്ലെന്നാണ് വിഡിയോ പങ്കുവച്ച് വ്യവസായി ഹര്‍ഷ് ഗോയങ്ക പരിഹസിച്ചത്.
പപ്പടം വറുത്തു വീടിനു ചുറ്റും വിതറിയാല്‍ ആളുകള്‍ വരുമ്പോള്‍ അതില്‍ ചവിട്ടി ശബ്ദമുണ്ടാകുമെന്നും അപ്പോള്‍ അകലം പാലിക്കാന്‍ ആവശ്യപ്പെടാമെന്നും രുചിയാത്രകളിലൂടെ പ്രസിദ്ധരായ ഗൂര്‍മന്‍ഡൈസേഴ്‌സ് പ്രതികരിച്ചു.
https://www.facebook.com/Malayalivartha
