ചൈനീസ് കമ്പനികളായ വാവെയ്, സെഡ്ടിഇ എന്നിവയെ ഇന്ത്യയില്‍ 5-ജി പദ്ധതിയില്‍ നിന്നും ഒഴിവാക്കിയേക്കും. ഇക്കാര്യം ചര്‍ച്ച ചെയ്യാന്‍ കേന്ദ്രമന്ത്രിമാരായ അമിത് ഷാ, നിര്‍മല സീതാരാമന്‍, പീയൂഷ് ഗോയല്‍, രവിശങ്കര്‍ പ്രസാദ്, എസ്. ജയശങ്കര്‍ എന്നിവരുള്‍പ്പെട്ട ഉന്നതതല സമിതി ഏതാനും ദിവസം മുന്‍പു ചേര്‍ന്നിരുന്നു. ഇരുകമ്പനികളെയും ഒഴിവാക്കിക്കൊണ്ടുള്ള തീരുമാനം ഉടനുണ്ടാകുമെന്നാണു ടെലികോം മന്ത്രാലയം നല്‍കുന്ന വിവരം. ഇതുമായി ബന്ധപ്പെട്ട ഫയലുകള്‍ ആഭ്യന്തര മന്ത്രാലയത്തിന്റെ നേതൃത്വത്തിലുള്ള സമിതിയുടെ പരിഗണനയിലാണ്. യുഎസ്, ബ്രിട്ടന്‍ തുടങ്ങിയ രാജ്യങ്ങളുടെ പാത ഇന്ത്യയും പിന്തുടര്‍ന്നാല്‍ 5ജി സംവിധാനം വീണ്ടും വൈകും.

5ജി പരീക്ഷണത്തിന്റെ ഭാഗമായ വിവരങ്ങള്‍ രാജ്യത്തിനു പുറത്തു പോകുന്നതിലും മറ്റൊരു രാജ്യത്തിരുന്നു സാങ്കേതിക കാര്യങ്ങള്‍ നിയന്ത്രിക്കുന്നതിലും കേന്ദ്രത്തിന് എതിര്‍പ്പുണ്ട്. ചൈനയുമായി സമീപകാലത്തുണ്ടായ തര്‍ക്കങ്ങളും സുരക്ഷ ഉള്‍പ്പെടെ പ്രശ്‌നങ്ങളും വിലക്കിനു കാരണമാകുമെന്നു ടെലികോം മന്ത്രാലയത്തിലെ ഉന്നത ഉദ്യോഗസ്ഥര്‍ പറയുന്നു.

വാവെയ്, എറിക്‌സണ്‍, നോക്കിയ, സാംസങ് എന്നിവയുമായി ചേര്‍ന്നാണു റിലയന്‍സ് ജിയോ 5-ജി പരീക്ഷണത്തിന് അപേക്ഷ സമര്‍പ്പിച്ചിരിക്കുന്നത്. അപ്പോള്‍ ഇരു കമ്പനികളെയും ഒഴിവാക്കിയാല്‍ ഇന്ത്യയിലെ സേവനദാതാക്കള്‍ക്ക് ഏറെ തിരിച്ചടിയാകും. വാവെയ്, സെഡ്ടിഇ, നോക്കിയ, എറിക്‌സണ്‍ എന്നിവയാണ് എയര്‍ടെല്‍, വോഡഫോണ്‍ - ഐഡിയ കമ്പനികളുടെ പങ്കാളികള്‍.

വാവെയാണ് എയര്‍ടെല്‍ നെറ്റ്വര്‍ക്കില്‍ 30% സാങ്കേതിക സഹായം ലഭ്യമാക്കുന്നത്. വോഡഫോണ്‍ - ഐഡിയയില്‍ 40 ശതമാനവും. സെഡ്ടിഇ, നോക്കിയ എന്നിവയുമായാണു ബിഎസ്എന്‍എല്ലിന്റെ പങ്കാളിത്തം. ബിഎസ്എന്‍എല്ലിന്റെ 3ജി നെറ്റ്വര്‍ക്കില്‍ ഭൂരിഭാഗവും സെഡ്ടിഇയുടെ സഹായത്തോടെയാണ് ക്രമീകരിച്ചിരിക്കുന്നത്.