ആസാം വെള്ളപ്പൊക്ക കെടുതിയില്‍ വലയുന്നു . അസമിലെ 33 ജില്ലകളില്‍ 27 ജില്ലകളെയും പ്രളയം രൂക്ഷമായി ബാധിച്ചിരിക്കുകയാണ്. ഇവിടങ്ങളിലെ 26.38 ലക്ഷം ജനങ്ങളാണ് പ്രളയക്കെടുതിയില്‍ ദുരിതമനുഭവിക്കുന്നത്. 123 പേരാണ് വെള്ളപ്പൊക്ക കെടുതിയില്‍ സംസ്ഥാനത്ത് മരിച്ചത്.ശനിയാഴ്ച വെള്ളപ്പൊക്കത്തെത്തുടര്‍ന്ന് മോറിഗാവ് ഒരാള്‍ക്കൂടി മരിച്ചു. വെള്ളപ്പൊക്കത്തിലും മണ്ണിടിച്ചിലും പെട്ടാണ് ഇത്രയുംപേരുടെ ജീവന്‍ നഷ്ടമായത്.

വെള്ളപ്പൊക്കവുമായി ബന്ധപ്പെട്ട അപകടത്തില്‍ 97 പേര്‍ മരിച്ചപ്പോള്‍ മണ്ണിടിച്ചിലില്‍ 26 പേര്‍ മരിച്ചുവെന്ന് അസം സ്റ്റേറ്റ് ഡിസാസ്റ്റര്‍ മാനേജ്‌മെന്റ് അതോറിറ്റി (എഎസ്ഡിഎംഎ) അറിയിച്ചു. ദുരിതാശ്വാസ ക്യാന്പുകളിലായി അരലക്ഷത്തിലേറെ പേരെയാണ് മാറ്റിപാര്‍പ്പിച്ചിരിക്കുന്നത്. 14 ലക്ഷം വളര്‍ത്തുമൃഗങ്ങളെയും വെള്ളപ്പൊക്കം ബാധിച്ചു. ബ്രഹ്മപുത്ര നദി അപകടനിലയും കവിഞ്ഞ് ഒഴുകുന്നു. കാസിരംഗ പാര്‍ക്ക് 92 ശതമാനവും വെള്ളത്തില്‍ മുങ്ങി. ദേശീയ ദുരന്ത പ്രതികരണ സേന ഉള്‍പ്പെടെ ദുരിതാശ്വാസ പ്രവര്‍ത്തനങ്ങളില്‍ സജീവമാണ്.