മുല്ലപ്പെരിയാറില് പുതിയ ഡാം നിര്മ്മിക്കാമെന്ന് തമിഴ്നാട് സുപ്രീം കോടതിയെ അറിയിച്ചു; അണക്കെട്ട് തങ്ങളുടെ സ്വന്തമെന്നും തമിഴ്നാട്
മുല്ലപ്പെരിയാറില് പുതിയ ഡാം നിര്മ്മിക്കാമെന്നും എന്നാല് അണക്കെട്ടിന്റെ പൂര്ണ അവകാശം തങ്ങള്ക്കാണെന്നും സുപ്രീം കോടതിയില് തമിഴ്നാട്. അന്തിമ വാദത്തിനിടയിലാണ് സുപ്രീം കോടതിയില് തമിഴ്നാടിന്റെ അവകാശ വാദം. കേരളം അണക്കെട്ടുമായി ബന്ധപ്പെട്ട കരാര് റദ്ദാക്കാന് തീരുമാനിച്ചാല് എന്തുചെയ്യുമെന്ന് സുപ്രീം കോടതി ചോദിച്ചിരുന്നു. ഇതിനു മറുപടിയായാണ് തമിഴ്നാടിനുവേണ്ടി ഹാജരായ അഭിഭാഷകന് ഡാമിനുമേല് കേരളത്തിന് അധികാരമില്ലെന്ന് പറഞ്ഞത്.
എന്നാല് ഇപ്പോള് പുതിയ അണക്കെട്ടിന്റെ ആവശ്യമില്ലെന്നും തമിഴ്നാട് അറിയിച്ചു. പുതിയ ഡാം നിര്മ്മിക്കാന് കേരളത്തെ അനുവദിക്കില്ലെന്ന് തമിഴ്നാട് വ്യക്തമാക്കി. പുതിയ അണക്കെട്ട് നിര്മ്മിക്കുകയാണെങ്കില് നിര്മ്മാണാവകാശം തമിഴ്നാടിന് നല്കണമെന്നും ആവശ്യമുയര്ന്നു. മുല്ലപ്പെരിയാര് ഡാമിന്റെ സുരക്ഷ ഉറപ്പാക്കാന് കേരളത്തിന് അവകാശമുണ്ടെന്നും, ജനങ്ങളുടെ സുരക്ഷക്കാണ് പ്രഥമ പരിഗണനയെന്നും സുപ്രീംകോടതി ഇന്നലെ വ്യക്തമാക്കിയിരുന്നു. ഈ സാഹചര്യത്തിലാണ് പുതിയ നിലപാടുമായി തമിഴ്നാട് രംഗത്തെത്തിയിരിക്കുന്നത്.
https://www.facebook.com/Malayalivartha