തെലങ്കാന തലസ്ഥാനമായ ഹൈദരാബാദ് ശനിയാഴ്ച രണ്ട് പാര്‍ട്ടികളുടെ ശക്തിപ്രകടനത്തിന് വേദിയാകും... ഹൈദരാബാദിലെ ബേഗംപേട്ട് വിമാനത്താവളത്തില്‍ യശ്വന്ത് സിന്‍ഹയെ സ്വീകരിച്ച് ആനയിച്ച് തെലങ്കാന മുഖ്യമന്ത്രിയും ടി.ആര്.എസ് അധ്യക്ഷനുമായി ചന്ദ്രശേഖര റാവു
തെലങ്കാന തലസ്ഥാനമായ ഹൈദരാബാദ് ശനിയാഴ്ച രണ്ട് പാര്‍ട്ടികളുടെ ശക്തിപ്രകടനത്തിന് വേദിയാകും. മഹാരാഷ്ട്രയില്‍ പ്രയോഗിച്ച് വിജയിച്ച തന്ത്രങ്ങളുടെ ബലത്തില്‍ തെലങ്കാന വഴി ദക്ഷിണേന്ത്യന്‍ സംസ്ഥാനങ്ങള്‍ പിടിക്കാനുള്ള ഒരുക്കത്തില്‍ ബിജെപി ദേശീയ നിര്‍വാഹക സമിതി യോഗം ഇന്ന് ഹൈദരാബാദില്‍ ആരംഭിക്കും.
പ്രധാനമന്ത്രി നരേന്ദ്ര മോദി തെലങ്കാനയില്‍ എത്തുന്നതിന് തൊട്ടുമുമ്പ് ഭരണകക്ഷിയായ ടിആര്‍എസ് രാഷ്ട്രപതി സ്ഥാനാര്‍ഥി യശ്വന്ത് സിന്‍ഹക്ക് സ്വീകരണമൊരുക്കി കൊണ്ടാണ് ശക്തി കാണിക്കുന്നത്.
ഹൈദരാബാദിലെ ബേഗംപേട്ട് വിമാനത്താവളത്തില്‍ യശ്വന്ത് സിന്‍ഹയെ സ്വീകരിച്ച് ആനയിച്ച തെലങ്കാന മുഖ്യമന്ത്രിയും ടി.ആര്.എസ് അധ്യക്ഷനുമായി ചന്ദ്രശേഖര റാവു പ്രധാനമന്ത്രി മോദിയെ ഇത്തവണയും സ്വീകാരിക്കാനെത്തില്ല എന്നതാണ് ശ്രദ്ധേയം. യശ്വന്ത് സിന്‍ഹയും പ്രധാനമന്ത്രി മോദിയും ഒരേ വിമാനത്താവളത്തില്‍ മണിക്കൂറുകളുടെ വ്യത്യാസത്തിലാണ് എത്തുന്നത്. ആറ് മാസത്തിനിടെ ഇത് മൂന്നാം തവണയാണ് പ്രധാനമന്ത്രിയെ സ്വീകരിക്കാന്‍ ചെല്ലാതെ ചന്ദ്രശേഖര റാവു പ്രോട്ടോക്കോള്‍ പാലിക്കാതിരിക്കുന്നത്.
ഉച്ചയ്ക്ക് ശേഷം 2.55 ഓടെയാണ് പ്രധാനമന്ത്രി ഹൈദാരാബാദ് വിമാനത്താവളത്തിലെത്തുക. സംസ്ഥാന മൃഗസംരക്ഷണ ഫിഷറീസ് വകുപ്പ് മന്ത്രി തലസാനി ശ്രീനിവാസ് യാദവാണ് പ്രധാനമന്ത്രിയെ സ്വീകരിക്കുക എന്നാണ് തെലങ്കാന സര്‍ക്കാര്‍ അറിയിച്ചിരിക്കുന്നത്. ഇതിന് രണ്ട് മണിക്കൂര്‍ മുമ്പായിട്ടെത്തിയ യശ്വന്ത് സിന്‍ഹയെ ചന്ദ്രശേഖര റാവു നേരിട്ട് പോയി സ്വീകരിക്കുകയും ചെയ്തു.
തുടര്‍ന്ന് ചന്ദ്രശേഖര റാവുവും സിന്‍ഹയും വിമാനത്താവളത്തില്‍ നിന്ന് ജല്‍ വിഹാറിലേക്ക് ബൈക്ക് റാലി നടത്തി. പ്രതിപക്ഷത്തിന്റെ സംയുക്ത രാഷ്ട്രപതി സ്ഥാനാര്‍ഥിയായ യശ്വന്ത് സിന്‍ഹയ്ക്ക് അവിടെ സ്വീകരണ സമ്മേളനമൊരുക്കി.
ബിജെപിയുടെ ദേശീയ നിര്‍വാഹക സമിതി യോഗത്തെ വെല്ലുന്ന രീതിയില്‍ തന്നെയാണ് യശ്വന്ത് സിന്‍ഹക്കുള്ള സ്വീകരണ പോസ്റ്ററുകളും പരസ്യവും ടിആര്‍എസ് ഒരുക്കിയിരിക്കുന്നത്.
"
https://www.facebook.com/Malayalivartha
