ഇര തേടുന്ന ചെന്നായക്കൂട്ടത്തെപ്പോലെ. കോണ്‍ഗ്രസ്സിന്റെ വിശാല പ്രതിപക്ഷ നീക്കത്തെ പരിഹസിച്ച് കേന്ദ്ര മന്ത്രി സ്മൃതി ഇറാനി. ലോക്‌സഭാ തിരഞ്ഞെടുപ്പിനു മുന്നോടിയായി പട്‌നയില്‍ ചേര്‍ന്ന പ്രതിപക്ഷ പാര്‍ട്ടികളുടെ യോഗത്തെ അടച്ചാക്ഷേപിക്കുകയാണ് ബിജെപി. കോണ്‍ഗ്രസ് നീക്ക ബിജെപി ഭയപ്പെട്ട് തുടങ്ങുന്നു എന്നതിന്റെ ലക്ഷണമാണ് ബിജെപി നേതാക്കളുടെ പ്രസ്താവനകള്‍. പ്രതിപക്ഷ പാര്‍ട്ടികളുടെ ലക്ഷ്യം പ്രധാനമന്ത്രി നരേന്ദ്ര മോദി അല്ലെന്നും മറിച്ച് രാജ്യത്തെ ജനങ്ങളും ഖജനാവുമാണെന്നും സ്മൃതി ആരോപിച്ചു.

മോദി സര്‍ക്കാര്‍ ഒന്‍പതു വര്‍ഷം പൂര്‍ത്തിയാക്കിയതുമായി ബന്ധപ്പെട്ടു നടന്ന പരിപാടിയില്‍ സംസാരിക്കവേയാണ് സ്മൃതിയുടെ പരാമര്‍ശം. ഇന്‍ഡോറില്‍ നിന്നുള്ള പ്രമുഖ സ്ത്രീകള്‍ പരിപാടിയില്‍ പങ്കെടുത്തിരുന്നു. ''ചെന്നായ്ക്കള്‍ കൂട്ടത്തോടെയാണ് ഇര തേടുകയെന്നാണ് പറയുന്നത്. പട്‌നയില്‍ ഇതുപോലെ പ്രതിപക്ഷ പാര്‍ട്ടികളുടെ ഒരു ഒത്തുകൂടല്‍ ഉണ്ടായിരുന്നു. അവരുടെ ലക്ഷ്യം മോദിയല്ല, ജനങ്ങളും രാജ്യത്തിന്റെ ഖജനാവുമാണ്. എപ്പോഴൊക്കെ ഒരാള്‍ ഖജനാവില്‍ ദുഷിച്ച കണ്ണ് പതിച്ചോ, എനിക്കറിയാം, അത് ആ വീട്ടിലെ സ്ത്രീയെ അറിയിച്ചാല്‍ മതി. ശത്രു തനിയെ പിന്മാറിക്കോളും''സ്മൃതി പറഞ്ഞു. ബിജെപിയെ തോല്‍പിക്കാന്‍ ഒന്നിച്ചുനില്‍ക്കുമെന്നു പ്രഖ്യാപിച്ച്, അടുത്ത ലോക്‌സഭാ തിരഞ്ഞെടുപ്പിനെ ഒറ്റക്കെട്ടായി നേരിടാനാണ് കോണ്‍ഗ്രസ് അടക്കമുള്ള 14 കക്ഷികള്‍ വെള്ളിയാഴ്ച പട്‌നയില്‍ യോഗം ചേര്‍ന്നു തീരുമാനിച്ചത്. ഐക്യനീക്കങ്ങള്‍ക്കു രൂപം നല്‍കാന്‍ ജൂലൈ 10നോ 12നോ ഹിമാചലിലെ ഷിംലയില്‍ വീണ്ടും യോഗം ചേരും.

ഇതിനിടെ പട്‌നയില്‍ വിശാല പ്രതിപക്ഷ യോഗത്തില്‍ കോണ്‍ഗ്രസിനെ ആക്രമിക്കാനുള്ള നീക്കത്തിനേറ്റ തിരിച്ചടിക്കു പിന്നാലെ 'അയഞ്ഞ്' ആം ആദ്മി പാര്‍ട്ടി. കോണ്‍ഗ്രസ് നേതാവ് രാഹുല്‍ ഗാന്ധി ഹൃദയവിശാലത കാണിക്കണമെന്ന് എഎപി ആവശ്യപ്പെട്ടു. 'വെറുപ്പിന്റെ വിപണിയില്‍ സ്‌നേഹത്തിന്റെ കട' തുറക്കുന്നുവെന്ന രാഹുലിന്റെ വാക്കുകള്‍ കടമെടുത്തായിരുന്നു പരാമര്‍ശം. ''വെറുപ്പിന്റെ ഈ വിപണിയില്‍, സ്‌നേഹത്തിന്റെ കട തുറന്നുവയ്ക്കുകയാണു നാം ചെയ്യുന്നത് എന്ന രാഹുല്‍ ഗാന്ധിയുടെ വാക്കുകള്‍ ഞാന്‍ ഇഷ്ടപ്പെടുന്നു. സര്‍, ഇവിടെ വെറുപ്പിന്റെ വിപണിയുണ്ടെന്നു ഞങ്ങള്‍ വിശ്വസിക്കുന്നു. പ്രതിപക്ഷ പാര്‍ട്ടികള്‍ താങ്കളോടു സ്‌നേഹം ചോദിക്കുമ്പോള്‍, കയ്യിലില്ലെന്നു പറയുകയാണ്. അപ്പോള്‍ നിങ്ങളുടെ 'സ്‌നേഹത്തിന്റെ കടയെ'പ്പറ്റി ചോദ്യങ്ങളുയരും മുതിര്‍ന്ന എഎപി നേതാവും ഡല്‍ഹി ആരോഗ്യമന്ത്രിയുമായ സൗരഭ് ഭരദ്വാജ് പറഞ്ഞു. ഭൂതകാലത്തു പരസ്പരം നടത്തിയ പരാമര്‍ശങ്ങള്‍ മറന്ന് പ്രതിപക്ഷ പാര്‍ട്ടികള്‍ ഒരുമിച്ചു മുന്നോട്ടു പോകണമെന്നും സൗരഭ് നിര്‍ദേശിച്ചു. ''സംസ്ഥാനങ്ങളില്‍ നിരവധി പ്രതിപക്ഷ പാര്‍ട്ടികള്‍ പരസ്പരം മത്സരിക്കുന്നുണ്ട്. ഈ വൈരുധ്യങ്ങള്‍ക്കിടയിലും നമുക്ക് ഒരുമിച്ചു നില്‍ക്കാന്‍ സാധിച്ചിരിക്കുന്നു. പ്രാദേശിക എതിരാളികള്‍ക്ക് ഉള്‍പ്പെടെ മറ്റു പാ!ര്‍ട്ടികള്‍ക്കായി സീറ്റുകള്‍ വിട്ടുനല്‍കുന്നത് വേദനാജനകമാണ്. അതിനു ഹൃദയവിശാലത ആവശ്യമാണ്. സൗരഭ് കൂട്ടിച്ചേര്‍ത്തു.

ഭാരത് ജോഡോ യാത്രയ്ക്കിടെയാണ്, വെറുപ്പിന്റെ വിപണിയില്‍ സ്‌നേഹത്തിന്റെ കട തുറന്നുവയ്ക്കുകയാണു നാം ചെയ്യുന്നത് എന്നു രാഹുല്‍ പറഞ്ഞത്. ബിജെപിക്കെതിരായുള്ള കോണ്‍ഗ്രസിന്റെ രാഷ്ട്രീയ പ്രസ്താവനയായി അതു മാറി. കഴിഞ്ഞ ദിവസം പട്‌നയിലെ പ്രതിപക്ഷയോഗത്തില്‍ കോണ്‍ഗ്രസിനെ ഉന്നമിട്ടുള്ള നീക്കത്തില്‍ എഎപി ഒറ്റപ്പെട്ടിരുന്നു. ഡല്‍ഹി സര്‍ക്കാരിനെതിരായ കേന്ദ്ര ഓര്‍ഡിനന്‍സിനെ പാര്‍ലമെന്റില്‍ നേരിടാന്‍ എല്ലാ പ്രതിപക്ഷകക്ഷികളുടെയും പിന്തുണ ഉറപ്പാക്കാന്‍ ലക്ഷ്യമിട്ടാണ് ഡല്‍ഹി മുഖ്യമന്ത്രി അരവിന്ദ് കേജ്‌രിവാളും പഞ്ചാബ് മുഖ്യമന്ത്രി ഭഗവന്ത് മാനും യോഗത്തിനെത്തിയത്. എല്ലാ കക്ഷികളും പിന്തുണ അറിയിച്ചിട്ടുണ്ടെന്നും കോണ്‍ഗ്രസ് നിലപാട് വ്യക്തമാക്കണമെന്നും കേജ്‌രിവാള്‍ ആവശ്യപ്പെട്ടു. എന്തിനാണിത്ര തിടുക്കം കാണിക്കുന്നതെന്നും പാര്‍ലമെന്റില്‍ ഓര്‍ഡിനന്‍സ് വരുമ്പോള്‍ അക്കാര്യത്തില്‍ തീരുമാനമെടുക്കാമെന്നുമുള്ള കോണ്‍ഗ്രസ് പ്രസിഡന്റ് മല്ലികാര്‍ജുന്‍ ഖര്‍ഗെയുടെ പ്രതികരണം കേജ്‌രിവാളിനെ ചൊടിപ്പിച്ചു. എന്നാല്‍, യോഗത്തില്‍ ഒറ്റപ്പെട്ടെന്നു കണ്ടതോടെ വാര്‍ത്താസമ്മേളനത്തിനു നില്‍ക്കാതെ കേജ്‌രിവാളും സംഘവും മടങ്ങി. പിന്നാലെ, കോണ്‍ഗ്രസിനെ രൂക്ഷഭാഷയില്‍ വിമര്‍ശിച്ച് വാര്‍ത്തക്കുറിപ്പ് ഇറക്കിയിരുന്നു.