ലക്ഷദ്വീപില് പുതിയ വിമാനത്താവളം നിര്മ്മിക്കാനുള്ള പദ്ധതികളുമായി ഇന്ത്യ...
ലക്ഷദ്വീപില് പുതിയ വിമാനത്താവളം നിര്മിക്കാനുള്ള പദ്ധതികളുമായി ഇന്ത്യ. മിനിക്കോയ് ദ്വീപുകളില് സൈനിക, വാണിജ്യ വിമാനങ്ങള് പ്രവര്ത്തിപ്പിക്കുന്ന പുതിയ വിമാനത്താവളം നിര്മ്മിക്കുക. ടൂറിസത്തിനൊപ്പം അറബിക്കടലിലും ഇന്ത്യന് മഹാസമുദ്ര മേഖലയിലും നിരീക്ഷണം നടത്താന് പുതിയ പദ്ധതിയിലൂടെ ഇന്ത്യ ലക്ഷ്യമിടുന്നു. പ്രധാനമന്ത്രി നരേന്ദ്ര മോദിയുടെ സന്ദര്ശനത്തിന് പിന്നാലെ ലക്ഷദ്വീപില് വിനോദസഞ്ചാരികളുടെ ഒഴുക്കുണ്ടാകുമെന്ന വിലയിരുത്തലിനിടെയാണ് വിമാനത്താവള പദ്ധതി മുന്നോട്ട് വരുന്നത്.
''യുദ്ധവിമാനങ്ങള്, മറ്റ് സൈനിക വിമാനങ്ങള്, വാണിജ്യ വിമാനങ്ങള് എന്നിവ പ്രവര്ത്തിപ്പിക്കാന് പ്രാപ്തമായ ഒരു ഡ്യുവല് പര്പ്പസ് എയര്ഫീല്ഡ് ഉണ്ടാക്കാനാണ് പദ്ധതി,'' സര്ക്കാര് വൃത്തങ്ങള് പറഞ്ഞു. മിനിക്കോയ് ദ്വീപുകളില് ഒരു പുതിയ എയര്ഫീല്ഡ് വികസിപ്പിക്കാന് നേരത്തെ തന്നെ സര്ക്കാരിന് നിര്ദ്ദേശം ലഭിച്ചിരുന്നു. നിലവിലെ സാഹചര്യങ്ങള് ചൂണ്ടിക്കാട്ടി പദ്ധതി നിര്ദ്ദേശം വീണ്ടും സര്ക്കാരിന് അയക്കുകയായിരുന്നു.
കടല്ക്കൊള്ളയും സാമൂഹിക വിരുദ്ധ പ്രവര്ത്തനങ്ങളും വര്ധിച്ചുവരുന്ന അറബിക്കടലിലും ഇന്ത്യന് മഹാസമുദ്ര മേഖലയിലും നിരീക്ഷണം നടത്താന് താവളമായി ഉപയോഗിക്കാമെന്നതിനാല് ഇന്ത്യയെ സംബന്ധിച്ചിടത്തോളം തന്ത്രപ്രധാനമായ ഈ എയര്ഫീല്ഡ് ആയിരിക്കും മിനിക്കോയിയിലേത്. ഈ ദ്വീപുകളില് ഒരു എയര്സ്ട്രിപ്പ് വികസിപ്പിക്കാന് നിര്ദ്ദേശിച്ച പ്രതിരോധ മന്ത്രാലയത്തിന് കീഴിലുള്ള ആദ്യത്തെ സേനയാണ് ഇന്ത്യന് കോസ്റ്റ് ഗാര്ഡ്. നിലവിലെ നിര്ദ്ദേശമനുസരിച്ച് മിനിക്കോയില് നിന്നുള്ള ഓപ്പറേഷനുകള്ക്ക് ഇന്ത്യന് എയര്ഫോഴ്സ് നേതൃത്വം നല്കും.
മിനിക്കോയ് വിമാനത്താവളം പ്രതിരോധ സേനയ്ക്ക് അറബിക്കടലില് നിരീക്ഷണ മേഖല വിപുലീകരിക്കാനുള്ള ശേഷിയും നല്കും. സര്ക്കാര് ആസൂത്രണം ചെയ്തതു പോലെ ഈ മേഖലയിലെ ടൂറിസത്തിന് ഈ വിമാനത്താവളം ഉത്തേജനം നല്കുമെന്നതും വ്യക്തമാണ്. കേന്ദ്രഭരണപ്രദേശമായ ലക്ഷദ്വീപില് ഇപ്പോള് ഒരേയൊരു എയര്സ്ട്രിപ്പ് മാത്രമേയുള്ളൂ. അഗത്തിയിലെ ഈ വിമാനത്താവളത്തില് വീതി കുറഞ്ഞ വിമാനങ്ങള്ക്ക് മാത്രമേ പ്രവര്ത്തിക്കാനാകൂ.
കഴിഞ്ഞയാഴ്ച പ്രധാനമന്ത്രി നരേന്ദ്ര മോദി നടത്തിയ സന്ദര്ശനത്തിന് പിന്നാലെ ലക്ഷദ്വീപില് നിരവധി വികസന പദ്ധതികള് പ്രഖ്യാപിച്ചിരുന്നു. അദ്ദേഹം സ്നോര്ക്കെല്ലിങ്ങില് ഒരു കൈ നോക്കുകയും ബീച്ചുകളുടെ ഭംഗി ആസ്വദിക്കുകയും ചെയ്തിരുന്നു. ഇതിന്റെ ചിത്രങ്ങളും വീഡിയോകളും അദ്ദേഹം പങ്കുവെച്ചത് വൈറലായി. അതേസമയം ഈ ചിത്രങ്ങള്ക്ക് താഴെ മാലിദ്വീപ് മന്ത്രിമാര് നടത്തിയ അധിക്ഷേപകരമായ കമന്റുകള് വലിയ വിവാദമുണ്ടാക്കിയിരുന്നു. മോദിയെ കോമാളിയെന്നും ഇസ്രായേലിന്റെ പാവയെന്നും അടക്കം അധിക്ഷേപിച്ചായിരുന്നു കമന്റുകള്. ഇതോടെ ഈ മന്ത്രിമാര്ക്കെതിരെ രൂക്ഷമായ പ്രതികരണം സോഷ്യല് മീഡിയയില് നിന്നുണ്ടായി.
https://www.facebook.com/Malayalivartha
